కన్నడ సినీ పరిశ్రమలో తీవ్ర విషాదం నెలకొంది. ఆరు దశాబ్దాలతకు పైగా తన అద్భుతమైన హాస్యంతో ప్రేక్షకులను అలరించిన ప్రముఖ సీనియర్ నటుడు మైసూర్ శ్రీకాంతయ్య ( 80 ) ఉమేశ్ కన్నుమూశారు. సుమారు 350కి పైగా చిత్రాల్లో నటించిన ఆయన గత కొంతకాలంగా కాలేయ క్యాన్సర్ తో బాధపడుతున్నారు. బెంగళూరులోని ఓ ఆసుపత్రిలో చికిత్స పొందుతూ హాస్య చక్రవర్తి తుది శ్వాస విడిచారు.
ప్రముఖుల సంతాపం
ఉమేశ్ మరణం పట్ల కర్ణాటక ముఖ్యమంత్రి ఎస్. సిద్ధరామయ్య, కేంద్ర మంత్రి హెచ్‌డీ కుమారస్వామి, డిప్యూటీ సీఎం డీకే శివకుమార్ సహా సినీ, రాజకీయ ప్రముఖులు తమ ప్రగాఢ సంతాపాన్ని తెలియజేశారు. ఆయన మరణం కన్నడ చిత్ర పరిశ్రమకు తీరని లోటు అని పేర్కొన్నారు. హాస్యం, కళ ద్వారా ఉమేశ్ గారు ప్రేక్షకులకు అందించిన ఆనందం తరతరాలకు గుర్తుండిపోతుందన్నారు.
రంగస్థలం నుంచి వెండితెర వరకు..
1945 ఏప్రిల్ 24న మైసూర్‌లో జన్మించిన ఉమేశ్ గారి పూర్తి పేరు మైసూర్ శ్రీకాంతయ్య ఉమేశ్. కేవలం నాలుగేళ్ల చిన్న వయసులోనే రంగస్థలంపై అడుగుపెట్టి, గొప్ప నాటక బృందాలలో బాల నటుడిగా నటించడం ద్వారా తన ప్రయాణాన్ని ప్రారంభించారు. ఈ రంగస్థల అనుభవమే ఆయన హాస్యానికి, అద్భుతమైన సంభాషణల శైలికి పునాది వేసింది. 1960లో బి.ఆర్. పంతులు దర్శకత్వంలో వచ్చిన 'మక్కల రాజ్య' చిత్రంలో బాల నటుడిగా ముఖ్య పాత్ర పోషించడం ద్వారా ఆయన కన్నడ చిత్ర పరిశ్రమకు పరిచయమయ్యారు. అయినప్పటికీ, ఆ తర్వాత కొంతకాలం సినిమా అవకాశాలు తగ్గడంతో, మళ్లీ థియేటర్‌కు తిరిగి వెళ్లారు.
మలుపు తిప్పిన 'కథా సంగమ'
1970వ దశకంలో ప్రముఖ దర్శకుడు పుట్టన్న కనగల్ కంట పడటంతో ఆయన సినీ కెరీర్‌కు మరో కీలక మలుపు వచ్చింది. కనగల్ దర్శకత్వంలో 1976లో వచ్చిన మూడు భాగాల చిత్రం 'కథా సంగమ' (కథా సంగమం)లో తిమ్మరై పాత్రకు గాను ఉమేశ్ గారికి ఉత్తమ సహాయ నటుడిగా కర్ణాటక రాష్ట్ర చలనచిత్ర అవార్డు లభించింది. ఈ చిత్రం విజయం తరువాత ఆయన వెనుదిరిగి చూడలేదు, కన్నడ చిత్ర పరిశ్రమలో చిరస్మరణీయమైన హాస్యనటులలో ఒకరిగా స్థిరపడ్డారు. కన్నడ కంఠీరవ రాజ్‌కుమార్‌, విష్ణువర్ధన్‌, అంబరీశ్‌ వంటి గొప్ప నటులతో పాటు, తమిళ దిగ్గజాలు శివాజీ గణేశన్‌, రజనీకాంత్‌ వంటివారితో కూడా కలిసి నటించారు.
నటనకు ఆయన అందించిన విశేష కృషికి గాను, 1994లో కర్ణాటక నాటక అకాడమీ అవార్డుతో పాటు, 1997లో మహానగర పాలికే అవార్డును కూడా అందుకున్నారు. అంతేకాకుండా, ఆయన రాసిన ఆత్మకథ 'బన్నద ఘంటే' కూడా విమర్శకుల ప్రశంసలు అందుకొని విశ్వేశ్వరయ్య ప్రతిష్ఠాన అవార్డును గెలుచుకుంది. ఉమేశ్ తమదైన ప్రత్యేకమైన సంభాషణ శైలి, ముఖ కవళికలు, హాస్యంతో ప్రేక్షకులను ఆకట్టుకున్నారు.
ಕನ್ನಡ ಚಿತ್ರರಂಗದ ಹಿರಿಯ ನಟ ಉಮೇಶ್ರವರು ನಿಧನರಾಗಿದ್ದಾರೆ. ಮೈಸೂರಿನವರಾದ ಉಮೇಶ್ರವರು ತಮ್ಮ ಕಿರಿಯ ವಯಸ್ಸಿನಲ್ಲಿಯೇ ರಂಗಭೂಮಿಯ ನಟರಾಗಿ, ನಂತರ ಚಲನಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡಿದರು. ಸುಮಾರು 900 ಚಿತ್ರಗಳಲ್ಲಿ ಅಭಿನಯಿಸಿದ ಅನುಭವವಿರುವ ಉಮೇಶ್ರವರು ಹಾಸ್ಯನಟರಾಗಿ ಎಲ್ಲರನ್ನು ರಂಜಿಸಿದ್ದರು. 80 ವರ್ಷ ವಯಸ್ಸಿನ ಉಮೇಶ್ ರವರು… pic.twitter.com/yYfdtEotAR
— Siddaramaiah (@siddaramaiah) November 30, 2025
