- కొమ్ముకోయ, కోలాటం,ఒగ్గు డోలు ప్రదర్శనలు
హైదరాబాద్, వెలుగు: తెలంగాణ రైజింగ్ గ్లోబల్ సమిట్లో ప్రముఖ సంగీత దర్శకుడు కీరవాణి తన సంగీత కచేరితో అలరించనున్నారు. భారత్ ఫ్యూచర్ సిటీలో డిసెంబర్ 8న ప్రారంభమయ్యే సదస్సులో 90 నిమిషాల పాటు కీరవాణి ప్రత్యేక సంగీత కచేరి ఉంటుంది.
ప్రముఖ వీణా విద్వాంసురాలు పి. జయలక్ష్మి వీణా కార్యక్రమం, కళా కృష్ణ ఆధ్వర్యంలో పేరిణి నాట్యం ప్రత్యేక ఆకర్షణగా నిలవనున్నాయి. ప్రముఖ ఇంద్రజాల మాంత్రికుడు సామల వేణు తన ప్రదర్శనతో విదేశీ అతిథులను ఆకట్టుకోనున్నారు. వీటితోపాటు తెలంగాణ సంప్రదాయ కళారూపాలు సందడి చేయనున్నాయి.
తెలంగాణ రాష్ట్ర సంస్కృతి, కళలను ప్రతిబింబించేలా కొమ్ము కోయ, బంజారా, కోలాటం, గుస్సాడీ, ఒగ్గు డోలు, మహిళల డప్పులు, బోనాల కోలాటంలాంటి ప్రజా కళారూపాలతో అతిథులను ఆత్మీయంగా ఆహ్వానించను న్నారు. ఈ నెల 10 నుంచి 13వ తేదీ వరకు ఈ వేడుకలను ప్రజలందరూ చూసేలా ఏర్పాట్లు చేస్తున్నారు.
