- మరో ఏడుగురికి గాయాలు!
నైరోబి: కెన్యాలో ఘోర ప్రమాదం జరిగింది. శనివారం తెల్లవారుజామున సలామా ఏరియాలోని నైరోబి–మొంబాసా హైవేపై ఓ లారీ మరో లారీని ఓవర్టేక్ చేయడానికి ప్రయత్నించి ఎదురుగా వస్తున్న వ్యాన్ను ఢీకొట్టింది. ఈ ప్రమాదంలో 17 మంది అక్కడికక్కడే మరణించారు. మరో ఏడుగురు తీవ్రంగా గాయపడ్డారు.
పోలీసుల ప్రకారం.. డ్రైవర్ అజాగ్రత్త వల్లే లారీ అదుపుతప్పి, ఎదురుగా వస్తున్న వ్యాన్తో పాటు మరిన్ని వాహనాలను బలంగా ఢీకొట్టింది. ప్రమాదం ధాటికి వ్యాన్ నజ్జునుజ్జయ్యింది. మృతులంతా నకురు కౌంటీలోని ప్రసిద్ధ సుబుకియా నేషనల్ ష్రైన్ (ప్రార్థనా స్థలం) వద్ద జరగనున్న ప్రార్థనల్లో పాల్గొనేందుకు వెళ్తున్నట్లు అధికారులు వెల్లడించారు.
వ్యాన్ డ్రైవర్తో పాటు చనిపోయిన 17 మందిలో ఎక్కువమంది మహిళలే ఉన్నారు. వీరంతా మొంబాసాలోని సెయింట్ మథియాస్ ములుంబా పారిష్కు చెందిన క్యాథలిక్ క్రిస్టియన్లుగా గుర్తించారు. ప్రమాదంలో గాయపడినవారిని పోలీసులు సమీపంలోని ఆసుపత్రులకు తరలించి చికిత్స అందిస్తున్నారు. ఘటనపై కెన్యా అధ్యక్షుడు విలియం రుటోతో పాటు మొంబాసా ఆర్చ్ బిషప్ మార్టిన్ కివువా సంతాపం వ్యక్తం చేశారు.
