- 2లక్షల టన్నులు కొనుగోలు చేసేందుకు ఆసక్తి
- కేరళ సివిల్ సప్లయ్స్ మంత్రితో ఉత్తమ్ భేటీ
హైదరాబాద్, వెలుగు: రాష్ట్రం నుంచి బాయిల్డ్ రైస్ కొనేందుకు కేరళ ప్రభుత్వం సిద్ధంగా ఉందని పౌర సరఫరాల శాఖ మంత్రి ఉత్తమ్ కుమార్ రెడ్డి అన్నారు. విజేత, స్వర్ణ రకాలపై ఆసక్తి వ్యక్తం చేసిందన్నారు. కేరళ సర్కార్కు అన్ని రకాలుగా సహకారం అందిస్తామని చెప్పారు. శుక్రవారం ఆ రాష్ట్ర సివిల్ సప్లయ్స్ మినిస్టర్ జీఆర్ అనిల్ తో సెక్రటేరియెట్లో ఉత్తమ్ భేటీ అయ్యారు. రెండు రాష్ట్రాల మధ్య ఆహార ధాన్యాల ఒప్పంద అవకాశాలపై చర్చించారు. ఈ సందర్భంగా ఉత్తమ్ కుమార్ మాట్లాడారు.
2లక్షల టన్నుల బాయిల్డ్ రైస్ కొనేందుకు కేరళ ప్రభుత్వం ఆసక్తి వ్యక్తం చేసిందన్నారు. మిర్చి పంట విషయంలో కూడా పాజిటివ్గానే ఉందని తెలిపారు. రాష్ట్రానికి అవసరమైన బియ్యం సరఫరా చేస్తామని హామీ ఇచ్చారు. కేరళ అవసరాలు తీర్చేందుకు ఉన్న అవకాశాలపై సమగ్ర నివేదిక రూపొందించాలని సివిల్ సప్లయ్స్ కమిషనర్ డీఎస్ చౌహాన్ను ఉత్తమ్ ఆదేశించారు. రెండు రాష్ట్రాల సాగు పద్ధతులు, అవసరాలపై కూడా మంత్రులు చర్చించారు. కేరళలో పండించే సుగంధ ద్రవ్యాలపై ప్రధానంగా మాట్లాడుకున్నారు. ఒప్పందం ఫైనల్ అయితే రెండు రాష్ట్రాలకు ఎంతో ప్రయోజనం చేకూరుతుందన్నారు.
