కేరళ ప్రభుత్వం 2024 నుంచి పోక్సో (POCSO) చట్టం గురించి అవగాహన పాఠాలను పాఠ్యాంశాల్లో చేర్చాలని నిర్ణయించింది. రాష్ట్ర విద్యా పరిశోధన, శిక్షణ మండలి (SCERT) ప్రస్తుతం ఈ చొరవపై పని చేస్తోంది. ఇది రాబోయే విద్యా సంవత్సరం నుంచి అమలు కానుంది. ఇంటిగ్రేటెడ్ విధానంలో ఈ పోక్సో చట్టానికి సంబంధించిన పాఠాలు ఇకపై ఉపాధ్యాయులు, విద్యార్థులకు బోధించనున్నారు.
కేసుల్లో బెయిల్ విచారణ సందర్భంగా పిల్లలపై లైంగిక నేరాలు పెరుగుతున్నాయని కేరళ హైకోర్టు గుర్తించిన తర్వాత ప్రభుత్వం ఈ నిర్ణయం తీసుకుంది. న్యాయమూర్తి బెచు కురియన్ థామస్ కూడా పిల్లలు ఏకాభిప్రాయంతో సంబంధం కలిగి ఉన్నప్పటికీ, పోక్సో చట్టంలో తెలిపిన చట్టపరమైన నిబంధనల గురించి తెలియకపోవడం పట్ల ఆందోళన వ్యక్తం చేశారు. ఇందుకు సంబంధించి తాము తీసుకున్న చర్యలను ఎస్‌సీఈఆర్‌టీ కోర్టుకు తెలియజేసింది. POCSO చట్టంపై అవగాహనను పెంచేందుకు పాఠ్యాంశాల్లో చేర్చడానికి ప్రయత్నాలు చేశామని, సంబంధిత పాఠ్యపుస్తకాలను రూపొందించే ప్రక్రియ ఆగస్టులో ప్రారంభమవుతుందని భావిస్తున్నట్టు SCERT తరపు న్యాయవాది తెలిపారు.
ఈ పాఠ్యపుస్తకాలను తగిన ప్రాముఖ్య, సున్నితత్వంతో నిర్వహించే నిపుణులచే తయారుచేస్తారని SCERT ఉద్ఘాటించింది. ప్రత్యేకంగా I, III, V, VI, VIII, IX తరగతి విద్యార్థుల కోసం 2024-2025 విద్యా సంవత్సరం నుంచి పాఠ్యాంశాల్లో చేర్చి.. POCSO చట్టంపై అవగాహనను కల్పిస్తామని SCERT కోర్టుకు హామీ ఇచ్చింది. II, IV, VII, X తరగతుల వారికి 2025-2026 విద్యా సంవత్సరం నుంచి ఈ విధానం అమలులోకి వస్తుంది. పాఠ్యాంశాల్లో సవరణ తర్వాత ఉపాధ్యాయులచే వర్క్‌షాప్‌లు నిర్వహిస్తారు. రాష్ట్ర ప్రభుత్వం ఈ ఏడాది ప్రారంభంలో మేలో పోక్సో అవగాహన అంశంపై ఉపాధ్యాయులకు ఒకరోజు శిక్షణను నిర్వహించింది. ఈ విషయంలో రాష్ట్ర ప్రభుత్వం, SCERT, KELSA చేపట్టిన ప్రయత్నాలను కేరళ హైకోర్టు గుర్తించి, ప్రశంసించింది.
