- కరోనా కట్టడిలో కేరళ అప్పుడు బెస్ట్.. ఇప్పుడు కేసుల్లో హయ్యెస్ట్
- దేశంలోని రోజువారీ కేసుల్లో 31% రాష్ట్రంలోనే..
- వ్యాక్సినేషన్ ఎక్కువగా జరిగినా తగ్గని మహమ్మారి
- ముప్పున్నోళ్లు ఎక్కువగా ఉండడం వల్లేనంటున్న నిపుణులు
- అన్‌లాక్‌తో జనాల్లో నిర్లక్ష్యం
న్యూఢిల్లీ: ‘కరోనా కట్టడిలో కేరళను అన్ని రాష్ట్రాలూ ఆదర్శంగా తీసుకోవాలె’.. కరోనా దేశంలోకి ఎంటరై కల్లోలం మొదలుపెట్టినప్పుడు నిపుణులు చెప్పిన మాటిది. అంతెందుకు, డబ్ల్యూహెచ్వో కూడా ఆ రాష్ట్రాన్ని మెచ్చుకోకుండా ఉండలేకపోయింది. కానీ, ఇప్పుడు పరిస్థితి వేరు. సీన్ రివర్స్ అయింది. 2 నెలలుగా అన్ని రాష్ట్రాల్లోనూ కేసులు తగ్గిపోతున్నా.. కేరళలో మాత్రం తగ్గట్లేదు. స్టడీగా పెరుగుతూనే ఉన్నాయి. దేశంలో నమోదవుతున్న కేసుల్లో దాదాపు 33% దాకా కేరళలోనే ఉన్నాయి. దేశంలో కరోనాకు ఎపిసెంటర్గా ఉన్న మహారాష్ట్ర, కర్నాటకను మించి నమోదవుతున్నాయి. అన్ని రాష్ట్రాల్లోనూ 5 వేల లోపే కేసులొస్తున్నా.. కేరళలో నెలరోజులుగా 10 వేలకు తగ్గట్లేదు. దేశంలో శుక్రవారం 42,766 కేసులు నమోదైతే.. ఒక్క కేరళలోనే 13,563 మంది దాని బారిన పడ్డారు. అంటే 31.7% కేసులు ఆ రాష్ట్రానివే. 3.46 కోట్ల జనాభా ఉన్న ఆ రాష్ట్రంలో ఇప్పటికే 1,56,54,276 మందికి టీకా వేశారు. అంటే దాదాపు 45% మందికి వ్యాక్సిన్ అందింది. అందులో 2 డోసులూ తీసుకున్నోళ్లు 41,16,247 మంది దాకా ఉన్నారు. ప్రస్తుతం కేరళలో 30.53 లక్షల మందికిపైగా కరోనా బారిన పడ్డారు. 14,489 మంది చనిపోయారు. యాక్టివ్ కేసులు 1,15,231 ఉన్నాయి. కేసులు, యాక్టివ్ కేసుల్లో మహారాష్ట్ర తర్వాత కేరళే ఉంది. అయితే, అక్కడ కరోనా ఎందుకు కంట్రోల్ కావట్లేదన్నదే ఇప్పుడు తలెత్తుతున్న ప్రశ్న. దానికి నిపుణులు, వైరాలజిస్టులు చెబుతున్న కారణాలివీ!
ముప్పున్నోళ్లు ఎక్కువ
దేశంలోని మిగతా రాష్ట్రాలతో పోలిస్తే కేరళలో ముప్పున్న ప్రజలు ఎక్కువని నిపుణులు చెబుతున్నారు. దాని వల్లే కరోనా కంట్రోల్లోకి రావట్లేదంటున్నారు. ఫస్ట్వేవ్లో కేరళ కరోనాను బాగా కట్టడి చేసిందని, అప్పుడు కరోనా సోకని వాళ్లు ఇప్పుడు దాని బారిన ఎక్కువగా పడుతున్నారని ఫిజీషియన్ డాక్టర్ స్వప్నిల్ పారిఖ్ చెప్పారు. బ్రిటన్, థాయ్లాండ్, ఇండోనేసియా, తైవాన్లో ఇదే పరిస్థితి ఉందని చెప్పారు. ముప్పున్నోళ్లు ఎక్కువగా ఉండడం, కరోనా రూల్స్ను పాటించకపోవడం వల్లే కేసులు పెరుగుతున్నాయని దేశ కరోనా జీనోమిక్స్ కన్సార్టియం మాజీ హెడ్, వైరాలజిస్ట్ డాక్టర్ షాహిద్ జమీల్ అన్నారు.
పల్లెల్లోనూ టెస్టులు
కేరళలో పట్నాలు, పల్లెలు అని తేడాలేకుండా సమా నంగా టెస్టులు చేస్తున్నారని, దీంతో కేసులు ఎక్కువగా నమోదవుతున్నాయని ఎపిడెమియాలజిస్ట్ డాక్టర్ చంద్రకాంత్ లహారియా చెప్పారు. ప్రస్తుతం సగటున రోజూ 1.30 లక్షల టెస్టులు చేస్తున్నారని, దానిని 2 లక్షలకు పెంచితే కరోనా కట్టడికి అవసరమైన చర్యలు తీసుకోవచ్చని డాక్టర్ సల్ఫీ నూహు అన్నారు. మిగతా రాష్ట్రాలతో పోలిస్తే కేరళలో జనసాంద్రత ఎక్కువ కావడం కూడా కేసులు పెరగడానికి కారణమేనని చెప్తున్నారు.
పాజిటివిటీ రేటు 10 శాతంపైనే
శుక్రవారం రాష్ట్రంలో 1,30,424 టెస్టులు చేశారు. ఆ లెక్కన 10.11% మందికి కరోనా సోకిం దని తేలింది. అదే దేశ సగటు పాజిటివిటీ రేటు 2.43%. నిజానికి కరోనా కేసులు తగ్గుముఖం పడుతున్న క్రమంలో జూన్1న అక్కడ 19,760 కేసులు నమోదయ్యాయి. ఆ తర్వాత కొద్దికొద్ది గా తగ్గి.. జూన్ 10న 14,424 కేసులొచ్చాయి. కానీ, అప్పటి నుంచి ఇప్పటిదాకా 11 వేల నుంచి 13 వేల మధ్యే కేసులు నమోదవుతున్నాయి.
