- రాఘవ వస్తే ప్రచారానికి రామంటున్న కౌన్సిలర్లు
- వారం రోజులుగా ప్రచారానికి దూరం
భద్రాద్రికొత్తగూడెం, వెలుగు : కొత్తగూడెం బీఆర్ఎస్ అభ్యర్థి, ఎమ్మెల్యే వనమా వెంకటేశ్వరరావుకు ప్రచారంలో స్థానిక కౌన్సిలర్లు సహకరించడం లేదు. మున్సిపాలిటీ చైర్మన్ కె. సీతాలక్ష్మితో పాటు బీఆర్ఎస్ కౌన్సిలర్లు వారం రోజులుగా సహాయ నిరాకరణ పాటిస్తూ పార్టీలో కలకలం సృష్టిస్తున్నారు. వనమా కొడుకు రాఘవ, ఇతర మండలాల ప్రజాప్రతినిధులు ప్రచారానికి వస్తే తాము రాబోమని స్పష్టం చేస్తున్నారు.
పార్టీ నుంచి సస్పెండ్ అయిన వాళ్లు తమ మీద పెత్తనం చెలాయించడమేంటని ప్రశ్నిస్తున్నారు. కొత్తగూడెం టౌన్లో ఎన్నికల ప్రచారానికి వనమాతోపాటు నియోజకవర్గ ఇన్చార్జి వద్దిరాజు మాత్రమే రావాలంటూ కౌన్సిలర్లు పార్టీకి అల్టిమేటం జారీ చేశారు.
సీక్రెట్ మీటింగ్స్..
మున్సిపాలిటీలో 36 వార్డులకు గానూ 25 మంది బీఆర్ఎస్ కౌన్సిలర్లు ఉన్నారు. ఇందులో ఎక్కువ మంది ప్రజాప్రతినిధులు నిన్న మొన్నటి వరకు ఎమ్మెల్యే వనమా వెంకటేశ్వరరావు, ఆయన కొడుకు వనమా రాఘవతో పాటు కొందరు బీఆర్ఎస్ నేతలు చెప్పిందే వేదంగా విన్నారు. కానీ వారం రోజులుగా సహాయ నిరాకరణ చేస్తుండడం సర్వత్రా చర్చానీయాంశంగా మారింది. మున్సిపల్ చైర్మన్తో పాటు కౌన్సిలర్లంతా ఇటీవలి కాలంలో పట్టణంలోని పవర్ హౌజ్ బస్తీలో ఒక సారి, చైర్మన్ ఇంట్లో మరోసారి సీక్రెట్ మీటింగ్పెట్టుకున్నారు.
టౌన్లో ఎమ్మెల్యే ప్రచారం చేసే టైంలో ఆయన కొడుకు రాఘవ, జడ్పీ వైస్ చైర్మన్, ఎంపీపీలు, ఆత్మ కమిటీ చైర్మన్, వ్యవసాయ మార్కెట్ కమిటీ చైర్మన్తో పాటు ఇతరత్రా టౌన్తో సంబంధం లేని నాయకులు రావద్దంటూ నిర్ణయించారు. వారందరితో కలిసి వస్తే తాము ప్రచారానికి రాబోమని ఖరాఖండిగా చెప్పారు. టౌన్ నేతలతో పాటు తామే వార్డుల్లో ఎమ్మెల్యే గెలుపు కోసం ప్రచారం చేస్తామని చెబుతున్నారు. నియోజకవర్గ ఇన్చార్జి వద్దిరాజుకు తాము ఎదుర్కొంటున్న ఇబ్బందులను వివరించామని ప్రజాప్రతినిధులు చెబుతున్నారు.
వెహికల్స్ ద్వారానే ప్రచారం
వారం రోజులుగా కొత్తగూడెం పట్టణంలోని బస్తీల్లో బీఆర్ఎస్ ఇంటింటి ప్రచారం కరువైంది. కేవలం వెహకల్స్ ద్వారానే ప్రచారం కొనసాగుతోంది. చైర్మన్తో పాటు కౌన్సిలర్లు సహాయ నిరాకరణ చేస్తున్నప్పటికీ ఎమ్మెల్యేతో పాటు ఆయన కొడుకు, ఇతరత్రా లీడర్లు వారితో చర్చలు జరిపేందుకు ముందుకు రాకపోవడం పట్ల మరింత సీరియస్గా ఉన్నారు. కొత్తగూడెంలో బీఆర్ఎస్ పార్టీకి సంబంధించి ఏ చిన్న కార్యక్రమం జరిగినా ఎమ్మెల్యేతో పాటు ఆయన కొడుకు రాఘవ, ఒకరిద్దరు నేతలు తప్పనిసరిగా అటెండ్ అవుతుంటారు.
వారు లేకుండా ఎటువంటి పార్టీ కార్యక్రమం ఇప్పటి వరకు జరిగిన దాఖలాలు లేవు. కాగా రెండు రోజుల కింద సీపీఐ నుంచి ఐదుగురు కౌన్సిలర్లు హైదరాబాద్లో కేటీఆర్ సమక్షంలో బీఆర్ఎస్లో చేరారు. వీరిని పార్టీలోకి ఆహ్వానిస్తూ కొత్తగూడెంలో ఏర్పాటు చేసిన ఒక ప్రోగ్రామ్ లోఎమ్మెల్యే, ఆయన కొడుకు రాఘవ లేకుండా మొదటి సారిగా చైర్మన్, కౌన్సిలర్లు పట్టణంలోని జిల్లా పార్టీ ఆఫీస్లో ప్రెస్మీట్ పెట్టడం గమనార్హం.
