వీకెండ్ అయినా.. ఇంటికి ఎవరైనా అతిథులు వచ్చినా.. సమ్థింగ్ స్పెషల్గా ఏదైనా యాక్టివిటీ చేయాలి అనుకుంటారు. అలాగే వారికి కొత్త రుచులను తినిపించాలనుకుంటారు. అలాంటా వారు పోహా(అటుకులతో) వెరైటీ ఫుడ్ ట్రై చేయవచ్చు. అలాంటివాళ్ల కోసమే ఈ వారం పోహా వెరైటీ స్పెషల్స్...
పోహాతో కుర్కురే తయారీకి కావలసినవి
- పోహా - పావు కిలో
- ఆలుగడ్డలు - రెండు
- జీలకర్ర, కారం - ఒక టీస్పూన్
- ఉప్పు - సరిపడా
- బేకింగ్ సోడా - చిటికెడు
- ఆమ్చూర్ పొడి,చాట్ మసాలా, చక్కెర పొడి - ఒక్కోటి అర టీస్పూన్
తయారీ విధానం:ఒక గిన్నెలో పోహా వేసి, నీళ్లు పోసి కడిగి కొన్ని నీళ్లు పోసి నానబెట్టాలి. ఒక గిన్నెలో ఉడికించిన ఆలుగడ్డల్ని తురమాలి. అందులో నానబెట్టిన పోహా వేసి కలపాలి. ఆ మిశ్రమంలో జీలకర్ర, ఉప్పు, బేకింగ్ సోడా వేయాలి. ఆ తర్వాత ఒక కవర్లో పెట్టి వడియాల్లా వేసి ఎండబెట్టాలి. ఒకరోజంతా ఎండిన తర్వాత పాన్లో నూనె వేడి చేసి అందులో వేసి వేగించాలి. ఒక చిన్న గిన్నెలో ఆమ్చూర్ పొడి, చాట్ మసాలా, చక్కెర పొడి, కారం, ఉప్పు వేసి కలపాలి. ఆ మసాలాను రెడీ చేసుకున్న వాటిలో వేసి కలిపితే పోహా కుర్కురే రెడీ.
అటుకులతో కిచ్చు వంటకం తయారీకి కావాల్సినవి :
- పోహా పౌడర్ - ఒక కప్పు
- జీలకర్ర - రెండు టీస్పూన్లు
- బేకింగ్ సోడా - చిటికెడు
- కారం - అర టీస్పూన్
- ఉప్పు, నూనె - సరిపడా
- వెల్లుల్లి తరుగు - ఒక టేబుల్ స్పూన్
తయారీ విధానం : పోహాను మిక్సీ పట్టి రవ్వలాగ గ్రైండ్ చేయాలి. పాన్లో నీళ్లు పోసి బేకింగ్ సోడా వేయాలి. తర్వాత జీలకర్ర, కారం, ఉప్పు వేసి కలపాలి. ఆ మిశ్రమం తెర్లాక పోహా పౌడర్ వేసి కలపాలి. అది ఉప్మాలా అవుతుంది. ఆ మిశ్రమాన్ని చిన్న ఉండల్లా చేయాలి. సాస్ కోసం.. ఒక పాన్లో నూనె వేడి చేసి అందులో వెల్లుల్లి తరుగు వేసి అవి వేగాక కారం, ఉప్పు వేయాలి. ఈ రెండింటి కాంబినేషన్ బాగుంటుంది.
►ALSO READ | బాటిల్ వాటర్ తో నానో ప్లాస్టిక్.. పొట్టకు తిప్పలు
