‘లాలా భీమ్లా...అడవి పులి’.. వింటుంటేనే రోమాలు నిక్కపొడుచుకునే ఈ పాట పాడింది మన తెలుగబ్బాయే. పేరు అరుణ్ కౌండిన్య. కొత్త సింగరేం కాదు. గడిచిన ఏడేళ్లలో ఎన్నో సూపర్ హిట్స్ సాంగ్స్లో వినిపించింది ఇతడి గొంతు. అవన్నీ ఒక ఎత్తు అయితే.. ‘భీమ్లా నాయక్’ సినిమాలోని ఈ ఒకే ఒక్క పాటతో యమా క్రేజ్ తెచ్చుకున్నాడు. ఇండస్ట్రీలో హాట్ టాపిక్ అయ్యాడు. ఈ పాట తన కెరీర్కి బిగ్గెస్ట్ టర్నింగ్ పాయింట్ అంటున్న ఈ సింగర్ డెంటిస్ట్ కూడా.
డాక్టర్ అవ్వబోయి యాక్టర్ అయ్యామని చాలామంది చెప్తుంటారు. కానీ, ఇక్కడ అరుణ్ మాత్రం యాక్టింగ్కి బదులు సింగింగ్ని ఎంచుకున్నాడు. అలాగని ప్రొఫెషన్ని పక్కన పెట్టాలనుకోలేదు. ప్యాషన్, ప్రొఫెషన్ రెండింటిలోనూ రాణించాలనుకున్నాడు. డాక్టర్గా జనాలు బాధలు తీర్చుతూనే.. సింగర్గా వాళ్ల మనసులోని భారాల్ని తేలిక చేయాలనుకున్నాడు. ఆ విషయంలో సక్సెస్ అయ్యాడనే చెప్పొచ్చు. మరి రెండింటినీ బ్యాలెన్స్ చేయడం కష్టం అవ్వలేదా? అని అడిగితే ఇష్టం ఉన్న చోట కష్టానికి చోటు ఎక్కడిది అంటున్నాడు. కానీ, ప్రస్తుతం ఫోకస్ అంతా సింగింగ్పైనే ఉందంటూ తన ఏడేళ్ల మ్యూజిక్ జర్నీలోని అప్స్ అండ్ డౌన్స్ గురించి చెప్పడం మొదలుపెట్టాడు.
నాలుగేళ్లకే మ్యూజిక్ క్లాస్
నేను పాడగలను అని మొదట గుర్తించింది మా అమ్మానాన్న. వాళ్లూ సంగీతంలోనే పుట్టి, పెరిగారు. నాన్న ఎయిర్ఫోర్స్ ఉద్యోగి. సింగర్ కమ్ గిటారిస్ట్ కూడా. అమ్మ కూచిపుడి డాన్సర్. మా పెదనాన్న ఆల్ ఇండియా రేడియోలో హార్మోనియం వాయించేవాళ్లు. ఇంకా నాన్న తరపు బంధువుల్లో చాలామందికి సంగీతంలో అనుభవం ఉంది. దాంతో నాక్కూడా సంగీతం నేర్పించాలనుకున్నారు అమ్మానాన్న. అలా నాలుగేళ్ల వయసులోనే మా స్కూల్ మ్యూజిక్ టీచర్ సుభాషిణిగారి దగ్గర కర్ణాటక సంగీతంలో చేర్పించారు. అదంతా నాకు ఊహ తెలియకముందు జరగడంతో ఏం గుర్తులేదు. కానీ, కాస్త జ్ఞాపకం వచ్చాక అందరూ ‘‘బాగా పాడుతున్నావ్’’ అని చెప్పడంతో ఇంకా బాగా పాడాలన్న పట్టుదల వచ్చింది.
ఆ తరువాత లక్ష్మీ సుబ్రహ్మణ్యం గారి దగ్గర కర్ణాటక సంగీతంలో చేరా. అదే టైంలో రామాచారి గారి దగ్గర లైట్ మ్యూజిక్ నేర్చుకున్నా. చుట్టుపక్కల ఏ మ్యూజిక్ కాంపిటీషన్ జరిగినా పార్టిసిపేట్ చేసేవాడ్ని. బోలెడు ప్రైజ్లు కూడా గెలుచుకునేవాడ్ని. టీవీ షోలలోనూ పార్టిసిపేట్ చేశా. మాటీవీ ‘పాడాలని వుంది’ లో నేను పాడిన ‘చూడాలని వుంది’ సినిమాలోని ‘యమహా నగరి...’ పాట బాలుగారికి చాలా బాగా నచ్చింది. అది విన్నాక ‘ఫ్యూచర్లో నువ్వు పెద్ద సింగర్ అవుతా’వు అన్నారాయన . ఆ తర్వాత మరో ఎపిసోడ్లో ‘రవి వర్మకే అందని ఒకే ఒక అందానివో..’ పాట పాడా. ఆ పాట బాలుగారికి ఎంతలా నచ్చిందంటే.. ఆయనే స్వయంగా స్టేజ్ మీదకి వచ్చి నన్ను హగ్ చేసుకున్నారు. అవన్నీ నా సింగింగ్పై నాకు కాన్ఫిడెన్స్ పెంచాయి. మ్యూజిక్ వైపు మరిన్ని అడుగులు వేయించాయి. కానీ, చదువు వల్ల కొన్నాళ్లు మ్యూజిక్ని పక్కనపెట్టక తప్పలేదు.
ప్యాషన్.. ప్రొఫెషన్..
మ్యూజిక్ అంటే ఎంతిష్టమో.. చదువన్నా అంతే శ్రద్ధ నాకు. అందుకే చిన్నప్పట్నించీ రెండింటిలో ఏదో ఒకటి ఎంచుకోవాల్సిన పరిస్థితి రానివ్వలేదు. కానీ, గ్రాడ్యుయేషన్కి వచ్చేసరికి..రెండింటిలో ఏదో ఒకటి వదులుకోవాల్సి వచ్చింది. ఆ టైంలో అందరి పేరెంట్స్లాగే మా అమ్మానాన్నలకి కూడా ఎడ్యుకేషన్ ఇంపార్టెంట్ అనిపించింది. నాక్కూడా డాక్టర్ అవ్వాలని బలంగా ఉండటంతో బీడిఎస్( బ్యాచిలర్ ఆఫ్ డెంటల్ సర్జరీ) లో చేరాలనుకున్నా. దానికోసం ఖమ్మంలోని మమత మెడికల్ కాలేజీకి వెళ్లా. దాంతో మ్యూజిక్ క్లాస్లకి బ్రేక్ పడింది. ఆ తరువాత రెండేళ్లు పీజీ. ఒక సంవత్సరం ప్రాక్టీస్. అలా దాదాపుగా ఎనిమిదేళ్లు మ్యూజిక్కి దూరమయ్యా. కానీ వీకెండ్స్, సెలవుల్లో హైదరాబాద్ వచ్చినప్పుడు రామాచారిగారి దగ్గర మ్యూజిక్ పాఠాలు వినేవాడ్ని.
మళ్లీ మ్యూజిక్ వైపు..
నేను కలలు కన్న డాక్టర్ పట్టా వచ్చింది.. సంవత్సరం ప్రాక్టీస్ తర్వాత ఫ్రెండ్స్తో కలిసి హైదరాబాద్లో క్లినిక్ కూడా తెరిచా. కానీ, చిన్నప్పట్నించీ నేర్చుకున్న మ్యూజిక్ని వదల్లేకపోయా. అప్పటికే చిన్నప్పుడు నాతో పాటు ఎల్ఎమ్ఏ( లిటిల్ మ్యుజీషియన్స్ అకాడమీ) లో మ్యూజిక్ నేర్చుకున్న గీతామాధురి, కృష్ణ చైతన్య, కారుణ్య, హేమచంద్ర సినిమాల్లో పాడుతున్నారు. వాళ్లందర్నీ చూశాక నా మనసు కూడా మ్యూజిక్ వైపు లాగింది. కానీ, ఈ విషయం ఇంట్లో చెప్తే వద్దన్నారు. క్లినిక్ వదిలేసి.. ‘అవకాశాలు ఎప్పుడు వస్తాయో.. అసలు వస్తాయో లేదో తెలియని ఫీల్డ్కి ఎందుకు ’అన్నారు. కష్టపడి వాళ్లని ఒప్పించి ఇండస్ట్రీకి వచ్చా. వైజర్సు సుబ్రహ్మణ్యం గారి దగ్గర మ్యూజిక్లో చేరా. సినిమాలకి డెమోలు ఇవ్వడం మొదలుపెట్టా. ఆ టైంలో మ్యూజిక్ డైరెక్టర్ కోటి చాలా సపోర్ట్ ఇచ్చారు. ఆయన జడ్జిగా ఉన్న ‘బోల్ బేబి బోల్’కి మెంటార్గా అవకాశం ఇచ్చారు. ఆ షో తరువాత సీజన్లో కంటెస్టెంట్గానూ కనిపించా. అవన్నీ నాలో మరింత కాన్ఫిడెన్స్ పెంచాయి. అప్పుడే అనూప్ రూబెన్స్, కీరవాణి, తమన్.. ఇలా అందరి మ్యూజిక్ డైరెక్టర్స్కి రెగ్యులర్గా కోరస్లు పాడటం మొదలుపెట్టా.
అన్నీ సెట్ అవ్వవు..
‘టెంపర్’ సినిమాలోని ‘ఇట్టాగె రెచ్చిపోదాం..’ నేను పాడిన మొదటి పాట. గీతామాధురి, ధనుంజయ్తో కలిసి పాడిన ఆ పాట తర్వాత చాలా హిట్ సినిమాలకి కోరస్లు పాడా. ‘కేజీఎఫ్, బాహుబలి, ఆర్ఆర్ఆర్’ లాంటి పెద్దపెద్ద సినిమాలకి గ్రూప్ సింగర్గా పనిచేశా. కానీ, సోలో సింగర్గా నేను అనుకున్న బ్రేక్ రాలేదు. కొన్ని పాటలకి నా వాయిస్ సెట్ అయ్యేది కాదు.. అది ఓకే అనుకుంటే హీరోకి నా వాయిస్ సెట్ అయ్యేది కాదు. ఇలా అన్నీ చేజారిపోయేవి. కానీ, ఎప్పుడూ డిజప్పాయింట్ అవ్వలేదు. ట్రాక్స్, కోరస్లు పాడుతూ నన్ను నేను ఇంప్రూవ్ చేసుకునే ప్రయత్నం చేశా. ఆ ప్రయత్నాలన్నీ ఫలించి ఒకరోజు మ్యూజిక్ డైరెక్టర్ తమన్ నుంచి పిలుపు వచ్చింది.
‘లాలా భీమ్లా..’ పాటకి శ్రీకృష్ణ అన్న నన్ను సజెస్ట్ చేశాడు. అది సోలో సింగర్ పాట అని తెలియదు నాకు.‘ భీమ్లా నాయక్’ సినిమా కోసం అని కూడా ఊహించలేదు. కోరస్ కోసం పిలిచారు అనుకుని స్టూడియోకి వెళ్లా. కానీ, అక్కడ మిగతా సింగర్స్ ఎవరూ కనపడలేదు. గ్లింప్స్ పాడాలని లిరిక్ పేపర్ ఇచ్చారు. అందులో లాలా భీమ్లా అని లిరిక్ చూశాక ఆ పాట ఈ సినిమా కోసమని అర్థమైంది. పాడి వచ్చేశా. అది ఒకే అయితే బాగుండు అన్న హోప్ ఉంది గానీ.. మనసులో ఏదో ఒక మూల టెన్షన్. తీరా గ్లింప్స్ రిలీజ్ అయ్యాక నా గొంతే ఉండటంతో చాలా హ్యాపీ ఫీలయ్యా. దానికి మంచి రీచ్ రావడంతో ఫుల్ సాంగ్ చేయాలనుకుంది టీమ్. అది కూడా నాతోనే పాడించడం.. పైగా ఆ సాంగ్ వీడియోలోనూ నన్ను భాగం చేయడం నా కెరీర్కి బాగా హెల్ప్ అయింది. ఆ సాంగ్ బయటికొచ్చాక ఇండస్ట్రీలోని చాలామంది మెచ్చుకున్నారు.
ఏడేండ్ల కష్టానికి...
సోలో సింగర్గా ఇప్పటివరకు దాదాపు ఇరవై పాటలు పాడా. వందల పాటలకి కోరస్ ఇచ్చా. కంటిన్యూస్గా ఇండస్ట్రీలో పని ఉంటుంది. కానీ, నా హార్డ్ వర్క్కి తగ్గ గుర్తింపు లేదు. సింగర్గా నన్ను నేను నిరూపించుకునే సాంగ్స్ రాలేదు. కానీ, ఏరోజూ కాన్ఫిడెన్స్ కోల్పోలేదు. కచ్చితంగా నాకంటూ ఒకరోజు వస్తుందని నమ్మా. ఏడేండ్లకి ‘లాలా.. భీమ్లా’ ద్వారా నేను కోరుకున్న గుర్తింపు వచ్చింది. సింగర్గా వందశాతం సక్సెస్ అయ్యానని నేను చెప్పను. నిజానికి ఇప్పుడే నా మ్యూజిక్ కెరీర్ మొదలైంది. ఇన్నాళ్లు ఈ రోజు కోసం ప్రాక్టీస్ చేశాను అంతే. ఈ సంవత్సరంలో దగ్గర దగ్గర పదిహేను నుంచి ఇరవై పాటలు రిలీజ్ అవ్వబోతున్నాయి. వాటిల్లో మెలొడీలతో పాటు హీరో ఇంట్రడక్షన్, మాస్ సాంగ్స్ కూడా ఉన్నాయి. తెలుగుతో పాటు తమిళ, కన్నడలో కూడా సాంగ్స్ పాడుతున్నా. అయితే ఇవన్నీ ఎంత సంతోషాన్ని ఇస్తున్నా.. మా అమ్మ నా సక్సెస్ని చూడలేకపోయారన్న బాధ ఉంది. పోయిన ఏడాది అమ్మ మమ్మల్ని వదిలి వెళ్లిపోయింది.
ఆటలు కూడా ఆడతా
పాటలతో పాటు ఆటల్లోనూ ముందుంటా నేను. క్రికెట్, టెన్నిస్ బాగా ఆడతా. ఆవకాయ, పెరుగన్నం నా ఆల్ టైం ఫేవరెట్ ఫుడ్. బాలుగారి పాటలంటే చాలా ఇష్టం. రికార్డింగ్స్ లేకపోతే నా భార్య మైథిలితోనే టైం గడిపేస్తా. నా బెస్ట్ ఫ్రెండ్స్ అంతా ఇండస్ట్రీలోని సింగర్సే. వాళ్లతో వీకెండ్స్ జాలీగా స్పెండ్ చేస్తా. అప్పుడప్పుడు నా క్లినిక్కి కూడా వెళ్తుంటా. ఫ్యూచర్లో అందరికీ నచ్చే పాటలు పాడతానన్న నమ్మకంతో ఉన్నా.
::: ఆవుల యమున
