న్యూఢిల్లీ: గ్లోబల్ టెక్ కంపెనీల్లో తొలగింపులు విపరీతంగా పెరుగుతున్నాయి. అమెజాన్, ట్విటర్, మెటా వంటివి వేలల్లో ఉద్యోగులను తొలగించాయి. ఇలాంటి వారిని ఆదుకోవడానికి అమెరికా ఆధారిత వెంచర్ ఫర్మ్ డే వన్ వెంచర్స్ ఒక ప్రోగ్రామ్ను ప్రారంభించింది. "ఫండెడ్ నాట్ ఫైర్డ్" పేరుతో ఈ కార్యక్రమాన్ని మొదలుపెట్టింది. టెక్ క్రంచ్ రిపోర్టు ప్రకారం ఈ సంస్థ సంవత్సరాంతానికి 20 స్టార్టప్ టీమ్లకు 100,000 డాలర్ల చెక్కులను (సుమారు రూ.81 లక్షలు) ఇస్తుంది. టాప్ బిజినెస్లు తమ ప్రీ-సీడ్ రౌండ్ కోసం మిలియన్ డాలర్ల చెక్ను పొందవచ్చు. మెటా, ట్విటర్, అమెజాన్ వంటి కంపెనీలు తొలగించిన ఉద్యోగులకు మద్దతుగా 52.5 మిలియన్ డాలర్ల ఫండ్ నుండి ఐదు మిలియన్ డాలర్లను (గరిష్టంగా డాలర్ల10 మిలియన్లు) కేటాయిస్తుంది. రష్యాలో రాజకీయవేత్తగా టీవీ రిపోర్టర్గా పనిచేసిన డే వన్ వెంచర్స్ ఫౌండర్ మాషా బుచెర్ మాట్లాడుతూ ఉద్యోగం పోయినవారిలో కనీసం 0.1 శాతం నుండి ఒక శాతం మంది సక్సెస్ఫుల్ ఫౌండర్లు అవుతారని అన్నారు. ఇది "ఒక సేవా కార్యక్రమం కాదు" కానీ సీరియస్ వ్యాపారం అని బుచెర్ స్పష్టం చేశారు.
డే వన్ వెంచర్స్తోపాటు జెడ్ ఫెలోస్, క్లియో క్యాపిటల్ కూడా మాజీ ఉద్యోగులకు సాయం చేస్తున్నాయి. అమెజాన్సహా పలు హై- ప్రొఫైల్ కంపెనీలలో ఉద్యోగాల కోత వేగవంతమైంది. ఈ వారంలో 10,000 మందిని తొలగిస్తామని అమెజాన్ ప్రకటించింది. ఇతర టెక్ దిగ్గజాలు, స్టార్టప్లు కూడా పొదుపు చర్యలను ప్రకటించాయి. ఆన్లైన్ చెల్లింపు సంస్థ స్ట్రైప్ కార్- హెయిలింగ్ యాప్ ‘లిఫ్ట్’ కూడా ఇటీవల ఉద్యోగులను తొలగించింది. లిఫ్ట్, మెటా తమ వర్క్ఫోర్స్లో 10 శాతం పైగా తగ్గించుకున్నాయి. ఎలన్ మస్క్ తాజాగా కొనుగోలు చేసిన ట్విట్టర్, ఈ నెల ప్రారంభంలో దాని 7,500 మంది ఉద్యోగులలో సగం మందిని తొలగించింది. కన్సల్టింగ్ సంస్థ ఛాలెంజర్, గ్రే & క్రిస్మస్ ప్రకారం, ఈ నెలలో ఇప్పటివరకు, టెక్నాలజీ కంపెనీలు 31,200 మంది ఉద్యోగాలను తొలగించే అవకాశం ఉంది.