న్యూఢిల్లీ: త్వరలో రాబోయే తన ఐపీఓకు రిటైల్ ఇన్వెస్టర్ల నుంచి భారీగా డిమాండ్ ఉంటుందని ఎల్ఐసీ అంచనా వేస్తోంది. మనదేశంలో ప్రతి ఏడుగురు ఇన్వెస్టర్లలో కనీసం ఒకరైనా ఇన్వెస్ట్ చేస్తారన్నది ఈ కార్పొరేషన్ అంచనా. పాలసీ హోల్డర్లు కూడా భారీగా ఇన్వెస్ట్ చేస్తారని భావిస్తోంది. కనీసం కోటి మంది ఇష్యూకు దరఖాస్తు చేయాలని కోరుకుంటోంది. రిటైల్ పోర్షన్ ద్వారా రూ.25 వేల కోట్ల వరకు వస్తాయని అంచనా. ఒక్కో షేర్ లాట్ సైజు రూ.30వేలు–40 వేల మధ్య ఉంటుందని తెలుస్తోంది. ప్రభుత్వ అంచనాల ప్రకారం భారతదేశంలో 7.38 కోట్ల డీమ్యాట్ ఖాతాదారులు ఉన్నారు. ఐపీఓ కోసం దరఖాస్తు చేసుకోవడానికి పాలసీదారులు కూడా డీమాట్ ఖాతాలు తెరవడంతో మొత్తం డీమ్యాట్ ఖాతాదారుల సంఖ్య ఇప్పటికి దేశంలో ఎనిమిది కోట్లకు చేరుకుందని అంచనా. ఈ కార్పొరేషన్ తన పాలసీదారుల కోసం 10 శాతం షేర్లను రిజర్వ్ చేస్తున్నట్టు ఇది వరకే ప్రకటించింది. మార్చి నెలాఖరులోగా ఎల్ఐసీ తన ఐపీఓను ప్రారంభించే అవకాశం ఉంది. గ్రామీణ ప్రాంతాల నుంచి భారీ రెస్పాన్స్ వస్తుందని అనుకుంటున్నామని ఐఐఎఫ్ఎల్ ఎగ్జిక్యూటివ్ వైస్–ప్రెసిడెంట్ సువజిత్ రాయ్ అన్నారు. ఇందుకోసం ఇన్వెస్ట్మెంట్ బ్యాంకర్లు, లోకల్ బ్రోకర్లు, ఏజెంట్లు ప్రచారం చేస్తారని చెప్పారు. గత ఏడాది మార్చి వరకు లెక్కల ప్రకారం ఎల్ఐసీకి 13.5 లక్షల మంది ఏజెంట్లు, 1.14 లక్షల మంది ఉద్యోగులు ఉన్నారు.
