భౌతిక పుస్తకాలు నిజంగా స్క్రీన్ల కంటే మెదడును ఎక్కువగా నిమగ్నం చేస్తాయా? ప్రింట్ ఇప్పటికీ ఎందుకు ముఖ్యమో అందరూ గ్రహించాలి. మనం చదివే పుస్తకాల కంటే మన స్క్రీన్లు చాలా ప్రకాశవంతంగా ఉంటాయి.
ఒక బటన్ క్లిక్ చేస్తే అవి మనకు రంగుల వీడియోలను చూపించగలవు. కానీ అవి మన మెదడులను కూడా వెలిగించగలవా? భౌతిక పుస్తకాలు చదవడం గతకాలపు అవశేషంగా మారుతుందని కొందరు తెలిపారు. అంతేకాకుండా, పుస్తకాలను ఎలక్ట్రానిక్గా చదవడం ప్రమాణంగా మారుతుందని వారు అభిప్రాయపడ్డారు.
ఈ అంచనాలు పూర్తిగా తప్పు కావు. కిండిల్స్, కోబోస్ బాగా ప్రాచుర్యం పొందాయి. కానీ, భౌతిక పుస్తకాలు ఎక్కడికీ వెళ్ళడం లేదు. మీ వేలికొనలకు ఏదైనా డౌన్లోడ్ చేసుకునే ఎంపిక ఉన్నప్పటికీ, ప్రజలు ఇప్పటికీ తమ స్థానిక పుస్తకాల షాపులకు లేదా సెకండ్ హ్యాండ్ దుకాణాలకు వెళ్లి ఒక భౌతిక నవలను లేదా పుస్తకాన్ని కొనుగోలు చేయడాన్ని ఎంచుకుంటున్నారు.
మన మెదళ్లు ప్రశాంతంగా ఉండాలి
మన మెదళ్లను ప్రశాంతంగా ఉంచడం ద్వారా మన జీవితాల్లోని ఒత్తిడి నుంచి మనల్ని మనం విడిపించుకోవచ్చు. ఒక ముద్రిత పుస్తకాన్ని తీసుకోవడం వలన మన మనసుకు ఆ అరుదైన శాంతి క్షణం లభిస్తుంది. ఒక అరుదైన క్షణం మనం ఊపిరి పీల్చుకోవచ్చు. చివరకు ఒకే విషయంపై ఏకాగ్రత చూపవచ్చు. పుస్తకాలు మనల్ని స్క్రీన్ల నుంచి దృష్టి మరల్చడాన్ని సున్నితంగా నిరోధిస్తాయి. విషయంపై మన దృష్టిని పెంచుతాయి.
సమాచారాన్ని త్వరగా చదవడం అనే మన ప్రవృత్తికి వ్యతిరేకంగా పోరాడతాయి. యువకులు కూడా దీనికి భిన్నంగా లేరు. భౌతిక పుస్తకాల పట్ల ఆకర్షణను పంచుకుంటున్నారు. 2019లో ఒక అధ్యయనం ప్రకారం 18-–29 సంవత్సరాల వయస్సు గలవారిలో 74% మంది ఇప్పటికీ ఇ-–బుక్స్ కంటే భౌతిక పుస్తకాలను ఇష్టపడుతున్నారు. నిజమే, మీరు భౌతిక పుస్తకం కంటే డిజిటల్ బుక్ వేగంగా చదవవచ్చు.
కానీ, మన మెదడు ఎంతమేరకు విషయాన్ని నిక్షిప్తం చేసుకుంటుందనేది చెప్పడం కష్టం. మనం ఆనందం కోసం, గ్రహించడం (కాంప్రిహెన్షన్) కోసం కూడా చదువుతాం. మన మెదళ్ళు కంటెంట్తో నిమగ్నం కావాలనుకుంటాయి. మనం ఒక ఆర్టికల్ను త్వరగా చదివినప్పుడు లాగ, ఒక పుస్తకం వేగంగా ముగించడం వలన చాలా తక్కువ ఉపయోగం ఉంటుంది. తరచుగా మనకు అనేక సగం నిజాలు (హాఫ్ ట్రూత్స్) తెలిసినట్లు అవగతం అవుతుంది. చదవడం మన మెదడులోని చాలా ఎక్కువ ప్రాంతాలను ఉత్తేజపరుస్తాయి.
చదవడం అందరికీ అవసరం
డిజిటల్ ప్రపంచంలో భౌతిక పుస్తకాలు ఇప్పటికీ ముఖ్యమైనవి. చదవడం అందరికీ అవసరం. అలా అని, సాంకేతిక పురోగతి గొప్పది కాదని కాదు. పురోగతి పేరుతో మనం ఏమీ వదులుకోవడానికి సిద్ధంగా లేమని మాత్రం చెప్పొచ్చు. భౌతిక పుస్తకాలు చాలా సంవత్సరాలుగా ఉనికిలో ఉన్నాయి. మట్టి పలకల నుంచి ముద్రిత పేజీల వరకు పరిణామం చెందుతూ..చక్రవర్తులు, రాచరిక ప్రభువుల అల్మారాల్లో ఉన్నాయి. ఇప్పుడు ఆశాజనకంగా మీ ఇంట్లో కూడా ఉన్నాయి. మన ప్రపంచం ధైర్యంగా, కొంత కొత్తగా ఉండవచ్చు. కానీ, మనం పాతదాని విలువను మరచిపోలేదు.
- డా. రవి కుమార్ చేగొని,ప్రధాన కార్యదర్శి, తెలంగాణ గ్రంథాలయ సంఘం
ఓపెన్ పేజీకి వ్యాసాలు, లెటర్లు పంపాల్సిన మెయిల్ ఐడీopenpage@v6velugu.com రచయితలు ‘వెలుగు’ కు మాత్రమే పంపుతున్నామని హామీ తప్పనిసరి రాయాలి. స్వీయ రచన అయి ఉండాలి.రచన 700 పదాలకు మించరాదు.
