- 8.04 శాతానికి చేరిన ఆహార ధరల ఇన్ఫ్లేషన్
- రిటైల్ ఇన్ఫ్లేషన్@6.95 శాతం
న్యూఢిల్లీ: ఇది వరకే కరోనాతో చితికిపోయిన గ్రామాల ప్రజలకు ఇన్ఫ్లేషన్ (ధరల పెరుగుదల) రూపంలో మరో దెబ్బ తగిలింది. పోయిన ఏడాది రూరల్ ఇన్ఫ్లేషన్ విపరీతంగా పెరిగింది. ముఖ్యంగా ఊళ్లలో ఆహార ధరల ఇన్ఫ్లేషన్ పోయిన నెల 8.04 శాతానికి చేరింది. 2021 మార్చిలో ఇది 3.94 శాతం మాత్రమే ఉంది. కన్జూమర్ ఫుడ్ ప్రైస్ఇండెక్స్ (సీఎఫ్పీఐ) ఆధారంగా లెక్కించే ఆహార ధరల ఇన్ఫ్లేషన్ ఈ ఏడాది ఫిబ్రవరిలో 5.81 శాతంగా రికార్డయిందని నేషనల్ స్టాటిస్టికల్ ఆఫీస్ (ఎన్ఎస్ఓ) ప్రకటించింది. రిటైల్ ఇన్ఫ్లేషన్ ఏకంగా 17 నెలల హై అయిన 6.95 శాతానికి ఎగబాకింది. చాలా కేటగిరీల వస్తువుల ధరలు విపరీతంగా పెరిగాయి. 2022 ఫైనాన్షియల్ ఇయర్లో సీపీఐ ఇన్ఫ్లేషన్ 5.51 శాతానికి పెరిగింది. ఆర్బీఐ అంచనా 5.30 శాతం కంటే ఇది ఎక్కువే! ఫుడ్ & డ్రింక్స్‌ ఇన్ఫ్లేషన్7.47 శాతం వరకు ఉంది. వంటనూనెలు, కూరగాయలు, తృణధాన్యాలు పాలు, మాంసం చేపలు వంటి వాటి ధరలు బాగా పెరగడమే ఇందుకు కారణం. ఫిబ్రవరి వరకు మూడు నెలలపాటు తగ్గినప్పటికీ సీక్వెన్షియల్గా ఆహారాల ధరలు 1.32 శాతం పెరిగాయి. రష్యా-–ఉక్రెయిన్ వివాదం కారణంగా 'నూనెలు, కొవ్వుల' ఇన్ఫ్లేషన్ 18.79 శాతానికి పెరిగింది. వంటనూనెల ధరలు విపరీతంగా పెరిగాయి. మనకు ఉక్రెయిన్ నుంచి పొద్దుతిరుగుడు నూనె భారీగా దిగుమతి అవుతుంది. కూరగాయల ఇన్ఫ్లేషన్ మార్చిలో 11.64 శాతానికి చేరుకుంది. 'మాంసం, చేపలు' ధరలు ఫిబ్రవరితో పోలిస్తే మార్చిలో 9.63 శాతం పెరిగాయి.
సాగుకు సమస్యలు
‘‘ఖరీఫ్ నాట్ల సీజన్ ఈ ఏడాది జూన్ నుంచి మొదలవుతుంది. ఎరువుల కొరత బాగా ఉండటం వల్ల ఈసారి వ్యవసాయ రంగానికి ఇబ్బందులు ఏర్పడుతాయి. సాధారణ వర్షపాతం ఉన్నప్పటికీ రాబోయే నెలల్లో ఆహార ధరలు మరింత పెరుగుతాయి. క్రూడ్ ఆయిల్ ధరలు పెరగడం వల్ల ప్రయాణాల ఖర్చులు, అన్ని రకాల వస్తువుల ధరలు ఎక్కువ అవుతాయి ”అని రీసెర్చ్ ఫర్మ కేర్ ఎడ్జ్ ఇటీవల పేర్కొంది. ఆర్బీఐ పోయిన నెల నిర్వహించిన మానిటరీ పాలసీ మీటింగ్లో ఇన్ఫ్లేషన్ అంచనాలను 5.7 శాతానికి పెంచింది. ఇది వరకు ఇది 4.5 శాతంగా ఉండేది. ప్రపంచమంతటా నూనెలు, కమోడిటీల ధరలు పెరగడంతో ఈ నిర్ణయం తీసుకుంది ఇక నుంచి ధరల తగ్గుదలపై మరింత ఫోకస్ చేస్తామని కూడా ప్రకటించింది. ఆహార ధరలు చాలా పెరుగుతున్నాయి కాబట్టి మార్చిలో ఇన్ఫ్లేషన్ రేటు 6.35 శాతానికి చేరుతుందని ఎక్స్పర్టులు అంచనా వేశారు. ‘‘మార్చి ఇన్ఫ్లేషన్ అంచనాలకు మించి మరీ పెరిగింది. రాబోయే క్వార్టర్లో ఇన్ఫ్లేషన్ఆరు శాతం కంటే ఎక్కువే ఉండొచ్చు. అంటే వరుసగా మూడు క్వార్టర్లలోనూ రిటైల్ ఇన్ఫ్లేషన్ రేట్లు ఆర్బీఐ అంచనాల కంటే ఎక్కువ ఉంటాయన్నమాట” అని కోటక్ మహీంద్రా బ్యాంక్ సీనియర్ ఎకానమిస్ట్ ఉపాసనా భరద్వాజ్ వివరించారు.
