- ఎమ్మెల్యే గండ్ర సత్యనారాయణరావు
రేగొండ, వెలుగు : భూపాలపల్లి నియోజవర్గం ఇంటిగ్రేటెడ్ మోడల్ హబ్గా మారనుందని స్థానిక ఎమ్మెల్యే గండ్ర సత్యనారాయణరావు పేర్కొన్నారు. శనివారం జయశంకర్ భూపాలపల్లి జిల్లా రేగొండ మండల పరిషత్ కార్యాలయంలో ఏర్పాటు చేసిన జనరల్ బాడీ మీటింగ్ ముఖ్య అతిథిగా హాజరయ్యారు. ఈ సందర్భంగా ఎమ్మెల్యే మాట్లాడుతూ తెలంగాణలో కొడంగల్ తర్వాత భూపాలపల్లి మాత్రమే ఇంటిగ్రేటెడ్ మోడల్గా ఎన్నికయ్యిందన్నారు.
ఘణపురం మండలం గాంధీనగర్ క్రాస్ వద్ద ఎన్నికల కోడ్ ముగియగానే కేంద్రీయ విశ్వవిద్యాలయం, ఎడ్యుకేషన్ హబ్కు ఫౌండేషన్ సీఎం రేవంత్రెడ్డితో వేయనున్నట్లు వెల్లడించారు. అనంతరం తాగునీరు, రోడ్లు, చెరువుల పునరుద్ధరణ పనులపై అధికారులతో ఆరా తీశారు.
డీబీఎం 38 కాలువ లైనింగ్ పనులు కూడా వేగంగా పూర్తి చేయాలని అధికారులను ఆదేశించారు. కార్యక్రమంలో ఏఈ సతీశ్బాబు, డీఈలు రవికుమార్, గిరిబాబు, ఎంపీపీ పున్నం లక్ష్మి, జడ్పీటీసీ సాయిని విజయ, ఎంపీడీవో వెంకటేశ్వర్రావు, ఆర్డబ్ల్యూఎస్ ఆఫీసర్లు తదితరులు పాల్గొన్నారు.
