మహబూబాబాద్/ ములుగు, వెలుగు: ప్రజలకు మెరుగైన వైద్య సేవలు అందించాలని మహబూబాబాద్, ములుగు కలెక్టర్లు స్నేహా శబరీశ్, దివాకరవైద్యాధికారులకు సూచించారు. ప్రజా పాలన– ప్రగతి ప్రణాళికలో భాగంగా మంగళవారం వారు ఆయా జిల్లాల్లో పర్యటించారు. మానుకోట ప్రభుత్వ ఆస్పత్రిని ఆకస్మికంగా తనిఖీ చేసిన కలెక్టర్ అక్కడ అందుతున్న వైద్య సేవలపై ఆరా తీశారు. హాస్పిటల్ లో ఎలాంటి అసౌకర్యాలు లేకుండా చర్యలు తీసుకోవాలని సూచించారు. ఆక్సిజన్, అవసరమైన మందులు అందుబాటులో ఉంచుకోవాలని ఆదేశించారు.
ప్రజాపాలన - ప్రగతి ప్రణాళికలో వైద్య సేవల నిమిత్తం ప్రత్యేక క్యాంపులు నిర్వహిస్తున్నట్లు తెలిపారు. ములుగు మండలం జంగాలపల్లి, రాయినిగూడెం, కొత్తూరు, కాశిందేవిపేట గ్రామాల్లో ఆ జిల్లా కలెక్టర్ పర్యటించి, పారిశుధ్య పనులు తనిఖీ చేశారు. నర్సరీని పరిశీలించడంతోపాటు పీహెచ్సీలో అందుతున్న వైద్యసేవలను పరిశీలించారు. అనంతరం కలెక్టరేట్ ఆవరణలోని ఈవీఎం గోదామును ఆయన అడిషనల్ కలెక్టర్ మహేందర్జీ, వివిధ రాజకీయ పార్టీల ప్రతినిధులతో కలిసి తనిఖీ చేశారు. భద్రత, పర్యవేక్షణపై ఆరా తీశారు.
