మహబూబ్నగర్ అర్బన్, వెలుగు: జాతీయ గ్రామీణ ఉపాధిహామీ పథకాన్ని నిర్వీర్యం చేయడానికి కేంద్ర ప్రభుత్వం కుట్ర చేస్తోందని మహబూబ్నగర్, దేవకరద్ర ఎమ్మెల్యేలు యెన్నం శ్రీనివాస్ రెడ్డి, జి. మధుసూదన్ రెడ్డి విమర్శించారు. ఏఐసీసీ పిలుపు మేరకు ఆదివారం మహబూబ్నగర్ నగరంలోని అశోక్ టాకీస్ చౌరస్తాలో పాలమూరు డీసీసీ అధ్యక్షుడు సంజీవ్ ముదిరాజ్ అధ్యక్షత నిరసన కార్యక్రామన్ని చేపట్టారు.
ఈ కుట్రలను తిప్పికొట్టాలని పిలుపునిచ్చారు. ముందుగా గాంధీ విగ్రహానికి పూలమాలలు వేసి ఘనంగా నివాళులు అర్పించారు. కార్యక్రమంలో మైనార్టీ కార్పొరేషన్ చైర్మన్ ఒబేదుల్లా కొత్వాల్, జిల్లా గ్రంథాలయ సంస్థ చైర్మన్ మల్లు నర్సింహారెడ్డి, మార్కెట్ కమిటీ చైర్ పర్సన్ బెక్కెరి అనిత, టీపీసీసీ ప్రధాన కార్యదర్శి ఏపీ మిథున్ రెడ్డి, అధికార ప్రతినిధి జహీర్ అక్తర్, డీసీసీ ప్రధాన కార్యదర్శి సిరాజ్ ఖాద్రి, ఎన్పీ వెంకటేశ్, మాజీ మున్సిపల్ చైర్మన్ ఆనంద్ గౌడ్ పాల్గొన్నారు.
మహిళా సంఘ భవనాన్ని పూర్తి చేయాలి
మహబూబ్ నగర్ అర్బన్, వెలుగు: మహిళల సాధికారతకు మౌలిక సదుపాయాలు ఎంతో అవసరమని పాలమూరు ఎమ్మెల్యే యెన్నం శ్రీనివాస్ రెడ్డి అన్నారు. మహబూబ్నగర్ నగరంలోని ఎంప్లాయీస్ కాలనీలో నూతనంగా నిర్మిస్తున్న మహిళా సంఘం భవనాన్ని ఆదివారం మధ్యాహ్నం ఆయన పరిశీలించారు. ఈ సందర్భంగా నిర్మాణ పనుల పురోగతిని కాంట్రాక్టర్ను అడిగి తెలుసుకున్నారు. అనంతరం ఎమ్మెల్యే మాట్లాడుతూ మహిళలకు ఉపయోగపడే విధంగా ఈ భవనాన్ని అన్ని సౌకర్యాలతో నిర్మిస్తున్నామన్నారు. నిర్మాణ పనులు ఆలస్యం కాకుండా, నిర్ణీత సమయంలో పూర్తి చేసి అందుబాటులోకి తీసుకురావాలని కాంట్రాక్టర్ను ఆదేశించారు.
గాంధీ చౌక్లో నిరసన
వనపర్తి, వెలుగు: యూపీఏ ప్రభుత్వం దేశంలోని గ్రామీణ పేదలు ఆత్మగౌరవంతో జీవించాలన్న గొప్ప లక్ష్యంతో తీసుకొచ్చిన మహాత్మాగాంధీ జాతీయ గ్రామీణ ఉపాధి హామీ పథకాన్ని కేంద్రం నిర్వీర్యం చేస్తోందని స్పోర్ట్స్ అథారిటీ చైర్మన్, డీసీసీ అధ్యక్షుడు శివసేనారెడ్డి విమర్శించారు. ఏఐసీసీ పిలుపు మేరకు ఆదివారం జిల్లా కేంద్రంలోని గాంధీ చౌక్లో నిరసన చేపట్టారు. ఈ సందర్భంగా ఆయన మాట్లాడుతూ ఇప్పటివరకు ప్రపంచంలో ఎక్కడా లేని విధంగా దాదాపు 5 వేల కోట్ల పని దినాలను కల్పించిన ఏకైక పథకంగా చరిత్ర సృష్టించిందన్నారు.
సుమారు 14 కోట్ల మంది కూలీలు ఈ పథకం కింద నమోదు చేసుకుని ఉపాధి పొందుతున్నారని, ఇప్పటివరకు రూ. 11. 75 లక్షల కోట్లు వేతనాలు నేరుగా కూలీల ఖాతాల్లో జమ అయ్యాయని వివరించారు. ఈ పథకం వల్ల దేశవ్యాప్తంగా గ్రామీణ ప్రాంతాల్లో వలసలు తగ్గాయన్నారు. అలాంటి స్కీమును ఎత్తివేసేందుకు బీజేపీ ప్రభుత్వం కుట్ర చేస్తోందని మండిపడ్డారు. కార్యక్రమంలో ఏఎంసీ చైర్మన్ శ్రీనివాస్గౌడ్, లీడర్లు శంకర్ ప్రసాద్, పీసీసీ కార్యదర్శులు, పార్టీ, అనుబంధ సంఘాల నాయకులు పాల్గొన్నారు.
