తిరుమల ఘాట్ రోడ్డులో పెను ప్రమాదం తప్పింది. నిన్న రాత్రి మోంథా తుఫాను కారణంగా బలమైన గాలుల ధాటికి ఓ భారీ వృక్షం రోడ్డుకు అడ్డంగా కూలిపోయింది. ఈ ఘటన వల్ల ఘాట్ రోడ్డులో భారీగా ట్రాఫిక్ జామ్ ఏర్పడి వాహనదారులు తీవ్ర ఇబ్బందులు పడ్డారు.
తిరుమల నుండి తిరుపతికి వచ్చే మొదటి ఘాట్ రోడ్డులోని 14వ మలుపు వద్ద ఈ సంఘటన జరిగింది. బలమైన గాలుల కారణంగా ఈ వృక్షం వేళ్లతో సహా కూలి రోడ్డుపై పడిపోయింది.
అయితే, ఆ సమయంలో ఎటువంటి వాహనాలు రాకపోవడంతో పెను ప్రమాదం తప్పినట్లు అధికారులు తెలిపారు. వాహనాల రాకపోకలు ఎక్కువగా ఉండే ఈ మార్గంలో చెట్టు కూలిన సమయంలో ఎలాంటి వాహనాలు లేకపోవడం వల్ల ఎటువంటి ప్రాణనష్టం లేదా ఆస్తినష్టం జరగలేదు.
దీనికి సంబంధించి సమాచారం అందుకున్న టీటీడీ ఫారెస్ట్, విజిలెన్స్ సిబ్బంది వెంటనే సంఘటనా స్థలానికి చేరుకొని వెంటనే చర్యలు చేపట్టి చెట్టును తొలగించారు.
