సైడ్ యాక్టర్ నుంచి లీడ్ యాక్టర్..ఎవరీ సందీప్ ప్రదీప్..?

సైడ్ యాక్టర్ నుంచి లీడ్ యాక్టర్..ఎవరీ సందీప్ ప్రదీప్..?

ఏ రంగంలో అయినా కొత్తవాళ్లకు కోరినన్ని అవకాశాలు ఉంటాయి. వాటిని సరిగ్గా ఉపయోగించుకుంటే అనుకున్న స్థాయికి వెళ్లొచ్చు. అందుకు నేటి యువతరం నటీనటులే లైవ్ ఎగ్జాంపుల్స్. ఇదే కోవలోకి వస్తాడు మలయాళ నటుడు సందీప్ ప్రదీప్​. సినిమాల్లో తన పాత్ర ఏదైనా అది ఆడియెన్స్​కి గుర్తుండిపోయేలా నటించడమే అతడి టాలెంట్​. తను నటించిన సినిమాలు దాదాపు తెలుగులో డబ్ కావడంతో టాలీవుడ్​కూ సందీప్​ నటన పరిచయమే. అయితే ఇప్పుడు వచ్చిన సినిమాలో పెద్ద స్టార్​కాస్ట్​తోపాటు తాను లీడ్​ రోల్ చేయడం మరింత ప్రత్యేకం​. కొద్దికాలంలోనే సైడ్ యాక్టర్​ నుంచి లీడ్​ యాక్టర్​గా ఎదిగిన సందీప్​ జర్నీ విశేషాలు ఇవి. 

సందీప్ ప్రదీప్​ది కేరళలోని వైకోమ్​. ఇంటర్ వరకు అక్కడే చదువుకున్నాడు. ఆ తర్వాత అడ్వాన్స్​డ్​ విజువల్ ఎఫెక్ట్స్ డిప్లొమా కోసం బెంగళూరు వెళ్లాడు. కొవిడ్​ టైంలో వీఎఫ్​ఎక్స్ ఆర్టిస్ట్​గా మల్టీనేషనల్ కంపెనీలో పనిచేశాడు. అప్పటికే ఇండిపెండెంట్​గా షార్ట్​ ఫిల్మ్​ ప్రొడక్షన్​ విభాగంలోనూ ఇన్వాల్వ్ అయ్యాడు. సందీప్ కెరీర్ 2013లో ఒక షార్ట్​ ఫిల్మ్​తో మొదలైంది. తన ఫ్రెండ్స్​తో కలిసి తీసిన ఆ షార్ట్​ ఫిల్మ్​​కు మంచి పేరొచ్చింది. ‘మ్యాగ్నెటో’ అనే థ్రిల్లర్ ఫాంటసీ షార్ట్​ ఫిల్మ్​లో విలన్​ పాత్ర పోషించాడు. దాంతోపాటు వీఎఫ్​ఎక్స్​ ఆర్టిస్ట్​గానూ పనిచేశాడు. తర్వాత కళ్యాణ కచేరీ అనే మిని వెబ్ సిరీస్​లో నటించాడు. 

వీఎఫ్​ఎక్స్ ఆర్టిస్ట్​గా..

‘‘ఒక యాక్టర్​గా నాకు ఈ ఏడాది బాగా కలిసొచ్చింది. ఒక్కో లెవల్ దాటుకుంటూ వెళ్తున్నట్టు అనిపిస్తోంది. నేనెప్పుడూ యాక్టర్ కావాలనే
కోరుకున్నా. యాక్టింగ్ తప్ప వేరే ఆలోచనలేం లేవు నాకు. నా మనసంతా మంచి అవకాశం వస్తే నటించాలనే ఎదురుచూసింది. ఇప్పటివరకు నేను చేసిన సినిమాలన్నీ నాకు గుర్తింపు తెచ్చిపెట్టాయి. అయితే ఇప్పుడు ఎకో మాత్రం నన్ను ఒక పర్ఫార్మర్​గా గుర్తించే ఫిల్మ్​ అని ఫీల్ అవుతున్నా.
ఈ జర్నీ మధ్యలో నేను అనుకున్నది సాధిస్తానా? లేదా? అనే డౌట్​ వచ్చింది. ముఖ్యంగా ‘ఫ్యాలిమి’ సినిమాకి పనిచేస్తున్నప్పుడు కొన్నిరోజులు గ్యాప్ వచ్చింది. తర్వాత మళ్లీ రీస్టార్ట్ చేశాం. ఆ గ్యాప్​లో నేను ఒక కంపెనీ కోసం వీఎఫ్ఎక్స్ ఆర్టిస్ట్​గా పనిచేశా. దాంతోపాటు షార్ట్​ఫిల్మ్స్​కి కూడా వర్క్ చేశా. అప్పటికీ నా ప్యాషన్​ యాక్టింగ్​ మీదే. కానీ, కొన్ని ఫైనాన్షియల్​ ఇబ్బందులు రావడంతో నాకు ఈ డౌట్​లన్నీ వచ్చాయి. అయితే ఫ్యాలిమి సినిమా కొడతాం అని నాకు డైరెక్టర్, స్క్రిప్ట్​ మీద చాలా నమ్మకం ఉండేది.

ఎకో నాకు చాలా స్పెషల్

ఈ సినిమాలో నేను ఇంకాస్త బాగా నటించాననుకుంటున్నా. డైలాగ్స్ విషయంలో చాలా క్లియర్​గా, కాన్ఫిడెంట్​గా ఒకే విషయాన్ని రిపీట్ చేయాల్సి వచ్చినప్పుడు కొత్తగా అనిపించింది. ఎందుకంటే అప్పటిదాకా నేను చేసిన సినిమాల్లో నా డైలాగ్స్ చాలా సాధారణంగా ఉండేవి. అందువల్ల ఈ సినిమా కోసం కూర్చుని డైలాగ్స్ నేర్చుకోవాల్సి వచ్చింది. దాంతోపాటు ఇందులో నటించిన వినీత్, అశోకన్, నరైన్​ అందరూ సీనియర్ యాక్టర్స్​ కావడంతో వాళ్ల నుంచి నేను చాలా నేర్చుకున్నాను. ఒక్కొక్కరూ తమ పాత్రను అవలీలగా ఎలా పోషిస్తున్నారో అబ్జర్వ్ చేసేవాడిని.’’ 

రెస్పాన్సిబిలిటీ వచ్చింది

ప్రజెంట్​ నాకు ఫేమ్​తోపాటు రెస్పాన్సిబిలిటీ పెరిగింది అని అనుకుంటున్నా. నాకు తెలిసి, ఒక నటుడు పాపులర్ అవ్వాలంటే ముందు ఫైనాన్షియల్​గా నిలదొక్కుకోవాలి. మొదట్లో నాకు వచ్చిన విమర్శలు, పోలికలు ఇప్పుడు మరింత పెరిగే అవకాశం ఉందని నేను అనుకుంటున్నాను. అందుకే నేను స్థిరంగా ఉండాలనుకుంటున్నా. మంచి సినిమాల్లో భాగమవ్వాలి అనేది నా గోల్​. ఇప్పుడు మంచి స్క్రిప్ట్​ను ఎంచుకోవడం నా బాధ్యతగా ఫీలవుతున్నా. నిజం చెప్పాలంటే.. ఇండస్ట్రీ ప్రతి ఒక్కరికీ అవకాశాన్ని ఇస్తుంది. ప్రతి ఒక్కరికీ ఇందులో చోటు ఉంది. నటించాలన్నా, సినిమాలు తీయాలన్నా కొత్తవాళ్లకు ఎన్నో అవకాశాలు ఉన్నాయి. ఆడియెన్స్​ ప్రతి క్రాఫ్ట్​ను అర్థం చేసుకుంటున్నారు. అందుకే మాలాంటి కుర్రాళ్లంతా కలిసి సినిమా తీసినా దాన్ని అర్థం చేసుకుని ఎంజాయ్​ చేస్తున్నారు. 

బిగ్​ స్క్రీన్​

2019లో వచ్చిన ‘పాతినెట్టమ్​ పడి’ సినిమాతో పెద్ద స్క్రీన్​పై కనిపించే అవకాశం వచ్చింది. ఆ సినిమాకు క్రిటిక్స్​ నుంచి కూడా ప్రశంసలు దక్కాయి. కానీ, దాని తర్వాత మరో సినిమా అవకాశం రావడానికి కొంచెం టైం పట్టింది. రెండో సినిమా తర్వాత నుంచి తిరిగి చూసుకునే పనే లేకుండా పోయింది. 2022లో ‘అంత్యాక్షరి’ తన రెండో సినిమా కాగా, 2023లో వచ్చిన ఫ్యాలిమి మూడో సినిమా. ఫ్యాలిమి సూపర్ హిట్ కావడంతో తెలుగులోనూ డబ్ అయింది. ఈ సినిమాకుగాను సందీప్​ బెస్ట్​ కమెడియన్​గా సైమా అవార్డ్స్​కు నామినేట్​ అయ్యాడు. అవార్డు రాకపోయినా తన టాలెంట్​ సౌత్ ఇండియన్ ఆడియన్స్​కు పరిచయం అయింది. ఇక ఈ ఏడాది బ్యాక్​ టు బ్యాక్​ సినిమాలతో బిజీగా ఉన్నాడు సందీప్​. ‘అలప్పుజ జింఖానా’, ‘పడక్కలమ్’​ వంటి సినిమాలతో యూత్​ ఆడియెన్స్​కు కనెక్ట్​ అయ్యాడు. ఇప్పుడు మరో యూత్​ఫుల్ సినిమా ‘ఎకో’తో ప్రేక్షకుల ముందుకు వచ్చాడు. ఒకవైపు వరుసగా సినిమాల్లో నటిస్తూనే మరోవైపు తన టాలెంట్స్​​ను ఉపయోగించుకుంటున్నాడు. 
లేటెస్ట్​గా సనా ఆరో నీ అనే మ్యూజిక్ వీడియోకి వీఎఫ్​ఎక్స్​తోపాటు డైరెక్షన్​ కూడా​ చేశాడు.