గేర్ మార్చిన మల్లు.. పక్కా వ్యూహంతోనే ఢిల్లీ ప్రత్యేక ప్రతినిధి పోస్టుకు గుడ్ బై

ఎంపీ టికెట్ రేస్లో ఉన్నానని ప్రకటన
మద్దతు కూడగడుతున్న మాజీ ఎంపీ
డిఫెన్స్లో ఆశావహులు

నాగర్ కర్నూల్, వెలుగు: నాగర్ కర్నూల్ ఎస్సీ నియోజకవర్గం ఎంపీ టికెట్ ఆశిస్తున్న ఆశావహులు ఎవరి ప్రయత్నాల్లో వారు బిజీగా ఉన్న టైంలో మాజీ ఎంపీ, ఢిల్లీలో రాష్ట్ర ప్రభుత్వ ప్రతినిధి మల్లు రవి ఒక్కసారిగా గేర్ మార్చారు. టికెట్ ఇచ్చేందుకు తన పదవి అడ్డు వస్తుందని భావించి పోస్టుకు రాజీనామా చేస్తున్నట్లు ప్రకటించారు. ఢిల్లీలో ప్రత్యేక ప్రతినిధి పదవి ఇచ్చిన తర్వాత నాగర్కర్నూల్ నుంచి పోటీ చేసేందుకు పార్టీ టికెట్ ఇవ్వరనే ప్రచారం నేపథ్యంలో పోస్టును వదులుకునేందుకు సిద్ధపడ్డారు. జడ్చర్ల ప్రెస్మీట్ లో పదవికి రిజైన్ చేస్తున్నట్లు ప్రకటించారు. మల్లు రవికి టికెట్ ఇవ్వాలని వివిధ నియోజకవర్గాల నుంచి కాంగ్రెస్ నాయకులు కూడా డిమాండ్ చేసేలా మద్దతు కూడగడుతున్నారు.

టికెట్ కోసం పోటాపోటీ..

నాగర్కర్నూల్ పార్లమెంట్ పరిధిలోని అసెంబ్లీ నియోజకవర్గాల్లో నిర్వహిస్తున్న ఎన్నికల సన్నాహక సమావేశాల్లో మంత్రి జూపల్లి కృష్ణారావు, కాంగ్రెస్ ఎమ్మెల్యేలు, పార్టీ టికెట్ ఆశిస్తున్న మల్లు రవి, ఏఐసీసీ సెక్రటరీ సంపత్ కుమార్, మాజీ ఎంపీ మంద జగన్నాథం తదితరులు పాల్గొంటున్నారు. ఇక్కడి నుంచి తాము పోటీ చేస్తామని మాజీ ఎంపీలు మల్లు రవి, మంద జగన్నాథం ప్రకటించిన విషయం తెలిసిందే. ఇటీవల జరిగిన అసెంబ్లీ ఎలక్షన్స్లో మంత్రి జూపల్లి కృష్ణారావు, అచ్చంపేట ఎమ్మెల్యే వంశీకృష్ణ మినహా మిగిలిన వారంతా మొదటిసారి ఎన్నికయ్యారు. మాజీ ఎంపీ మల్లురవికి నాగర్కర్నూల్, కల్వకుర్లి, అచ్చంపేట, కొల్లాపూర్, వనపర్తి నియోజకవర్గాల్లోని క్యాడర్తో మంచి సంబంధాలున్నాయి.

కాంగ్రెస్ హయాంలో డీకే అరుణ మంత్రిగా పని చేసిన సమయంలో ఆ ప్రాంతంలోనూ పరిచయాలు పెంచుకున్నారు. మల్లు రవి తర్వాత ఆ స్థాయిలో పరిచయాలు, పట్టున్న నేతగా మాజీ ఎంపీ మంద జగన్నాథంకు పేరుంది. నాగర్కర్నూల్ పార్లమెంట్ ఇన్చార్జిగా మంత్రి జూపల్లి కృష్ణారావుకు బాధ్యతలు అప్పగించారు. ఎమ్మెల్యేల అభిప్రాయాలు, గెలుపోటములు, అభ్యర్థిత్వంపై సర్వే అనంతరం అభ్యర్థిని ఖరారు చేస్తారని సమాచారం. ఏఐసీసీ సెక్రటరీ సంపత్కుమార్ పార్లమెంట్ ఎన్నికల బరిలో ఉండాలని నిర్ణయించుకోవడంతో కాంగ్రెస్ టికెట్ రేస్ ఇంట్రెస్టింగ్గా మారింది.

గెలుపుపై ధీమాతోనే..

నాగర్కర్నూల్ పార్లమెంట్ పరిధిలోని ఏడు అసెంబ్లీ స్థానాల్లో 5 చోట్ల కాంగ్రెస్, 2 చోట్ల బీఆర్ఎస్ ఎమ్మెల్యేలు గెలిచారు. 5 స్థానాల్లో గెలిచిన కాంగ్రెస్ ఎమ్మెల్యేల మెజార్టీ 1.20 లక్షల పైనే ఉంది. ప్రజలు ఇంకా అసెంబ్లీ ఎలక్షన్ మూడ్లో ఉండడం, మహిళలకు ఉచిత బస్ ప్రయాణం,త్వరలో 200 యూనిట్ల ఫ్రీ విద్యుత్, రూ.500కే గ్యాస్ సిలిండర్ వంటి అంశాలు ప్లస్ అవుతాయని భావిస్తున్నారు. ఎమ్మెల్యేలు, వారి అనుచరులు, పార్టీ క్యాడర్ బలంగా ఉండడం కలిసొస్తుందనే అంచనాలున్నాయి. దీంతో ఎంపీగా భారీ మెజార్టీతో గెలవగలమనే ధీమా ఆశావహుల్లో ఉంది.

టికెట్కోసం పదవికి గుడ్ బై..

కేబినెట్ హోదాలో కేంద్రంలో రాష్ట్ర ప్రభుత్వ ప్రతినిధిగా నియమితుడైన మల్లు రవి నెల దాటకముందే ఆ పోస్టుకు రిజైన్ చేస్తున్నట్లు ప్రకటించారు. వచ్చే పార్లమెంట్ ఎన్నికల్లో నాగర్కర్నూల్ నుంచి బరిలో ఉండడం పక్కా అని తేల్చేశారు. గతంలో ఎంపీగా పని చేసిన అనుభవం, ఆ తర్వాత ప్రత్యేక ప్రతినిధి హోదాలో ఢిల్లీలో పరిచయాలు తనకు కలిసి వస్తాయనే అంచనాలో ఉన్నారు. 1991,1998లో రెండు సార్లు ఎంపీగా గెలిచారు.

పార్టీనే నమ్ముకున్న ఆయన ఇప్పటి వరకు అందులోనే కొనసాగుతున్నారు. వైఎస్ హయాంలో కేంద్రంలో రాష్ట్ర ప్రభుత్వ ప్రతినిధిగా పని చేశారు. 2004,2009 పార్లమెంట్ ఎన్నికల్లో మల్లు రవి పార్టీ టికెట్ ఆశించినా, పార్టీ నిర్ణయానికి కట్టుబడి టికెట్ ఇచ్చిన వారి కోసం పని చేశారు.2019 ఎన్నికల్లో నాగర్కర్నూల్ నుంచి పోటీ చేసేందుకు లీడర్లు ముందుకు రాని సమయంలో పోటీ చేశారు. ఇవన్నీ గుర్తు చేస్తున్న అనుచరులు, సీనియర్లు ఈ సారి మల్లుకే టికెట్ ఇవ్వాలని డిమాండ్ చేస్తున్నారు.