ఎల్బీనగర్, వెలుగు: అప్పు పైసలు అడిగినందుకు కొబ్బరి బోండాలు కొట్టే కత్తితో దాడిచేసిన ఘటన వనస్థలిపురం పీఎస్ పరిధిలో జరిగింది. హస్తినాపురానికి చెందిన ముసలారెడ్డి(59) కొన్ని నెలల కింద వనస్థలిపురంలో ఉండే వెంకట రెడ్డికి రూ.60వేలు అప్పుగా ఇచ్చాడు. వెంకటరెడ్డి స్థానికంగా కొబ్బరిబోండాల వ్యాపారం చేస్తుంటాడు. అప్పు పైసలు అడిగేందుకు ముసలారెడ్డి మంగళవారం వెంకటరెడ్డి వద్దకు వెళ్లాడు. ఈ క్రమంలో ఇద్దరి మధ్య గొడవ జరిగింది. మాటమాట పెరిగి వెంకటరెడ్డి కొబ్బరిబోండాల కత్తితో ముసలారెడ్డిపై దాడిచేశాడు. గాయపడిన ముసలారెడ్డి నేరుగా వనస్థలిపురం పీఎస్ కు చేరుకుని ఫిర్యాదు చేశాడు. కేసు నమోదు చేసినట్లు పోలీసులు తెలిపారు.
