- మృతుల్లో ఆరుగురు మహిళలు
భద్రాచలం, వెలుగు: చత్తీస్గఢ్లో జరిగిన భారీ ఎన్కౌంటర్లో 9 మంది మావోయిస్టులు మృతి చెందారు. వీరిలో ఆరుగురు మహిళలు ఉన్నారు. మంగళవారం బీజాపూర్, దంతెవాడ జిల్లాల బార్డర్లో భద్రతా దళాలు కూంబింగ్ జరుపుతుండగా ఈ ఎన్కౌంటర్ జరిగిందని బస్తర్ ఐజీ సుందర్రాజ్, దంతెవాడ ఎస్పీ గౌరవ్రాయ్ మీడియాకు తెలిపారు. దంతెవాడ జిల్లా కిరండోల్ పోలీస్స్టేషన్ పరిధిలోని లోహాగావ్, పురంగీల్, ఎండ్రీ అడవుల్లో భారీ ఎత్తున దర్బా డివిజన్, పీఎల్జీఏ 2వ కంపెనీ మావోయిస్టులు సమావేశం అయ్యారని సమాచారం వచ్చింది. మావోయిస్టులు భారీ విధ్వంసానికి ప్లాన్ చేస్తున్నట్లు ఇంటెలిజెన్స్ నుంచి సమాచారం అందింది. దీంతో దంతెవాడ డీఆర్జీ, బస్తర్ ఫైటర్స్, సీఆర్పీఎఫ్ 111, 230 బెటాలియన్ జవాన్లు, యంగ్ ప్లాటూన్స్ బలగాలు సోమవారం అర్ధరాత్రి నుంచే కూంబింగ్ మొదలు పెట్టాయి. ఈ క్రమంలో మావోయిస్టులు కనిపించడంతో ఇరువర్గాల మధ్య ఏడెనిమిదిసార్లు కాల్పులు మొదలయ్యాయి.
మావోయిస్టులు పారిపోతూ కూడా కాల్పులు కొనసాగించారు. భారీ సంఖ్యలో మోహరించిన భద్రతా సిబ్బంది వారిని చుట్టుముట్టి కాల్పులు జరిపారు. అనంతరం వేర్వేరు చోట్ల 9 మంది మావోయిస్టుల మృతదేహాలు లభించాయని, స్వాధీనం చేసుకున్నామని పోలీసులు తెలిపారు.
భారీగా ఆయుధాలు స్వాధీనం
మావోయిస్టుల మృతదేహాలతోపాటు 303, ఎస్ఎల్ఆర్, బీజీఎల్ లాంచర్లు, 12 బోర్ తుపాకులు, 315 బందూకులు, డిటోనేటర్లు, టిఫిన్ బాక్స్ మందుపాతరలు, ప్రెషర్ కుక్కర్ బాంబులు, తూటాలను పోలీసులు స్వాధీనం చేసుకున్నారు. నిత్యావసర సరుకులు, మందులు, విప్లవ సాహిత్యంతో పాటు మృతదేహాలను తీసుకుని దంతెవాడకు బలగాలు బయలుదేరాయి. మృతులంతా దర్బా డివిజన్ కమిటీ, పీఎల్జీఏ 2వ కంపెనీకి చెందిన వారని ఐజీ సుందర్ రాజ్, ఎస్పీ గౌరవ్ రాయ్ తెలిపారు. చనిపోయినవారిని గుర్తించేందుకు మాజీ మావోయిస్టులు, ఇన్ఫార్మర్లను దంతెవాడకు తీసుకొస్తున్నామన్నారు. 2024లో బస్తర్ రేంజ్లో ఇప్పటి వరకు జరిగిన ఎన్కౌంటర్లలో 153 మంది మావోయిస్టులు చనిపోయారని, 669 మందిని అరెస్ట్ చేశామని, 656 మంది లొంగిపోయారని ఐజీ వెల్లడించారు.
