హైదరాబాద్ సిటీ, వెలుగు: దేశంలోనే అతి పెద్ద మహానగరంగా ఏర్పడిన జీహెచ్ఎంసీని మూడు కార్పొరేషన్లుగా విభజించే దిశగా కసరత్తు ముమ్మరమైంది. పునర్ వ్యవస్థీకరణలో భాగంగా కమిషనర్ కర్ణన్ భారీగా ఇంజినీర్ల బదిలీలు చేశారు. ఏఈ, ఏఈఈ, డీఈ, డీఈఈలతో పాటు క్వాలిటీ కంట్రోల్ సెల్లో విధులు నిర్వహిస్తున్న ఇంజినీర్లను కొత్తగా ఏర్పడిన 12 జోన్లలో అవసరమైన ప్రాజెక్టులు, మెయింటెనెన్స్ తోపాటు ఇతర విభాగాల్లోకి బదిలీ చేశారు.
అదనపు కమిషనర్లకు స్థానచలనం
ప్రధాన కార్యాలయంలో అదనపు కమిషనర్ (అడ్మిన్)గా విధులు నిర్వహిస్తున్న కే. వేణుగోపాల్ను మల్కాజిగిరి, ఎల్బీనగర్, ఉప్పల్ జోన్లకు అడ్మినిస్ట్రేషన్, ఫైనాన్స్ విభాగాలకు జాయింట్ కమిషనర్గా నియమించారు. రిజర్వ్లో ఉన్న అదనపు కమిషనర్ గీతారాధికను కూకట్పల్లి, శేరిలింగంపల్లి, కుత్బుల్లాపూర్ జోన్లకు అడ్మినిస్ట్రేషన్, ఫైనాన్స్ విభాగాలకు జాయింట్ కమిషనర్గా నియమించారు.
12 జోన్లకు టౌన్ ప్లానింగ్ పర్యవేక్షణ అధికారులు
భవన నిర్మాణాల అనుమతుల విషయంలో ఇబ్బందులు లేకుండా ఫీల్డ్స్థాయిలో చర్యలు తీసుకునేందుకు జీహెచ్ఎంసీ పరిధిలోని 12 జోన్లకు టౌన్ ప్లానింగ్ పర్యవేక్షణ అధికారులుగా సీనియర్ టౌన్ ప్లానింగ్ అధికారులను నియమించారు. శంషాబాద్, రాజేంద్రనగర్, గోల్కొండ, చార్మినార్, ఖైరతాబాద్, సికింద్రాబాద్ జోన్లకు చీఫ్ సిటీ ప్లానర్ శ్రీనివాస్కు బాధ్యతలు అప్పగించారు. శేరిలింగంపల్లి, కూకట్పల్లి, కుత్బుల్లాపూర్ జోన్లకు టౌన్ ప్లానింగ్ డైరెక్టర్ బీ వెంకన్నకు బాధ్యతలు అప్పగించారు. మల్కాజిగిరి, ఉప్పల్, ఎల్బీనగర్ జోన్లకు టౌన్ ప్లానింగ్ డైరెక్టర్ బీ ప్రదీప్కు బాధ్యతలు అప్పగించారు.
జోనల్, డిప్యూటీ కమిషనర్లకు కీలక అధికారాల బదిలీ
జీహెచ్ఎంసీ పరిధి 650 చ.కి.మీ నుంచి 2,053 చ.కి.మీకి విస్తరించిన నేపథ్యంలో ప్రజలకు వేగవంతమైన, సమర్థవంతమైన పరిపాలన అందించేందుకు వికేంద్రీకృత పాలనను బలోపేతం చేయాలని జీహెచ్ఎంసీ నిర్ణయించింది.
ఈ క్రమంలో జోనల్, డిప్యూటీ కమిషనర్లకు కమిషనర్ ఆర్వీ కర్ణన్ కీలక అధికారాలను బదిలీ చేశారు. జీహెచ్ఎంసీ చట్టం-1955లోని సెక్షన్ 119 ప్రకారం ఆస్తి పన్ను అంచనాలు, సవరణలు, మ్యూటేషన్లు, మినహాయింపులు తదితర సేవలకు సంబంధించిన అధికారాలను నిర్దిష్ట పరిమితులు, షరతులతో జోనల్ కమిషనర్లు, డిప్యూటీ కమిషనర్లకు అప్పగిస్తూ శనివారం ఉత్తర్వులు జారీ చేశారు. ఈ నిర్ణయంతో పరిపాలనా ఆలస్యాలు తగ్గి, ప్రజల దరఖాస్తుల పరిష్కారం వేగవంతం అవుతుంది.
విస్తరించిన జీహెచ్ఎంసీ పరిధిలో ప్రజలకు మరింత చేరువైన పాలన సాధ్యమవుతుంది. అప్పగించిన అధికారాలు సంబంధిత ఎస్వోపీలు, జీహెచ్ఎంసీ చట్టం-1955 నిబంధనల ప్రకారం అమలు కానున్నాయి. పరిపాలన ప్రయోజనాల కోసం ఈ అధికారాలను కమిషనర్ సమీక్షించి సవరించవచ్చు. ఈ ఉత్తర్వులు తక్షణమే అమల్లోకి రానున్నాయి.
