- ప్రారంభించనున్న ప్రధాని
- ట్విట్టర్లో ఉభయ సభల వీడియో పోస్టు
- ప్రత్యేక ఆకర్షణగా నిలుస్తున్న అశోక చక్రాలు, హాల్స్
న్యూఢిల్లీ: కొత్త పార్లమెంట్ బిల్డింగ్ను ఆదివారం ప్రధాని నరేంద్ర మోడీ ప్రారంభించనున్నారు. ఈ మేరకు అధికారులు అన్ని ఏర్పాట్లు చేస్తున్నారు. ఆ రోజు ఉదయం నుంచి సాయంత్రం వరకు నిర్వహించే ప్రోగ్రామ్ షెడ్యూల్ను కూడా కేంద్రం ఇప్పటికే ప్రకటించింది. పార్లమెంట్ కొత్త బిల్డింగ్ లోని లోక్సభ, రాజ్యసభ కాంప్లెక్స్కు సంబంధించిన వీడియోను ప్రధాని మోడీ శుక్రవారం తన ట్విట్టర్లో పోస్టు చేశారు. ఎంట్రీ నుంచి లోపల స్పీకర్, చైర్మన్ కూర్చునే చైర్ వరకు ఎలా ఉంటుందనేది ఈ వీడియోలో చిత్రించారు. ఉభయ సభల్లో అశోక చక్రం ప్రత్యేక ఆకర్షణగా నిలిచింది. ‘మై పార్లమెంట్ మై ప్రైడ్’ అనే హ్యాష్ట్యాగ్ను ఉపయోగించి వీడియోను అందరితో పంచుకోవాలని ప్రజలను మోడీ కోరారు. వీడియోకు వాయిస్ ఓవర్ జోడించాలని, అందులో కొన్నింటిని తాను రీట్వీట్ చేస్తానన్నారు. కాగా, పార్లమెంట్ ప్రారంభోత్సవానికి రావాల్సిందిగా అన్ని పార్టీలకు కేంద్రం ఆహ్వానం పంపింది.
ఈ వేడుకకు 25 పార్టీలు హాజరవుతున్నాయి. మరో 20 పార్టీలు ఓపెనింగ్ను బహిష్కరిస్తున్నట్లు ఇప్పటికే ప్రకటించాయి. ప్రారంభోత్సవంలో రాజదండం ప్రత్యేక ఆకర్షణగా నిలవనుంది. ఇన్నేండ్లు అలహాబాద్ మ్యూజియంలోని నెహ్రూ గ్యాలరీలో ఉన్న ‘సెంగోల్’ ఢిల్లీకి చేరుకుంది. సెంగోల్ ను తయారు చేసిన తమిళనాడు మఠం నిర్వాహకులతో పాటు వారి ఫ్యామిలీ మెంబర్స్కు కూడా కేంద్ర ప్రభుత్వం స్పెషల్ ఇన్విటేషన్ పంపింది. పార్లమెంట్ ప్రారంభోత్సవానికి హాజరుకావాల్సిందిగా కోరింది.
ఎంతో గర్వంగా ఉంది: ఉమ్మిడి ఈతిరాజు
కేంద్రం ఆహ్వానంపై సెంగోల్‌‌‌‌ను తయారుచేసిన తమిళనాడులోని ఉమ్మిడి బంగారు చెట్టి కుటుంబం ఆనందం వ్యక్తం చేసింది. ఈ సందర్భంగా 95 ఏండ్ల ఉమ్మిడి ఈతిరాజు మాట్లాడుతూ.. ‘‘సెంగోల్ తయారు చేసే టైంలో నాకు 20 ఏండ్లు. తిరువడుతురై అథీనం సహకారం, ఇతరుల సపోర్ట్తో సెంగోల్ తయారు చేశాం. పార్లమెంట్లో సెంగోల్ ను ప్రతిష్టిస్తున్నందుకు చాలా సంతోషంగా ఉంది”అని అన్నారు.
