- రూ.3 కోట్లతో అభివృద్ధి పనులు ... ఆధునిక 42 కాటేజీలు
- ఆకట్టుకునేలా స్విమ్మింగ్ పూల్ లు
- ఆహ్లాదం కలిగించేలా గ్రీనరీ
- త్వరలో ప్రారంభించనున్న అటవీ శాఖ మంత్రి
మెదక్/నర్సాపూర్, వెలుగు: కనుచూపు మేర దట్టమైన అడవి... పచ్చని చెట్లతో ఆహ్లాదకరమైన వాతావరణం... ఎలాంటి కాలుష్యం లేని స్వచ్చమైన గాలి... పక్షుల కిలకిల రావాలు... నీటి మీద తేలియాడినట్లుండే కాటేజీలు... ఆకట్టుకునే స్విమ్మింగ్ పూల్ లు.. ఇదంతా చెప్తోంటే ఏ కేరళో, అరుకో అనుకుంటే పొరపాటు పడినట్లే. ఎందుకంటే ఇది మన మెదక్ జిల్లాలో రూపుదిద్దుకున్న అందమైన విడిది.
ప్రకృతి ప్రేమికులను ఆకట్టుకునేలా నర్సాపూర్ అడవిలో ఏర్పాటుచేసిన ఎకో పార్క్. హైదరాబాద్ - మెదక్ నేషనల్ హైవే ను ఆనుకుని నర్సాపూర్ పట్టణ శివారులో దట్టమైన అడవి ఉంది. రాష్ట్ర రాజధాని హైదరాబాద్కు సమీపంలో ఉండటం, ప్రకృతి ప్రేమికులు ఎక్కువగా ఈ ప్రాంతాన్ని సందర్శిస్తుండటంతో దాదాపు ఐదేళ్ల కింద ఇక్కడ ప్రభుత్వం ఫారెస్ట్ 2.ఓ పథకం కింద రూ.20 కోట్లతో అర్బన్ పార్క్ ఏర్పాటు చేసింది.
ఇది అందుబాటులోకి వచ్చాక సందర్శకుల రాక ఒక్కసారిగా పెరిగింది. చాలా మంది రాత్రి అక్కడ బస చేసేందుకు ఆసక్తి చూపిస్తుండగా, అందుకు అవకాశం లేకపోవడం ఇబ్బందిగా ఉంది. ఈ నేపథ్యంలో ఫారెస్ట్ డిపార్ట్మెంట్ ఓ ప్రైవేట్ సంస్థ ఆధ్వర్యంలో పీపీపీ విధానంలో రూ.3 కోట్ల వ్యయంతో ఆధునిక హంగులతో అందమైన కాటేజీలు నిర్మించారు. ఫారెస్ట్ ను ఆనుకుని నర్సాపూర్ రాయరావు చెరువు ఉండగా చెరువు ఒడ్డునే పిల్లర్లు వేసి ఆధునిక హంగులతో వీటిని ఏర్పాటుచేశారు.
చెరువు నిండితే కాటేజీలో నీటిలో తేలియాడుతున్నట్టు కనిపిస్తాయి. బర్త్ డే, మ్యారేజ్ డే పార్టీలు, పెళ్లి ముందు నిర్వహించే హల్దీ ఫంక్షన్, గెట్ టు గెదర్ పార్టీలు నిర్వహించుకునేందుకు వీలుగా కిచెన్, డైనింగ్ హాల్ సౌకర్యంతో ఫంక్షన్ హాల్ నిర్మించారు. ఆకర్షణీయమైన డిజైన్ తో ఒక పెద్ద స్విమ్మింగ్ పూల్ తో పాటు, పలు కాటేజీల వద్ద చిన్న స్విమ్మింగ్ పూల్ లను నిర్మించారు.
కాటేజీల బాల్కనీలో నిల్చుంటే రాయరావు చెరువు నీటి అందాలు కనిపిస్తాయి. మొత్తం 42 కాటేజీలు నిర్మించగా వాటి ముందు భాగంలో ఆకర్షణీయ మైన క్రోటాన్లు, పూల మొక్కలు పెంచారు. ప్రాంగణంలో గ్రీనరీ డెవలప్ చేశారు. పనులన్నీ పూర్తికాగా త్వరలో అటవీశాఖ మంత్రి కొండా సురేఖ చేతుల మీదుగా ఎకో పార్క్ కాటేజీలను ప్రారంభించేందుకు అధికారులు సన్నాహాలు చేస్తున్నారు.
