హైదరాబాద్, వెలుగు : గోదావరి– కృష్ణా–పెన్నా– కావేరి నదుల అనుసంధానంపై ఫిబ్రవరిలో సంబంధిత రాష్ట్రాల సీఎంలతో సమావేశం నిర్వహించేందుకు కేంద్ర జలశక్తి శాఖ సిద్ధమవుతోంది. ఈ నదుల అనుసంధానంపై ఇప్పటికే ఆయా రాష్ట్రాలన్నీ ఏకాభిప్రాయం తెలపడంతో ప్రాజెక్టు డీపీఆర్పై కసరత్తు చేస్తున్నారు. రెండు వారాల్లో డీపీఆర్ రెడీ చేసి భాగస్వామ్య రాష్ట్రాలకు పంపేందుకు నేషనల్ వాటర్ డెవలప్మెంట్అథారిటీ (ఎన్డబ్ల్యూడీఏ) ఏర్పాట్లు చేస్తోంది. కేంద్ర జలశక్తి శాఖ మంత్రి గజేంద్రసింగ్ షెకావత్ అధ్యక్షతన నిర్వహించే సమావేశంలో తెలంగాణ సీఎం రేవంత్ రెడ్డి, ఏపీ సీఎం జగన్తో పాటు తమిళనాడు, కర్నాటక, చత్తీస్గఢ్, పుదుచ్చేరి సీఎంలు పాల్గొననున్నారు.
గోదావరి– కావేరి రివర్ లింకింగ్కు సంబంధించిన డ్రాఫ్ట్ డీపీఆర్ను ఇప్పటికే అన్ని రాష్ట్రాలకు ఎన్డబ్ల్యూడీఏ పంపింది. ఆయా రాష్ట్రాలు వ్యక్తం చేసిన అభిప్రాయాలు, అభ్యంతరాల ఆధారంగా తుది డీపీఆర్ రూపొందిస్తున్నారు. ఈ డీపీఆర్పై ఆయా రాష్ట్రాల అభిప్రాయాలు సేకరించేందుకు ఈ నెలాఖరుకు కేంద్ర జల శక్తి శాఖ కార్యదర్శి అధ్యక్షతన భాగస్వామ్య రాష్ట్రాల ఇరిగేషన్సెక్రటరీలతో మీటింగ్ నిర్వహిస్తున్నారు. గోదావరి (ఇచ్చంపల్లి)– కృష్ణా(నాగార్జునసాగర్)– పెన్నా (సోమశిల)– కావేరి (గ్రాండ్ఆనికట్) నదుల అనుసంధానానికి రూ.74,326 కోట్లు ఖర్చవుతాయని అంచనా వేశారు. ఇచ్చంపల్లి వద్ద రూ. 3.381 కోట్లతో బ్యారేజీ నిర్మించి, ప్రస్తుతం చత్తీస్గఢ్ వాడుకోని 148 టీఎంసీలను తరలించాలని నిర్ణయించారు.
సెక్రటరీల మీటింగ్లో ఎంఓయూలు
తమ వాటా నీటిని రివర్ లింకింగ్ కోసం వాడుకోవడంపై చత్తీస్ గఢ్ ఇప్పటికే అభ్యంతరం వ్యక్తం చేసింది. ఆ 148 టీఎంసీలను వినియోగించుకునేందుకు ఇప్పటికే సర్వే పూర్తి చేశామని, ప్రాజెక్టులు చేపట్టనున్నట్లు తెలిపింది. దీంతో మహానది నుంచి గోదావరి అనుసంధానిస్తామని, అప్పటి వరకు మాత్రమే చత్తీస్గఢ్ ఉపయోగించుకోని 148 టీఎంసీల నీటిని నదుల అనుసంధానంలో తరలిస్తామని కేంద్రం హామీ ఇచ్చింది. మహానది– గోదావరి అనుసంధానం పూర్తయితే 230 టీఎంసీలు అందుబాటులోకి వస్తాయని, ఆ నీటిని గోదావరి – కావేరి అనుసంధానంలో భాగంగా తరలిస్తామని ఎన్డబ్ల్యూడీఏ చెప్తోంది. ఈ నెలలో జరిగే సెక్రటరీల స్థాయి సమావేశంలో రివర్ లింకింగ్ ప్రాజెక్టు చేపట్టేందుకు ఎంవోయూలపై సంతకాలు చేయించనున్నారు. ఆ తర్వాత సీఎంల సమావేశంలో తుది నిర్ణయం తీసుకొని ప్రాజెక్టు చేపట్టనున్నారు. కాగా, రివర్ లింకింగ్లో భాగంగా తరలించే నీటిలో తెలంగాణకు 45 టీఎంసీలు కేటాయిస్తారు. ఈ రివర్ లింకింగ్ను జాతీయ ప్రాజెక్టుగా చేపట్టనున్నారు. దీంతో ప్రాజెక్టు నిర్మాణ వ్యయంలో 90% కేంద్రం, 10% నీటి వాటాల ఆధారంగా ఆయా భాగస్వామ్య రాష్ట్రాలు భరించాల్సి ఉంటుంది.