- దేశ భద్రతకే ముప్పు తెచ్చారు: భట్టి విక్రమార్క
- బీఆర్ఎస్ నేతలను ఏ ఒక్కరూ క్షమించబోరని హెచ్చరిక
- చట్ట ప్రకారమే చర్యలు.. వాళ్లలా ప్రొసీజర్లో జోక్యం చేసుకోం: శ్రీధర్బాబు
- ఎన్నికల్లో ప్రజలే బీఆర్ఎస్ తాట తీస్తారని వార్నింగ్
- ఉమ్మడి ఏపీలో కన్నా ఉద్యమకారులను దారుణంగా అణచివేసిన్రు: పొన్నం
- ఫోన్లు ట్యాప్ చేసింది కాక సమర్థించుకుంటున్నారని ఫైర్
హైదరాబాద్, వెలుగు: ఫోన్ ట్యాపింగ్తో దుర్మార్గంగా ప్రజల జీవితాల్లోకి గత బీఆర్ఎస్ సర్కార్ చొరబడిందని, ఆ పార్టీ నేతలను ఏ ఒక్కరూ క్షమించరని డిప్యూటీ సీఎం భట్టి విక్రమార్క, మంత్రులు శ్రీధర్బాబు, పొన్నం ప్రభాకర్ అన్నారు. కేసులో ఎవరున్నా వదిలిపెట్టే ప్రసక్తి లేదని హెచ్చరించారు. దేశ భద్రత కోసం తెచ్చిన చట్టాన్ని రాజకీయ అవసరాల కోసం ఫణంగా పెట్టారని, దీంతో దేశ భద్రతకే ప్రమాదాన్ని తీసుకొచ్చారని ఫైర్ అయ్యారు. శనివారం తుక్కుగూడలో జరిగే కాంగ్రెస్ సభ ఏర్పాట్లను గురువారం మధ్యాహ్నం డిప్యూటీ సీఎం భట్టి విక్రమార్క, సాయంత్రం మంత్రులు శ్రీధర్బాబు, పొన్నం ప్రభాకర్ పరిశీలించారు. అనంతరం మీడియాతో వాళ్లు మాట్లాడారు. ‘‘ఒకరిద్దరు లంగల ఫోన్లను ట్యాప్ చేసుండొచ్చు.. నాకైతే ఎర్కలే’’ అంటూ ఇటీవల కేటీఆర్ చేసిన కామెంట్లను తీవ్రంగా తప్పుబట్టారు.
‘‘రాష్ట్రాన్ని పాలించాలని జనం బాధ్యతలు అప్పగిస్తే.. వాళ్ల ఫోన్లనే ట్యాప్ చేసుడేంది? ఇంతకంటే ద్రోహం ఏమన్నా ఉన్నదా? భార్యభర్తలు, వ్యాపారస్తులు, జర్నలిస్టులు, అధికారులు, జడ్జీలు ఏ మాట్లాడుకుంటున్నారో తెలుసుకోవడానికి వాళ్ల బెడ్రూమ్‌‌లోకి ఫోన్ ట్యాపింగ్ రూపంలో దూరారు. ఇన్ని చేసి మాకేం సంబంధం అంటారా?” అని భట్టి విక్రమార్క నిలదీశారు. ‘‘ఫోన్ ట్యాపింగ్పై చట్ట ప్రకారమే చర్యలు ఉంటాయి. ఆ ప్రొసీజర్లో వారిలాగా(గత బీఆర్ఎస్ ప్రభుత్వంలాగా) మేము ఇన్వాల్వ్ కాబోం. ఎవరు తప్పు చేసినా వదిలిపెట్టే ప్రసక్తి లేదు” అని మంత్రి శ్రీధర్బాబు హెచ్చరించారు. ఉమ్మడి ఏపీలో కన్నా దారుణంగా గత బీఆర్ఎస్ ప్రభుత్వం ప్రతిపక్షాలు, సొంత పార్టీలోని నేతలను కూడా అణచివేసేందుకు, ఉద్యమాలను తొక్కి పెట్టేందుకు ఫోన్ ట్యాపింగ్కు పాల్పడిందని మంత్రి పొన్నం ప్రభాకర్ అన్నారు. పైగా ఒకరిద్దరు లంగల ఫోన్లు ట్యాప్ చేస్తే చేసుండొచ్చని మాట్లాడుతున్నారని ఆయన మండిపడ్డారు.
