- జనం స్వేచ్ఛగా ఓటెయ్యాలి:మంత్రి జూపల్లి కృష్ణారావు
హైదరాబాద్, వెలుగు: సర్పంచ్ ఎన్నికల్లో కొన్ని గ్రామాల్లో వేలం పాటలు, బలవంతపు ఏకగ్రీవాలు జరుగుతున్నాయనే సమాచారం ఉందని, ఇలాంటి చర్యలు ప్రజాస్వామ్యానికి విరుద్ధమని మంత్రి జూపల్లి కృష్ణారావు శనివారం ఒక ప్రకటనలో పేర్కొన్నారు. ‘సర్పంచ్ ఆశావహులు, ప్రజలతో ఉన్నవారు ప్రజా తీర్పుతోరండి. ప్రజాస్వామ్య తీర్పుతో వచ్చే పదవులను వేలం పాట ద్వారా పొందే వ్యక్తులు నా దగ్గరకు రావొద్దు.
వేలంపాటల ద్వారా పదవులు పొందడం ఏకగ్రీవం కాదు’ అని జూపల్లి పేర్కొన్నారు. బలవంతపు వేలంపాటల ద్వారా పదవులు దక్కించుకున్నవారు ప్రజల కష్టాల్లో భాగస్తులు కాలేరన్నారు. సర్పంచ్ ఎన్నికల్లో ప్రతి ఒక్కరూ ఎలాంటి ఒత్తిడి లేకుండా స్వేచ్ఛగా ఓటు వేసి సర్పంచులను ఎన్నుకోవాలని పిలుపునిచ్చారు.
