వనపర్తి, వెలుగు : రాష్ట్ర ప్రజలంతా బీఆర్ఎస్ వైపే ఉన్నారని, మూడోసారి కేసీఆర్ సీఎం అవుతారని మంత్రి నిరంజన్ రెడ్డి ధీమా వ్యక్తం చేశారు. మంగళవారం ఖిల్లా ఘనపురం మండల కేంద్రంలో పార్టీ నాయకులు కార్యకర్తలతో జరిగిన ఆత్మీయ సమ్మేళనంలో ఆయన మాట్లాడారు. బీఆర్ఎస్ విజయాన్ని ఏ శక్తి అడ్డుకోలేదని చెప్పారు. కరువుకు కాంగ్రెస్ పార్టీ ప్రత్యామ్నాయ పదమని, వారిని ప్రజలు ఎప్పటికీ నమ్మరని చెప్పారు. కరెంట్ కోతలు, యూరియా, డీజిల్ కోసం లైన్లలో నిలబడి ప్రజలు ఎంతో ఇబ్బంది పడ్డారని, మళ్లీ ఆ రోజులు రావన్నారు.
సాగునీటి వనరులను అభివృద్ధి చేసి ప్రతి ఎకరాకు నీరందించామని తెలిపారు. నిజాలాపూర్, మహ్మద్హుస్సేన్ పూర్ మధ్య రోడ్ ను బీటీగా మార్చేందుకు రూ.3.30 కోట్లు మంజూరయ్యాయని చెప్పారు. నియోజకవర్గంలో ఇప్పటికే 100 మందికి దళితబంధు ఇచ్చామని, రెండో విడతలో 1000 మందికి ఇస్తామన్నారు. కృష్ణనాయక్, లక్ష్మారెడ్డి, బాలీశ్వర్ రెడ్డి పాల్గొన్నారు.
