హైదరాబాద్, వెలుగు: దోబీఘాట్లు, సెలూన్లు, లాండ్రీలకు ఫ్రీ విద్యుత్ను కొనసాగించాలని అధికారులను మంత్రి పొన్నం ప్రభాకర్ ఆదేశించారు. రజకలు, నాయీ బ్రాహ్మణుల సంక్షేమానికి కాంగ్రెస్ ప్రభుత్వం కట్టుబడి ఉందని గురువారం ఒక ప్రకటనలో వెల్లడించారు. 2021–22 నుంచి లాండ్రీలు, సెలూన్లు, దోబీ ఘాట్లకు ప్రభుత్వం 250 యూనిట్ల వరకు ఉచితంగా విద్యుత్ను అందిస్తున్నదని గుర్తు చేశారు.
అయితే, దీనికి సంబంధించి గత ప్రభుత్వం డిస్కంలకు బకాయిలు పడిందని చెప్పారు. వాషర్మెన్లలో 76,060 మంది లబ్ధిదారులుండగా రూ.78.55 కోట్లు, నాయీ బ్రాహ్మణులు 36,526 మంది లబ్ధిదారులుండగా రూ.12.34 కోట్ల బకాయిలున్నాయని వివరించారు. ఈ బకాయిల చెల్లింపులకు సంబంధించి బడ్జెట్ను విడుదల చేయాల్సిందిగా ఆర్థిక శాఖను కోరినట్టు మంత్రి వెల్లడించారు. లాండ్రీలు, సెలూన్లు, దోబీఘాట్లకు కరెంట్ కనెక్షన్కట్ కాకుండా చూడాలని బీసీ సంక్షేమ శాఖ అధికారులను ఆదేశించారు. లబ్ధిదారులెవరూ అధైర్య పడవద్దని మంత్రి భరోసా ఇచ్చారు.
