ఉట్నూర్, వెలుగు : ఆదివాసీ, గిరిజనులకు రూ.5 కే భోజనాన్ని అందించనున్నట్టు ఉమ్మడి అదిలాబాద్ జిల్లా ఇన్చార్జి మంత్రి సీతక్క చెప్పారు. శుక్రవారం ఆమె ఉట్నూరులోని గిరిజన భవన్లో గిరిజన క్యాంటిన్ ప్రారంభించారు. ఉమ్మడి జిల్లాలోని ఏజెన్సీ ప్రాంతాలకు చెందిన ఆదివాసీలు, గిరిజనులు స్వయం సమృద్ధి సాధించేలా ప్రభుత్వం కృషి చేస్తోందన్నారు. గిరిజన క్యాంటిన్ద్వారా కొంతమంది కోలాం గిరిజనులకు ఉపాధి లభిస్తోందన్నారు. గిరిజన క్యాంటిన్లో రోజు మధ్యాహ్నం 12 గంటల నుంచి 2 గంటల వరకు రూ.5కే ప్లేట్ భోజనం లభిస్తుందన్నారు. ఆయా పనులకోసం మండల కేంద్రానికి వచ్చేవాళ్లకు ఉపయోగకరంగా ఉంటుందన్నారు. క్యాంటిన్ శాశ్వత షెడ్డు కోసం టెండర్లు పిలవాలని అధికారులను అదేశించారు.
అగ్రగామిగా ఆదిలాబాద్
ఉమ్మడి ఆదిలాబాద్ జిల్లాను రాష్ట్రంలోనే అగ్రగామిగా నిలపాలని, ఇందుకోసం అన్ని శాఖల అధికారులు ఒక్క జట్టుగా పని చేయాలని సీతక్క అన్నారు. శుక్రవారం ఉట్నూరులోని కుమ్రం భీం ప్రాంగణంలో ఉమ్మడి జిల్లా అధికారులతో రివ్యూ చేశారు. ఖానాపూర్ ఎమ్మెల్యే వెడ్మా బొజ్జు పటేల్, ఆదిలాబాద్, నిర్మల్, మంచిర్యాల, ఆసిఫాబాద్ జిల్లా కలెక్టర్లు రాజర్షి షా, ఆశీశ్ సాంగ్వాన్, సంతోష్, వెంకటేశ్ దొత్రో, నాలుగు జిల్లాల ఏస్పీలు, వివిధ శాఖల అధికారులు పాల్గొన్నారు. వెనుకబడిన జిల్లా అనే పేరును రూపుమాపాలన్నారు. వేసవిలో తాగు నీటి ఎద్దడి లేకుండా చర్యలు తీసుకోవాలన్నారు. ఏజెన్సీలో కలుషిత నీటిని వాడడంవల్ల వ్యాధులు ప్రబలే అవకాశాలుంటాయని, ఈ విషయంలో జాగ్రత్త వహించాలన్నారు. గంజాయి, డ్రగ్స్వల్ల దుష్ఫలితాలపై యువతకు అవగాహన కు కల్పించాలని సూచించారు. కాంగ్రెస్ ప్రభుత్వం ఎన్నికల్లో ఇచ్చిన హామీలను క్రమక్రమంగా అమలు చేస్తోందన్నారు. పెండింగ్లో ఉన్న అభివృద్ధి పనులను త్వరితంగా పూర్తి చేసేందుకు కృషి చేస్తానన్నారు.
