హైదరాబాద్ సిటీ, వెలుగు: జూబ్లీహిల్స్ ఉప ఎన్నికలో గెలుపు కోసం వ్యూహాత్మకంగా పనిచేయాలని మంత్రి తుమ్మల నాగేశ్వరరావు కార్యకర్తలకు సూచించారు. శుక్రవారం బూత్ లెవల్ కమిటీ సభ్యులతో సమీక్షా సమావేశం నిర్వహించారు. రాష్ట్ర సీడ్స్ డెవలప్మెంట్ కార్పొరేషన్ చైర్మన్ అన్వేశ్ రెడ్డి, కో ఆపరేటివ్ ఆయిల్ సీడ్స్ గ్రోవర్స్ ఫెడరేషన్ చైర్మన్ జంగ రాఘవ రెడ్డి, రాష్ట్ర గ్రంథాలయ చైర్మన్ రియాజ్, మైనారిటీస్ ఫైనాన్స్ కార్పొరేషన్ చైర్మన్ ఒబేదుల్ల కొత్వాల్ పాల్గొన్నారు.
ఈ సందర్భంగా మంత్రి మాట్లాడుతూ.. కొత్త, పాత అనే భేదాలు లేకుండా కార్యకర్తలందరూ సమన్వయంతో ముందుకు సాగాలని సూచించారు. ప్రభుత్వ సంక్షేమ పథకాలు, అభివృద్ధి కార్యక్రమాలను ఇంటింటికీ తెలియజేసి ఓటర్లలో చైతన్యం తీసుకురావాలన్నారు. ప్రతి డివిజన్లో జరిగిన అభివృద్ధి పనుల జాబితా సిద్ధం చేసి, ప్రజలకు చూపించాలని, అలాగే రాబోయే పీఏసీ సమావేశం కోసం సమగ్ర నివేదిక రూపొందించాలన్నారు.
