- అధికారులతో భేటీలో మంత్రి తుమ్మల ఆదేశం
హైదరాబాద్, వెలుగు: రాష్ట్ర వ్యవసాయ రంగాన్ని ప్రపంచం గుర్తించేలా చేయాలని అధికారులను మంత్రి తుమ్మల నాగేశ్వరరావు ఆదేశించారు. విజన్ డాక్యుమెంట్ 2047లో వ్యవసాయ రంగాన్ని ప్రపంచ స్థాయికి తీసుకెళ్లేలా అగ్రిచాప్టర్ ఉండాలన్నారు. శనివారం సెక్రటేరియట్లో వ్యవసాయ శాఖ అధికారులతో మంత్రి తుమ్మల ఉన్నత స్థాయి సమావేశం నిర్వహించారు.
ఆయన మాట్లాడుతూ.. రైతు కేంద్రీకృత ప్రణాళికలు, రైతు ఆదాయం పెంపు, నాణ్యతాయుత ఉత్పాదకత, సాంకేతిక పరిజ్ఞాన వినియోగం వంటి అంశాలు అగ్రిచాప్టర్ లో ప్రధానంగా ఉండాలన్నారు. రైతులు పండించే ఉత్పత్తులకు మెరుగైన మార్కెటింగ్ అవకాశాలు కల్పించడం, విలువ జోడించే అగ్రిప్రాసెసింగ్ వ్యవస్థలను విస్తృతంగా అభివృద్ధి చేయడం అత్యంత కీలకమని పేర్కొన్నారు. రాష్ట్రాన్ని గ్లోబల్ సీడ్ హబ్‌‌‌‌‌‌‌‌గా తీర్చిదిద్దాలన్నారు. నాణ్యమైన విత్తన ఉత్పత్తులు, సర్టిఫికేషన్ వ్యవస్థలు, ఎగుమతి ప్రమాణాలను మరింత బలోపేతం చేయాలని సూచించారు.
