కామేపల్లి, వెలుగు : గత బీఆర్ఎస్ ప్రభుత్వం పదేండ్లలో పేదలకు ఇండ్లు ఇవ్వలేకపోయిందని, తాము అర్హులందరికీ ఇందిరమ్మ ఇండ్లు ఇస్తామని ఇల్లెందు ఎమ్మెల్యే కోరం కనకయ్య అన్నారు. శుక్రవారం మండలంలోని పింజరమడుగు గ్రామంలో పెండింగ్లో ఉన్న డబుల్ బెడ్ రూమ్ ఇండ్లను ఆయన పరిశీలించారు. ఈ సందర్భంగా మాట్లాడుతూ తెలంగాణ రాష్ట్రాన్ని గత బీఆర్ఎస్ పాలకులు ప్రజా అవసరాలను గాలికి వదిలి రాష్ట్రాన్ని దోచుకు తిన్నారని ఆరోపించారు.
ఇందిరమ్మ రాజ్యంలో ప్రజలకు ఇచ్చిన అన్ని హామీలను నెరవేరుస్తున్నామని తెలిపారు. పెండింగ్లో ఉన్న డబుల్ బెడ్ రూమ్ ఇండ్ల అన్నీ త్వరగా పూర్తిచేసి లబ్ధిదారులకు పంపిణీ చేయాలని అధికారులకు ఆయన సూచించారు. అనంతరం గణేశ్ మండపాల్లో ప్రత్యేక పూజలు చేశారు. ఈ కార్యక్రమంలో రాష్ట్ర అగ్రికల్చర్ కమిషన్ డైరెక్టర్ రామ్ రెడ్డి గోపాల్ రెడ్డి, డీసీసీబీ డైరెక్టర్ మేకల మల్లిబాబు యాదవ్, ఇల్లెందు వ్యవసాయ మార్కెట్ కమిటీ చైర్మన్ రాంబాబు, తహసీల్దార్ సుధాకర్, ఎంపీడీవో రవీందర్ తదితరులు పాల్గొన్నారు.
