దుబ్బాక, వెలుగు: కత్తులను నమ్ముకునే సంస్కృతి కాదని, రాజ్యాంగం కల్పించిన ఓట్లు, చట్టాలు, ప్రజలను నమ్ముకుని ప్రజాక్షేత్రంలో ముందుకు వెళుతున్నానని ఎమ్మెల్యే రఘునందన్రావు అన్నారు. ఆదివారం మండలంలోని లచ్చపేట, ఆకారం, రఘోత్తంపల్లి, గోసాన్ పల్లి గ్రామాల్లో ఎన్నికల ప్రచారం నిర్వహించారు. ఈ సందర్భంగా ఆయన మాట్లాడుతూ.. ఎంపీ కొత్త ప్రభాకర్ రెడ్డిపై జరిగిన కత్తి తాడి బీజేపోల్లే చేశారని, గ్రామాల్లో సోషల్ మీడియాలో దుష్ప్రచారం చేస్తున్నారని మండిపడ్డారు.
తాను ప్రజాస్వామ్య బద్ధంగా నడుచుకునే వ్యక్తినని, కత్తులతో దాడులు చేయించే సంస్కృతి తన ఇంటా వంటా లేదన్నారు. ప్రభాకర్రెడ్డి రెండు సార్లు ఎంపీగా గెలిచాడని, ఎనగుర్తి, బొప్పాపూర్, ఆకారం, రఘోత్తంపల్లి, గోసాన్ పల్లి గ్రామాల మీదుగా వెళ్తున్న గుంతల మయమైన రోడ్డును ఏనాడైనా పట్టించుకున్నాడా అని ప్రశ్నించారు. సీఎం కేసీఆర్ ఇంటికో ఉద్యోగం, దళిత బంధు, బీసీ బంధు, మైనార్టీ బంధు, గృహలక్ష్మి పథకం ఎంతమందికి ఇచ్చారో చెప్పాలని డిమాండ్ చేశారు. బీఆర్ఎసోళ్లు చెప్పే మాయ మాటలకు మళ్లీ మోసపోకుండా మరొక్కసారి బీజేపీకి ఓటు వేసి అఖండ మెజార్టీతో గెలిపించాలని పిలుపు నిచ్చారు.
