బయట వర్షం పడుతున్నపుడు వేడి వేడి వంటకాలను ఆస్వాదించాలని దాదాపు అందరికీ ఉంటుంది. అయితే, ఈ వర్షాకాలంలో మధుమేహం ఉన్నవారు మాత్రం ఈ విషయంలో అదనపు జాగ్రత్తలు తీసుకోవాలి. వర్షాకాలం చాలా మనోహరంగా కనిపించవచ్చు, కానీ ఇది చాలా అనారోగ్యాలు, అంటువ్యాధులు, ఇతర ఆరోగ్య సమస్యలను కూడా తీసుకువస్తుంది. మధుమేహం రోగనిరోధక శక్తిని బలహీనపరుస్తుందని మీకు తెలుసా? దీని వల్ల స్ట్రీట్ ఫుడ్ ను తీసుకోవడం చాలా ఇష్టంగా అనిపించినప్పటికీ, మధుమేహం ఉన్న వ్యక్తులు నీటి ద్వారా వచ్చే వ్యాధులను అభివృద్ధి చేసే ప్రమాదాన్ని తగ్గించడానికి బయట భోజనానికి దూరంగా ఉండాలి. ఇంట్లో వండిన ఆహారాన్ని, రోగనిరోధక శక్తిని పెంచే ఆహారాలకు తీసుకోవడం చాలా ఉత్తమం. అంతే కాదు ఇందులో శరీరానికి మేలు చేసే యాంటీఆక్సిడెంట్లు కూడా ఉంటాయి.
పాదాలను జాగ్రత్తగా చూసుకోండి:
మధుమేహం ఉన్నవారికి ఈ సీజన్ పాదాలు ప్రమాదంలో పడవచ్చు. చిన్న కోత కూడా హానికరమైన ప్రభావాలను కలిగిస్తుంది. అధిక రక్త చక్కెర ఫలితంగా రక్త ప్రసరణ బలహీనపడుతుంది. ఫలితంగా పాదంలోని నరాలు దెబ్బతింటాయి. ఈ పరిస్థితిని న్యూరోపతి అంటారు. కాబట్టి పాదాలను జాగ్రత్తగా చూసుకోవాలి.
కళ్ళను జాగ్రత్తగా చూసుకోండి:
వర్షాకాలం కంటి ఇన్ఫెక్షన్‌లకు ప్రసిద్ధి చెందిన సమయం. కాబట్టి కంటి ఇన్ఫెక్షన్లను నివారించడానికి చేతులను ఎల్లప్పుడూ శుభ్రంగా ఉంచుకోండి. కళ్ళను పదే పదే తాకకుండా ఉండండి.
హైడ్రేషన్ కీలకం:
వర్షాకాలంలో నీరు అందుబాటులో ఉన్నప్పటికీ, శరీరం ఎల్లప్పుడూ హైడ్రేటెడ్‌గా ఉండకపోవచ్చు. కొన్నిసార్లు వేడి, తేమ నిర్జలీకరణానికి దారితీయవచ్చు. అందుకోసం మధుమేహ వ్యాధిగ్రస్తులు ఎప్పటికప్పుడు శరీరానికి తగినంత నీరు అందేలా చూసుకోవాలి. నీటి స్థానంలో కొబ్బరి నీళ్లను కూడా ఉపయోగించవచ్చు.
రెగ్యులర్ వ్యాయామం:
వర్షాకాలంలో వాతావరణం చల్లగా ఉంటుంది. కాబట్టి ఇంట్లో నుంచి అస్సలు బయటకు రావాలనిపించదు. ఎక్కువ సమయం బెడ్‌పైనే ఉండాలనిపిస్తుంది. కానీ ముఖ్యంగా మధుమేహ వ్యాధిగ్రస్తులు క్రమం తప్పకుండా వ్యాయామం చేయాలి. చురుకుగా ఉండాలి. ఇందుకు ఇంట్లోనే సాధారణ వ్యాయామం చేయవచ్చు. ఇది రక్తంలో చక్కెర స్థాయిలను కూడా తగ్గిస్తుంది, ఇన్సులిన్ సెన్సిటివిటీని సైతం పెంచుతుంది.
ఆరోగ్యకరమైన భోజనం తినండి:
మధుమేహ వ్యాధిగ్రస్తులు ఈ సమయంలో ఆహార ఎంపికల విషయంలో జాగ్రత్తగా ఉండాలి. దయచేసి ఇంట్లో వండిన ఆహారాన్ని మాత్రమే తినండి. శుభ్రమైన ఆహారంలో పోషకాలు అధికంగా ఉంటాయి. ఇది రోగనిరోధక శక్తికి సహాయపడుతుంది.
ఈ రకమైన జీవనశైలిలో మార్పులు చేసుకోవడం, రక్తంలో చక్కెర స్థాయిలను తరచుగా పర్యవేక్షించడం, సరైన పరిశుభ్రతను పాటించడం ద్వారా మధుమేహాన్ని అదుపులో ఉంచుకోవచ్చు, వర్షాకాలంలోనూ ఆరోగ్యంగా ఉండవచ్చు.
