కోల్బెల్ట్, వెలుగు : క్యాతనపల్లి మున్సిపాలిటీ 9వార్డు బీఆర్ఎస్ కౌన్సిలర్ పారిపెల్లి తిరుపతి తమను అకారణంగా దూషించి, బెదిరింపులకు పాల్పడ్డంటూ మున్సిపల్ కాంట్రాక్ట్ కార్మికులు ఆందోళనకు దిగారు. సోమవారం తెల్లవారుజామున మున్సిపల్ ఆఫీస్ వద్ద కౌన్సిలర్ తీరును నిరసిస్తూ కార్మికులు నల్లబ్యాడ్జీలు ధరించి నిరసన వ్యక్తం చేశారు. ఈ సందర్భంగా పలువురు కార్మికులు మాట్లాడుతూ..
ఆదివారం తొమ్మిదో వార్డులో ప్రజల వద్దకు వెళ్లి హోలీ పండుగ సందర్భంగా డొనేషన్స్ ఆడుగుతుండగా వార్డు బీఆర్ఎస్ కౌన్సిలర్ పారిపెల్లి తిరుపతి తమపై నోటికొచ్చినట్లు అసభ్యపదజాలతో తిట్టాడన్నారు. బెదిరిస్తూ తమను కొట్టేందుకు వచ్చాడని ఆరోపించారు.
సపాయి పనులు చేసే తమపై దౌర్జన్యం చేసేందుకు వచ్చిన కౌన్సిలర్పై కఠిన చర్యలు తీసుకోవాలని, బేషరత్తుగా కౌన్సిలర్ క్షమాపణలు చెప్పాలని కార్మికుడు డిమాండ్ చేశారు. నిరసన కార్యక్రమంలో మహేందర్, తిరుపతి, దేవవరం, రాజు, శ్రీనివాస్, శంకర్, సురేశ్, రాజాలింగు తదితరులు పాల్గొన్నారు.
