రికార్డింగ్ స్టూడియోలో ఆఫీసు బాయ్ గా పనిచేశా

V6 Velugu Posted on Nov 21, 2021

సురేశ్​ బొబ్బిలి.. ఈ పేరు వినంగనే  మనిషి యాదికి రాకపోవచ్చు. కానీ, ఈ తెలంగాణ పిలగాడు  కంపోజ్​ చేసిన‘కోలు కోలమ్మా.. కోలు కోలు నా సామి..’ పాట మాత్రం అందరి నోట్లో ఆడుతోంది. ఏండ్ల సంది పల్లెల్లో వినిపిస్తున్న ఈ జానపదానికి ‘విరాటపర్వం’ సినిమాలో  కొత్తరూపం ఇచ్చిండు ఈ మ్యూజిక్ డైరెక్టర్​. మనసుని హత్తుకునేలా ట్యూన్స్​ కట్టి  ఇండస్ట్రీని తనవైపు తిప్పుకున్నడు. సౌండ్​ ఇంజినీర్​గా​ కెరీర్​  షురూ చేసి, బ్యాక్​ గ్రౌండ్​ స్కోరర్​గా,  మ్యూజిక్​ డైరెక్టర్​గా సెపరేట్​ ఫ్యాన్​ బేస్​ క్రియేట్​ చేసుకున్న ఈ మ్యుజీషియన్​ మ్యూజికల్​ జర్నీయే ఇది..

పాటంటే ప్రాణం. అందుకే.. పాట కోసం బడిని పక్కనపెట్టిండు సురేశ్​ బొబ్బిలి. పుట్టి, పెరిగిన ఊరికి దూరంగ సిటీకొచ్చిండు.  పాటని అంటిపెట్టుకుని ఉండనీకి రికార్డింగ్​ స్టూడియోలో ఆఫీసు​ బాయ్​గ చేరిండు. అవకాశాల్ని వెతుక్కుంట కిలోమీటర్లు నడిచిండు. చివరాఖరికి  అనుకున్నది సాధించిండు. ‘‘నా ప్రతి సినిమాకి కథని బట్టే మ్యూజిక్​ చేస్త. ఎక్కడా కావాల్నని పాటలు ఇరికించను’’ అంటున్నడు ఈ యంగ్​ మ్యూజిక్​ డైరెక్టర్​. 

డిగ్రీ పేరుచెప్పి సిటీకొచ్చిన
‘‘మా సొంతూరు మహబూబాబాద్​ జిల్లాలోని గౌరారం. మా అమ్మ కాంతమ్మ. ఆమె నోటెంట వచ్చే జానపదాలంటే మా  ఊరంతా చెవికోసుకుంటది. బాయి కాడ అమ్మ పాట అందుకుంటే నాట్లు, కోతలు పొద్దు తెలియకుండనే పూర్తయ్యేటివి. మా బాపు శంభయ్య ఫ్లూటు వాయించెటోడు. స్టేజ్​ ఆర్టిస్ట్​ కూడా. మా అన్న నరిరాజ్​ కూడా పాటలు పాడతడు.  మ్యూజిక్​ డైరెక్టర్​ చక్రి అన్న మా పక్క ఊళ్లోనే ఉండెటోడు. చుట్టూ ఇంతమంది మ్యుజీషియన్​లుంటే చదువు మీద మనసు ఎట్ల నిలుస్తది. కానీ, బడికి  పోనంటే ఇంట్లో ఊరుకోరు. అందుకే మా ఊళ్లోని గవర్నమెంట్​ బడిలో ఐదో క్లాస్​ వరకు చదువుకున్న. ఆ తర్వాత మహబూబాబాద్​లోని  గవర్నమెంట్​ హాస్టల్​లో ఉండుకుంట టెన్త్​ పూర్తి చేసిన. అప్పటికే మా అన్న చక్రి  ‘సాహితి కళాభారతి’ ఆర్కెస్ట్రాలో పాటలు పాడుతుండెటోడు. ఇంటర్​ చదువుకుంట నేను కూడా ఆ ట్రూప్​లో చేరిన. నా ఇంటర్​ పూర్తయ్యే టైంకి  చక్రి అన్న సిటీకొచ్చి మ్యూజిక్​ డైరెక్టర్​గా మంచి పేరు తెచ్చుకున్నడు. మా అన్న కూడా  సినిమా ప్రయత్నాలు మొదలుబెట్టిండు. వాళ్లని ఇన్​స్పిరేషన్​గ తీస్కొని నేను కూడా హైదరాబాద్​ రావాల్ననుకున్న. వరంగల్​లోని ‘పోతన’ మ్యూజిక్​ కాలేజీలో హిందూస్తానీ మ్యూజిక్​ నేర్చుకుని సిటీ బాట పట్టిన. డిగ్రీ  సాకుతో సిటీకొచ్చి సినిమా ప్రయత్నాలు మొదలుపెట్టిన.

అన్న స్టూడియోలో.. ఆఫీసు బాయ్​గ
పార్ట్​ టైం జాబ్ చేసుకుంట డిగ్రీ ఫస్ట్​ ఇయర్​  పూర్తి చేసిన. ఆ తర్వాత చదువుకన్న మ్యూజిక్​ ముఖ్యమనిపించి ఇటు వైపు వచ్చిన. అప్పటికే అన్న దోస్తులతో కలిసి రికార్డింగ్​ స్టూడియో పెట్టిండు. కొన్ని చిన్న సినిమాలకి మ్యూజిక్​ కూడా చేస్తుండు. దాంతో అన్నకాడికి పోయి ‘నీతో కలిసి స్టూడియోలోనే ఉంటన’ని చెప్పిన. కానీ, ‘ఎక్స్​ట్రా ఖర్చు ఎందుక’ని మిగతా పార్ట్​నర్స్​ వద్దన్నరు. దాంతో అదే  స్టూడియోలో ఆఫీసు బాయ్​గ పనికి కుదిరిన. అక్కడికి వచ్చిపోయే క్లైంట్​​లకి  ‘ఇది మా అన్న స్టూడియో’ అని ఎప్పుడూ చెప్పకపోయేటోడ్ని. దాంతో చానామంది ఆఫీస్​బాయ్​ అని చులకనగ చూసెటోళ్లు. అయినా వెనక్కి తగ్గలే.. ఉద్యోగం చేసుకుంట ఖాళీ దొరికినప్పుడల్లా సౌండ్​ ఇంజినీరింగ్ నేర్చుకున్న. ఆర్నెల్లలోనే  పర్ఫెక్ట్​ అయిన. యూట్యూబ్​లో వీడియోలో చూసుకుంట  మ్యూజిక్​ ప్రోగ్రామింగ్​,  మిక్సింగ్ ఎట్ల చేయాలి? కీ బోర్డు ఎట్ల వాడాలో నేర్చుకున్న.  కానీ, నిరూపించుకోనీకి అవకాశాలు లేవు. పైగా స్టూడియోలో జీతం ఇచ్చేటోళ్లు కాదు. దాంతో ఖర్చులకి  అన్న హెల్ప్​ చేసినా ఇబ్బంది అయ్యేటిది. చానాసార్లు ఫిల్మ్​ నగర్​ నుంచి  కృష్ణానగర్​, మణికొండ నడుచుకుంట పోయిన. సినిమా ఆఫీసులకి  కూడా నడిచెళ్లేటోడ్ని. అది వాళ్లకి తెలియకుండ ఆఫీసుకి కొంచెం ముందు ఆగి డ్రెస్​ సరిచేసుకుంట ఆటో దిగినట్టు బిల్డప్​ ఇచ్చెటోడ్ని.  ఆఫీసులోనికి వెళ్లంగనే చానామంది చెప్పుల నుంచి జుట్టు వరకు స్కాన్​ చేసేటోళ్లు. నా అప్పియరెన్స్​ చూసి, నా వర్క్​ని  కాలిక్యులేట్​ చేసేటోళ్లు. అది చానా బాధనిపించేటిది. 

వీ6 గుర్తింపునిచ్చింది
తెలంగాణ పాటల్ని కొత్తగ ప్రజెంట్​ చేయాల్నన్న ఆలోచన చిన్నప్పట్నించి ఉండేటిది. అందుకే తెలంగాణ మూమెంట్​ టైంలో తెలంగాణ పాటల కలర్​ మార్చుతూ కొన్ని ట్యూన్స్​ కట్టిన. వాటిని తీసుకుని వీ6 ఛానెల్​ సీఈవో అంకం రవిగారిని కలిస్తే వెంటనే   ఓకే చేసిన్రు. అలా వీ6తో కలిసి నేను చేసిన  ‘నన్ను గన్న తల్లి నా జన్మభూమి’  పాట సూపర్​ హిట్​ అయింది. తెలంగాణ అనౌన్స్​మెంట్​కి ముందే ఆ పాట రిలీజ్​ అవడంతో ప్రపంచమంతా ఆ పాట దిక్కే చూసింది. ఆ తర్వాత వీ6లో రిలీజ్​ అయిన మొదటి బతుకమ్మ పాట కంపోజ్​ చేసిన. ఆ పాటతోనే బతుకమ్మ పాటల కల్చర్​ షురూ అయింది. ఆ వెంటనే వీ6లో చేసిన బతుకమ్మ , బోనాల పాటలు నన్ను జనాలకి మరింత దగ్గర చేసినయ్​. నా లైఫ్​ని పూర్తిగా మార్చేసినయ్​. వీ6 వల్లే నాకు సినిమా అవకాశాలు కూడా వచ్చినయ్​. 

టెస్ట్​ చేసి అవకాశమిచ్చిన్రు
ఒకరోజు యాడ్ కంపోజిషన్​ కోసం డైరెక్టర్​ వేణు ఉడుగుల స్టూడియోకి వచ్చిండు. ఆ యాడ్​ ​మిక్సింగ్​ నేనే చేస్తున్న. ఆ టైంలోనే నా పని చూసి ‘నీకు పాడటం వచ్చా?’ అని అడిగిండు వేణు. పాడి వినిపించిన. ‘కంపోజింగ్​ వచ్చా?’ అని అడిగిండు మళ్లా. నేను చేసిన కొన్ని ట్యూన్స్​​ వినిపించిన. ఆ వెంటనే ‘నేనొక సినిమా చేస్తున్నా. అవకాశం ఇస్తే హ్యాండిల్ చేయగలవా?’ అని అడిగిండు. అప్పటికే వాళ్లొక ఎక్స్​పీరియెన్స్​డ్​ మ్యూజిక్​ డైరెక్టర్​ని అనుకున్నరు. కానీ, నేనేమో ఇండస్ట్రీకి కొత్త. దాంతో డిఫరెంట్​ సిచ్యుయేషన్స్​ ఇచ్చి టెస్ట్​ చేసిన్రు. అన్నింట్లో పాస్​ అవడంతో  ‘నాదీ నీది ఒకటే కథ’ సినిమాకి ఫైనల్​ చేసిన్రు. కానీ, బడ్జెట్ ​ లేక సినిమా కొంచెం లేటు అయింది. ఆ లోపే నేను బ్యాక్ గ్రౌండ్​ స్కోర్​ ఇచ్చిన ‘అప్పట్లో ఒకడుండేవాడు’  సినిమా  థియేటర్స్​లోకి వచ్చింది. ఆ సినిమా రిలీజ్​ అయ్యాక బ్యాక్​గ్రౌండ్​ స్కోర్​కి అవకాశాలు పెరిగినయ్​. ‘నీది నాది ఒకే కథ’ పాటలు హిట్​ అవడంతో మ్యూజిక్​ డైరెక్టర్​గా కూడా ఛాన్సులు వచ్చినయ్​.  

ఆ ఎఫెక్ట్​ పడింది
‘జార్జి​ రెడ్డి’, ‘తోలు బొమ్మలాట’, ‘తిప్పరా మీసం’, ‘అక్షర’ ‘ముగ్గురు మొనగాళ్లు’.. ఇట్ల నేను చేసిన సినిమాలన్నింటికీ మ్యూజిక్​ పరంగా మంచి మార్కులే పడినయ్​. ‘పేపర్​ బాయ్’​, ‘ ప్లే బ్యాక్​’, ‘తుపాకి’ లాంటి చానా సినిమాలకి సౌండ్​ ఇంజినీర్​గా కూడా చేసిన. కానీ, సినిమాలు ఆడకపోవడం నా కెరీర్​కి మైనస్​ అయింది. ఆ వెలితిని ‘ విరాట పర్వం’ పూడ్చుతుందని బలంగ నమ్ముతున్న.  ఈ సినిమా  కోసం మూడేళ్ల నుంచి కష్టపడుతున్న. హీరో, హీరోయిన్లు ఫైనల్​ కాకముందు నుంచే ఈ ప్రాజెక్ట్​ కోసం పనిచేస్తున్న. ఈ సినిమా కోసం రూరల్ ఏరియాలకెళ్లి పాటలు కలెక్ట్ చేసిన. వాటి నుంచి ఇన్​స్పైర్​ అయి కొత్త ట్యూన్స్​ కట్టిన. ఇప్పటికే రిలీజ్​ అయిన ‘కోలు కోలు.. ’ పాట మంచిగ జనాల్లోకి వెళ్లింది. ఈ సినిమాలో పద్యాలు కూడా ఉంటయ్. సినిమాలో రానాతో ఒక పాట పాడించిన.  అయితే ఈ మధ్య విరాటపర్వం నుంచి నేను తప్పుకున్నాననే రూమర్స్​ బాధపెట్టాయి.

ఆ సలహాలు ఇబ్బంది పెడతయ్
వంద కోట్లు పెట్టి సినిమా తీస్తరు. కానీ, సినిమా మెయిన్​​ పిల్లరైన​ మ్యూజిక్​కి పది లక్షల బడ్జెట్​ ఇస్తరు. అట్లనే ట్యూన్స్​ డైరెక్టర్​కి నచ్చితే సరిపోతది. కానీ, అసలు  సంబంధమే లేనోళ్లు వేళ్లు పెడతరు. ప్రొడ్యూసర్​ వాళ్ల కొడుకొస్తడు. బావ వస్తడు. ‘మ్యూజిక్ అట్ల చెయ్యి, ఇట్ల చెయ్యి’ అని సలహాలు ఇస్తరు. సినిమా​ ఏం కోరుకుంటుందో నాకు, డైరెక్టర్​కి​ తెలుస్తది.  అయినా మ్యూజిక్​ నేర్చుకున్నది నేను. అలాంటిది నన్ను  పక్కనపెట్టి సినిమాలో ఎలాంటి మ్యూజిక్​ ఉండాలో వాళ్లు ఎట్ల డిసైడ్​ చేస్తరో అర్థం కాదు. ఇంకొందరైతే ఏకంగా కొన్ని పాటల క్లిప్పింగ్స్​ బ్యాంకింగ్​ పెట్టుకుంటరు. వాటిని కాస్త అటుఇటు మార్చమని అడుగుతరు. ఈ సమస్యలన్నీ దాదాపుగా అందరి మ్యూజిక్​ డైరెక్టర్​లకి ఉండేవే. అయితే, అందరూ ఇట్లనే ఉంటరని నేను చెప్పను.

ఆ లోటు తీర్చలేనిది
నేను ఇండస్ట్రీకి రాకముందే అమ్మ చనిపోయింది. నా ఫస్ట్​ సినిమా రిలీజ్​కి ముందే నాన్న కూడా చనిపోయిన్రు. నా సక్సెస్​ చూడకుండనే వెళ్లిపోయారన్న బాధ ఎప్పటికీ ఉంటది. కానీ, ఆ బాధలోనే ఉండిపోతే వాళ్లు తిరిగిరారు. అందుకే కెరీర్​పైనే ఫోకస్​ అంతా పెట్టిన. ఎప్పుడైనా బాధనిపిస్తే ఊరెళ్లి వాళ్ల గుర్తుల్లో గడుపుతా” అని చెప్పిండు సురేశ్​ బొబ్బిలి.

నా పాటలు ప్లస్​ అవ్వాలి
బ్యాక్​ గ్రౌండ్​ స్కోర్​ కన్నా పాటలు చేయడమే తేలిక అనిపిస్తది నాకు. బ్యాక్​ గ్రౌండ్​ స్కోర్​ సినిమాకి భుజం లెక్క..అది ఎప్పుడూ సీన్​ని పదింతలు లేపేటట్లు ఉండాలే తప్ప సీన్​ని పడేసేలా ఉండకూడదు. అందుకే ఎక్కువ వర్కవుట్​ చేయాల్సి ఉంటది. కానీ, పాటలకొచ్చే సరికి సిచ్యుయేషన్​ చెప్పంగనే ట్యూన్​ వచ్చేస్తది చానాసార్లు.  ఫ్యూచర్​లో చిన్నా, పెద్దా అని లేకుండ మంచి కథలకి మ్యూజిక్​ చేయాలనుకుంటన్న. సినిమాని లిఫ్ట్​ చేసేలా నా మ్యూజిక్​ ఉండాలనుకుంటన్న. 
::: ఆవుల యమున
 

Tagged Movies, Music, tollywood, suresh bobbili

Latest Videos

Subscribe Now

More News