బ్రిటన్: ఇంగ్లాండ్ స్టార్ క్రికెటర్ జోస్ బట్లర్ అరుదైన ఘనత సాధించాడు. వైట్ బాల్ క్రికెట్ (వన్డే, టీ20) చరిత్రలోనే 350 ప్లస్ బౌండరీలు సాధించిన ఐదో ప్లేయర్గా రేర్ ఫీట్ నెలకొల్పాడు. ఆదివారం (అక్టోబర్ 20) క్రైస్ట్‌చర్చ్‌లోని హాగ్లీ ఓవల్‌ స్టేడియం వేదికగా న్యూజిలాండ్తో జరిగిన టీ20లో ఒక ఫోర్ బాదడం ద్వారా బట్లర్ ఈ రికార్డ్ అందుకున్నాడు.
ఈ మ్యాచులో బట్లర్ కొట్టిన ఏకైక ఫోర్ ఇదే కావడం గమనార్హం. తద్వారా వన్డే, టీ20.. రెండు ఫార్మాట్లలో కలిపి 350 లేదా అంతకన్నా ఎక్కువ బౌండరీలు సాధించిన ఆటగాళ్ల జాబితాలో ఐదో ప్లేయర్గా బట్లర్ తన పేరు లిఖించుకున్నాడు. ఈ జాబితాలో బట్లర్ కంటే రోహిత్ శర్మ , విరాట్ కోహ్లీ, పాల్ స్టిర్లింగ్, బాబర్ అజామ్‌ ముందున్నారు.
ఇక మ్యాచ్ విషయానికొస్తే.. సోమవారం (అక్టోబర్ 20) క్రైస్ట్ చర్చ్ వేదికగా జరిగిన ఈ మ్యాచ్లో కివీస్పై 65 పరుగుల తేడాతో ఇంగ్లాండ్ ఘన విజయం సాధించింది. బ్రూక్ (35 బంతుల్లో 78: 6 ఫోర్లు, 5 సిక్సర్లు), సాల్ట్ (56 బంతుల్లో 85: 11 ఫోర్లు, సిక్సర్) హాఫ్ సెంచరీలతో చెలరేగి ఆడారు.
మొదట బ్యాటింగ్ చేసిన ఇంగ్లాండ్ నిర్ణీత 20 ఓవర్లలో 4 వికెట్ల నష్టానికి 236 పరుగుల భారీ స్కోర్ చేసింది. లక్ష్య ఛేదనలో న్యూజిలాండ్ 18 ఓవర్లలో 171 పరుగులకు ఆలౌట్ అయింది. ఈ విజయంతో మూడు టీ20 మ్యాచ్ల సిరీస్లో 1-0 తేడాతో ఇంగ్లాండ్ ఆధిక్యంలో నిలిచింది.
