నటసింహం నందమూరి బాలకృష్ణ , మాస్ డైరెక్టర్ బోయపాటి శ్రీను కాంబినేషన్ లో వస్తున్న మరో ప్రతిష్టాత్మక చిత్రం 'అఖండ 2: తాండవం'. భారీ అంచనాలతో ప్రపంచ వ్యాప్తంగా ఈ మూవీ డిసెంబర్ 5న విడుదలకు సిద్ధమవుతోంది. ఇప్పటికే ఓవర్సీస్ లో సినిమా టికెట్స్ సెల్ మొదలైంది. విదేశాల్లో బాలయ్యకు ఉన్న ఫాలోయింగ్ దృష్ట్యా 'అఖండ 2' మూవీ టికెట్లు హాట్ కేక్ లా అమ్ముడవుతున్నాయి. ఈ క్రమంలోనే జర్మనీలో ఈ సినిమా పంపిణీ హక్కులను తారక రామ ఎంటర్‌టైన్‌మెంట్స్ సంస్థ సొంతం చేసుకుంది.
రికార్డు ధర పలికిన తొలి టికెట్
భారతీయ చలనచిత్రాలకు విదేశాలలో అనూహ్యమైన మార్కెట్ ఉన్నప్పటికీ, తెలుగు సినిమాకు జర్మనీలో ఇంతటి ఉత్సాహం కనిపించడం ఇదే తొలిసారి. 'అఖండ 2' హక్కులను జర్మన్ మార్కెట్‌లో మునుపెన్నడూ లేని రికార్డు ధరకు కొనుగోలు చేసినట్లు పంపిణీదారులు ప్రకటించారు. ఈ సందర్భంగా.. తమ అభిమానాన్ని చాటుకోవడానికి, సినిమాపై అంచనాలను పెంచడానికి ఒక వినూత్న కార్యక్రమాన్ని నిర్వహించింది. అభిమానుల కోసం ఐదు వేర్వేరు ప్రాంతాలలో సినిమా తొలి టికెట్‌ను వేలం వేశారు.
ఏ దేశంలో ఉన్నా..బాలయ్య అభిమానినే..
ఈ వేలంలో ఫ్రాంక్‌ఫర్ట్‌కు చెందిన భారతీయ సంతతి అభిమాని రాజశేఖర్ పర్నపల్లి సంచలనం సృష్టించారు. ఆయన ఏకంగా రూ. 1 లక్ష చెల్లించి 'అఖండ 2: తాండవం' తొలి టికెట్‌ను సొంతం చేసుకున్నారు. ఈ మొత్తం కేవలం టికెట్ ధర కాదనీ, బాలకృష్ణపై తనకున్న అపారమైన అభిమానానికి నిదర్శనమని రాజశేఖర్ పర్నపల్లి తెలిపారు. నేను ఏ దేశంలో ఉన్నా, ఎక్కడున్నా... నేను బాలయ్య అభిమానిని. నాలో ఆ అభిమానం ఎప్పుడూ తగ్గదు. సీమ ఆంధ్రా, మా పల్లెటూరి వాతావరణాన్ని, సంబరాన్ని ఇక్కడే అనుభవిస్తున్నట్లు అనిపిస్తోంది అని సంతోషం వ్యక్తం చేశారు. నందమూరి కుటుంబ అభిమానిగా..ఈ తొలి టికెట్ కొనుగోలు చేయడం నాకు చాలా గర్వంగా ఉంది అని అన్నారు.
Balayya Craze Peaks Worldwide! 🔥💥🔥💥
— Balayya Philadelphia Fans (@NBKPhillyFans) November 29, 2025
‘Akhanda 2’ mania hits Germany too, the first fan ticket was auctioned for a whopping ₹1 lakh (1000 Euros)!
Rajasekhar Parnapalli proudly grabbed it, proving once again… Balayya’s mass has no borders! 🌍🔥#Akhanda2 #Balayya pic.twitter.com/YZpACnTpTh
ద్విపాత్రాభినయం
ఈ ఫాంటసీ యాక్షన్ డ్రామా 'అఖండ 2: తాండవం'లో బాలకృష్ణ మరోసారి డబుల్ రోల్ లో కన్పించనున్నారు. శివ భక్తుడైన అఘోరా 'అఖండ'గా, మంచి మనసున్న 'మురళీ కృష్ణ'గా ద్విపాత్రాభినయం చేశారు. ఈ చిత్రంలో సంయుక్త మీనన్, ఆది పినిశెట్టి, బాలీవుడ్ బాల నటి హర్షాలీ మల్హోత్రా (బజరంగీ భాయ్‌జాన్ ఫేమ్) కీలక పాత్రలు పోషిస్తున్నారు.
'అఖండ 2: తాండవం' చిత్రం 2021లో భారీ విజయాన్ని సాధించిన 'అఖండ'కు కొనసాగింపుగా వస్తోంది. అఖండ' ప్రపంచవ్యాప్తంగా రూ.117 కోట్లు వసూలు చేసి రికార్డు సృష్టించింది. సీక్వెల్‌గా వస్తున్న 'అఖండ 2'ను రామ్ ఆచంట, గోపి ఆచంట, ఇషాన్ సక్సేనాలు 14 రీల్స్ ప్లస్ , IVY ఎంటర్‌టైన్‌మెంట్ పతాకాలపై అత్యంత భారీ బడ్జెట్‌తో నిర్మిస్తున్నారు. 'అఖండ' సృష్టించిన ప్రభంజనం నేపథ్యంలో, 'అఖండ 2: తాండవం' సీక్వెల్ ఆ రికార్డులను బద్దలు కొడుతుందా లేదా అనేది డిసెంబర్ 5న తేలనుంది.
