15 రోజుల కిందట కురిసిన భారీ వర్షాలకు చిన్నగోల్కొండ గ్రామంలోని నరసింహ చెరువు పూర్తిగా నిండింది. ఆ టైంలో చెరువు తూములు తెరవకపోవడంతో బ్యాక్ వాటర్ ఓఆర్ఆర్ సర్వీస్రోడ్డుతోపాటు చుట్టు పక్కల ప్రాంతాలను ముంచెత్తింది. అయితే ఇప్పటికీ ఆ నీళ్లు అలానే ఉన్నాయి. పెద్ద గోల్కొండ వద్ద ఉన్న ఓఆర్ఆర్ ఎగ్జిట్ నం.15 చెరువును తలపిస్తోంది. ఇక్కడ నీళ్లు తొలగకపోవడంతో దాదాపు 60 గ్రామాలకు రాకపోకలు పూర్తిగా బంద్అయ్యాయి. శంషాబాద్ నుంచి బహదూర్ గూడ మీదుగా తుక్కుగూడ వెళ్లే దారిలో ఉన్న టోల్ గేట్, తుక్కుగూడ నుంచి శంషాబాద్ వెళ్లే దారిలోని టోల్గేట్, ట్రోమా సెంటర్ ఇప్పటికీ నీళ్లలోనే ఉన్నాయి. దీంతో 60 గ్రామాల ప్రజలు వన్వే అయిన నరసింహ చెరువు కట్టపై నుంచి రాకపోకలు సాగిస్తున్నారు. గురువారం ఉదయం కృష్ణవేణి అనే స్కూల్ బస్సు కట్టపై నుంచి వెళ్తూ మట్టిలో దిగబడింది. డ్రైవర్ అప్రమత్తమై బస్సులోని స్టూడెంట్లను కిందకి దింపేశాడు. ఆ టైంలో బస్సులో 45 మంది ఉన్నట్లు సమాచారం. బస్సు అదుపు తప్పి చెరువులో పెద్ద ప్రమాదం జరిగి ఉండేదని స్థానికులు ఆందోళన వ్యక్తం చేశారు. ఇప్పటికైనా ఓఆర్ఆర్ పై నిలిచిన వరద నీటిని తొలగించాలని, చెరువు తూములు తెరవాలని కోరుతున్నారు. - వెలుగు, శంషాబాద్
