నాగచైతన్య కొత్త చిత్రం ప్రారంభం..
యువ సామ్రాట్ అక్కినేని నాగ చైతన్య వరుస సినిమాలతో దూసుకెళుతున్నాడు. ఇదే జోరులో ఇటీవలే తన కొత్త చిత్రాన్ని ప్రకటించాడు. దీనికి సంబంధించిన అనౌన్స్ మెంట్ కూడా వ‌చ్చేసింది. తమిళ దర్శకుడు వెంకట్ ప్రభు ఈ సినిమాను తెరకెక్కించనున్నారు. నాగ చైతన్య సరసన కృతి శెట్టి హీరోయిన్ గా నటిస్తోంది. ఈ సినిమా తెలుగుతో పాటు త‌మిళంలోనూ విడుద‌ల కానుంది. కాగా, గురువారం హైదరాబాద్ లో ఈ మూవీ ప్రారంభోత్సవం ఘనంగా జరుపుకుంది.
ఈ కార్యక్రమానికి హీరోలు రానా దగ్గుబాటి, శివ కార్తికేయన్, దర్శకుడు బోయపాటి శ్రీను, సంగీత దర్శకులు ఇళయరాజా, యువన్ శంకర్ రాజా తదితరులు హాజరయ్యారు. ఈ మూవీ ప్రారంబోత్సవంలో రానా దగ్గుబాటి కెమెరా స్విచ్ ఆన్ చేయగా.. దర్శకుడు బోయపాటి హీరో హీరోయిన్లపై క్లాప్ ఇచ్చారు. త్వరలో ఈ సినిమా రెగ్యులర్ షూటింగ్ మొదలవబోతుందని తెలుస్తోంది. ప‌వ‌న్ కుమార్ స‌మ‌ర్పణలో శ్రీనివాసా సిల్వవర్ స్క్రీన్ బ్యాన‌ర్‌పై ఈ మూవీని శ్రీనివాస చిట్టూరి నిర్మిస్తున్నారు.
