బచ్​గయా..బొటాబొటీ మెజార్టీతో గట్టెక్కిన ఎన్డీయే

• మ్యాజిక్​ ఫిగర్​కు 32 సీట్ల దూరంలో ఆగిన బీజేపీ
• గత ఎన్నికలతో పోల్చితే 63 సీట్లు మైనస్​.. 
• దెబ్బకొట్టిన యూపీ.. ఆదుకున్న ఆంధ్ర, ఒడిశా, బిహార్​
• భారీగా పుంజుకున్న కాంగ్రెస్.. సీట్లు డబుల్​
• ఎన్డీయేకు 293.. ఇండియా కూటమికి 233

‘అబ్​ కీ బార్​ చార్​ సౌ పార్​’ నినాదం బెడిసికొట్టింది. బలం, బలగం ఉందనుకున్న రాష్ట్రాలు మర్లవడ్డయ్​.  ఆ దెబ్బకు.. ఊహల్లో నుంచి బీజేపీ గ్రాఫ్​ నేలకు దిగివచ్చింది. ప్రజా తీర్పు ముందు కమలం పార్టీ పరిస్థితి చావు తప్పి కన్ను లొట్టపోయినట్లయింది. తమకు ఎదురే లేదని, ఒంటరిగానే 370 సీట్లు దక్కించుకుంటామన్న బీజేపీని మ్యాజిక్​ ఫిగర్​(272 సీట్ల)కు 32 సీట్ల దూరంలో ఓటర్లు నిలబెట్టారు. ఆ పార్టీ నేతృత్వంలోని ఎన్డీయే కూటమిని 293 సీట్ల దగ్గర్నే ఆపేశారు. ఎన్డీయేకు తిరిగి అధికారం అప్పగిస్తూనే..  కాంగ్రెస్​ నేతృత్వంలోని ‘ఇండియా’ కూటమికి గౌరవప్రదమైన సీట్లను ఓటర్లు అందజేశారు. మొత్తానికి బీజేపీకి గెలిచినా ఓడినంత పనైంది.  కాంగ్రెస్​కు మాత్రం ఓడినా గెలిచినంత సంబురం దక్కింది. 

న్యూఢిల్లీ:  పార్లమెంట్​ ఎన్నికల్లో ఓటమి నుంచి ‘హమ్మయ్య.. బచ్​గయా’ అనే పరిస్థితి బీజేపీకి ఎదురైంది. ఆ పార్టీ ఆధ్వర్యంలోని ఎన్డీయే కూటమికి 293 సీట్లు మాత్రమే దక్కాయి. ఇది గత ఎన్నికల (352)తో పోలిస్తే 59 సీట్లు తక్కువ. ప్రస్తుతం బీజేపీ లార్జెస్ట్​ పార్టీగా అవతరించినప్పటికీ.. మ్యాజిక్​ ఫిగర్​ను అందుకోలేకపోయింది. 2019 లోక్​సభ ఎన్నికల్లో 303 సీట్లు సాధించిన ఆ పార్టీ.. ఇప్పుడు 240కి పరిమితమైంది. పదేండ్లుగా అధికారంలో ఉన్న ఎన్డీయేకు  కాంగ్రెస్​ ఆధ్వర్యంలోని ఇండియా కూటమి గట్టి పోటీని ఇచ్చింది. ముఖ్యంగా యూపీలో కోలుకోలేని దెబ్బ కొట్టింది. మొత్తం 543 లోక్​సభ స్థానాలకు ఏడు దశల్లో నెలన్నరోజుల పాటు ఎన్నికలు జరగగా.. మంగళవారం ఓట్లను లెక్కించారు. 

హిందీ రాష్ట్రాల్లో బీజేపీ ఢమాల్​

తనకు మంచి పట్టున్న హిందీ రాష్ట్రాల్లో బీజేపీ ఎదురీదాల్సి వచ్చింది. ముఖ్యంగా 80 సీట్లున్న ఉత్తరప్రదేశ్​లో కేవలం 33 సీట్లకే ఆ పార్టీ పరిమితమైంది. ముఖ్యంగా ఎన్నికలకు కొన్నిరోజుల ముందే అయోధ్యలో రామమందిరాన్ని ప్రధాని నరేంద్రమోదీ ప్రారంభించినప్పటికీ.. ఆ ఏరియా ఉన్న ఫైజాబాద్​ ఎంపీ సీటును కూడా బీజేపీ కోల్పోయింది. మిత్ర పక్షాలతో కలిసి బీజేపీకి వచ్చిన సీట్లు 36 మాత్రమే. 2019 ఎన్నికల్లో ఈ రాష్ట్రంలో ఒక్క బీజేపీనే 62 సీట్లను గెలుచుకుంది. ఇప్పుడు దాదాపు సగం సీట్లను కోల్పోయింది. ‘అబ్​కీ బార్​ చార్​సౌ పార్​’ అనే నినాదంతో హ్యాట్రిక్​ కోసం మోదీ ప్రయత్నించినా.. యూపీలో ఎదురుదెబ్బ తగిలింది. ఆయన ప్రాతినిధ్యం వహిస్తున్న వారణాసిలో కూడా కౌంటింగ్​ మొదలైనప్పుడు తీవ్ర ఉత్కంఠ నెలకొంది. ఉదయం మోదీ వెనుకంజలో ఉన్నట్లు వార్తలు వచ్చాయి. 2019తో పోలిస్తే ఇక్కడ మోదీకి మెజార్టీ భారీగా తగ్గింది.  2019లో వారణాసిలో ఆయనకు 4,79,505 మెజార్టీ రాగా.. ఇప్పుడు 1,52,513 ఓట్ల మెజార్టీతో కాంగ్రెస్​ అభ్యర్థి అజయ్​ రాయ్​పై గెలుపొందారు. ఇక, యూపీలో ఇండియా కూటమి 43 సీట్లు సొంతం చేసుకొని.. ఎన్డీయేకు చుక్కలు చూపించింది. రాజస్థాన్​లో కేవలం 14 స్థానాలకే బీజేపీ పరిమితమైంది. గత ఎన్నికల్లో 24 సీట్లు గెలుచుకున్న కమలం పార్టీ ఈ సారి పది సీట్లు కోల్పోయింది. రాజస్థాన్​తోపాటు హర్యానాలోనూ బీజేపీకి ఇండియా కూటమి షాక్​ ఇచ్చింది.

కాంగ్రెస్​కు డబుల్​

2019 ఎన్నికల్లో కాంగ్రెస్​పార్టీ కేవలం 52 సీట్లు గెలుచుకోగా.. ఈ ఎన్నికల్లో  99 సీట్లు గెలిచింది.  ఎగ్జిట్​ పో ల్స్​ అంచనాలను తారుమారు చేస్తూ ఆ పార్టీ దూసుకుపోయింది. ఆ పార్టీ నేతృత్వంలోని ఇండియా కూటమి 233 సీట్లను కైవసం చేసుకుంది. ఇందులో ఉత్తరప్రదేశ్​లో ఆ కూటమిలోని భాగస్వామ్యపక్షం సమాజ్​వాదీ పార్టీ 37 సీట్లను గెలుచుకుంది. అదేవిధంగా కూటమిలోని టీఎంసీ పశ్చిమబెంగాల్​లో 29 సీట్లను కైవసం చేసుకుంది. బెంగాల్​నూ బీజేపీకి ఎదురుదెబ్బ తగిలింది. 2019 ఎన్నికల్లో ఇక్కడ బీజేపీకి 18 సీట్లు రాగా.. ఇప్పుడు 12కే పరిమితమైంది. కాంగ్రెస్​ అగ్రనేత రాహుల్​ గాంధీ ఈ ఎన్నికల్లో పోటీ చేసిన రెండు చోట్ల భారీ మెజార్టీ నమోదు చేసుకున్నారు. ఉత్తరప్రదేశ్లోని రాయ్​ బరేలీలో 3,90,030.. కేరళలోని వయనాడ్​లో 3,64,422 మెజార్టీతో విజయం సాధించారు. 

మోదీకి సాతిచ్చిన ఏపీ, ఒడిశా, బీహార్​

హ్యాట్రిక్​ విజయంతో మూడోసారి ప్రధాని పీఠాన్ని అధిష్టించాలని భావించిన మోదీకి.. హిందీ రాష్ట్రాల్లో ఎదురుగాలి వీచింది. అయితే, ఆంధ్ర ప్రదేశ్, ఒడిశా, బీహార్​ రాష్ట్రాలు ఆయనకు అండ గా నిలిచాయి. ఏపీలో టీడీపీ, జనసేనతో కలిసి కూటమిగా వెళ్లిన బీజేపీ.. 3 సీట్లను కైవసం చేసు కుంది. ఏపీలో మొత్తం 25 ఎంపీ స్థానాలు ఉం డగా.. ఈ ఎన్డీయే కూటమికి  21 సీట్లు వచ్చాయి. పైగా ఏపీ అసెంబ్లీ ఎన్నికల్లో కూటమి భారీ విజ యాన్ని నమోదుచేసుకుంది. ఇన్నాళ్లూ అధికా రంలో ఉన్న వైసీపీ వాష్​ ఔట్​ అయింది. ఒడిశాలో 8 సీట్ల నుంచి 20 సీట్లకు బీజేపీ ఎగబాకింది. ఇక్కడ ఇన్నాళ్లూ అధికారంలో ఉన్న నవీన్​ పట్నా యక్​ పార్టీ బిజూ జనతాదళ్​ ఘోరంగా ఓడిపో యింది. బీజేపీ అధికారాన్ని కైవసం చేసుకుంది. బీహార్​లోనూ బీజేపీకి కలిసి వచ్చింది. ఎన్నికలకు కొన్ని రోజుల ముందు వరకు ఇండియా కూటమిలో ఉన్న ఆ రాష్ట్ర సీఎం, జేడీయూ చీఫ్​ నితీశ్​ కుమార్​ ఆ తర్వాత ఎన్డీయే కూటమిలో చేరారు. అక్కడ ఈ కూటమి 30 సీట్లు గెలుచుకుంది. కాగా, సౌత్​లోని తమిళనాడులో ఒక్క సీటును కూడా బీజేపీ గెలుచుకోలేకపోయింది.  కేరళలో మాత్రం ఫస్ట్​టైమ్​ ఖాతాను ఓపెన్​ చేసింది. ఇక్కి త్రిసూర్​లో పోటీ చేసిన ఆ పార్టీ అభ్యర్థి, సినీ నటుడు సురేశ్​ గోపి విజయం సాధించారు. కర్నాటకలోని మొత్తం 28 సీట్లలో గత ఎన్నికల్లో బీజేపీకి 25 సీట్లు రాగా.. ఈసారి 17 సీట్లు వచ్చాయి. దాని మిత్రపక్షం జేడీఎస్​కు 2 సీట్లు వచ్చాయి. కాగా, ఢిల్లీలో బీజేపీ క్లీన్​ స్వీప్​ చేసింది.