- ‘డిలిట్ ఫర్ ఆల్’ ఫీచర్
- సక్సెస్ఫుల్గా టెస్ట్ చేసిన సంస్థ
- త్వరలోనే ఆండ్రాయిడ్ ఫోన్లలో అందుబాటులోకి
- వెల్లడించిన వాట్సాప్ బీటా ఇన్ఫో
- ఫేక్ న్యూస్కు చెక్ పెట్టేందుకు కొత్త ఫీచర్
న్యూయార్క్: వాట్సాప్ గ్రూపుల్లో ఈ మధ్య ఫేక్ న్యూస్, అసభ్యకరమైన కంటెంట్, రెచ్చగొట్టే వ్యాఖ్యలు ఇబ్బడిముబ్బడిగా వచ్చేస్తున్నాయి. వాటి వల్ల జనాలపై దాడులు జరిగి ప్రాణాలు పోయిన సందర్భాలూ ఉన్నాయి. వాటిన్నింటికీ చెక్ పెట్టేందుకు వాట్సాప్ ఓ కొత్త ఫీచర్ను తీసుకొస్తోంది. పనికిరాని మెసేజ్లను గ్రూపులోని ఎవరికీ కనిపించకుండా ‘మొత్తానికే’ డిలీట్ చేసేలా వాట్సాప్ గ్రూప్ అడ్మిన్లకు మరో కొత్త పవర్ఇవ్వనుంది. ‘డిలీట్ ఫర్ ఎవ్రీవన్/ఆల్’ ఫీచర్ను ఇప్పటికే సక్సెస్ఫుల్గా టెస్ట్ చేసింది. దానికి సంబంధించిన స్క్రీన్ షాట్తో వాట్సాప్ అప్డేట్లు ఇచ్చే వాట్సాప్ బీటా ఇన్ఫో ట్విట్టర్లో ఈ విషయాన్ని వెల్లడించింది. ‘‘మీరు గ్రూప్ అడ్మిన్ అయితే.. భవిష్యత్లో మెసేజ్లను ఎవరికీ కనిపించకుండా డిలీట్ చేసేయొచ్చు. ఆండ్రాయిడ్ వాట్సాప్ బీటాలో ఈ కొత్త ఫీచర్ త్వరలోనే అందుబాటులోకి వస్తుంది. మొత్తానికి ఓ మంచి మార్పు’’ అంటూ ట్వీట్ చేసింది. అయితే, దీనిపై వాట్సాప్ నుంచి ఇంకా అధికారిక ప్రకటన అయితే రాలేదు. నిజానికి వాట్సాప్ గ్రూపుల్లో కొందరు వ్యక్తులు చేసే అబ్జెక్షనబుల్ పోస్టుల వల్ల గ్రూప్ అడ్మిన్లు సమస్యలను ఎదుర్కొంటున్నారు. రెచ్చగొట్టే వ్యాఖ్యలు, ఫేక్ న్యూస్ ప్రచారం వంటి వాటిలో వారినే నేరస్తులుగా చేసి చూపిస్తున్నారు. ఈ క్రమంలోనే బాంబే హైకోర్టు, మద్రాస్ హైకోర్టు.. వారిని బాధ్యులుగా చేయలేమంటూ నిరుడు ఇచ్చిన తీర్పుల్లో పేర్కొన్నాయి. సభ్యులను యాడ్ చేయడం, డిలీట్ చేయడం వంటివి తప్పితే.. గ్రూపుల్లో వచ్చే మెసేజ్లను డిలీట్ చేసే పవర్స్గానీ అడ్మిన్లకు లేవంటూ పేర్కొన్నాయి. అలాంటప్పుడు వారిని నేరస్థులుగా చేసి చూపించడం సరికాదని చెప్పాయి.
