ఏడాది క్రితం కరోనా వచ్చినప్పుడు జ్వరం, జలుబు, దగ్గు, విరేచనాలు కొవిడ్‌ లక్షణాలుగా చెప్పుకున్నాం. కానీ, ఇప్పుడు కొత్త స్ట్రెయిన్ వచ్చాక మోకాళ్ల కింద నొప్పులు, నడుము నొప్పి, తలనొప్పి, ఆకలి లేకపోవడం కూడా తోడయ్యాయి.
ఎలాంటివి తినాలి?
కొవిడ్‌ పేషెంట్స్ బాగా నీరసిస్తారు. ఆకలి లేకపోవడం కూడా కొవిడ్‌ లక్షణం. ఇలా ఉన్న వాళ్లు ఘనాహారం తీసుకోలేరు. అలాంటప్పుడు లిక్విడ్ ఫుడ్ తీసుకునే ప్రయత్నం చేయాలి.
సమస్య తీవ్రత ఎలా ఉంది?
ఏడాది కింద కొవిడ్‌ పేషెంట్స్ హాస్పిటల్లో చేరాల్సిన అవసరం వచ్చినవాళ్లలో 20 శాతం మందికే వెంటిలేటర్ అవసరం పడేది. ఇప్పుడు పరిస్థితి మారింది. హాస్పిటల్లో చేరాల్సి వచ్చిన పేషెంట్లలో 80 శాతం మందికి వెంటిలేటర్స్ అవసరం పడుతున్నాయి. ఒకప్పుడు వృద్ధులే హాస్పిటల్లో చేరాల్సి వచ్చేది. వాళ్లలో బీపీ, షుగర్, ఆస్తమా పేషెంట్స్కే సమస్య తీవ్రంగా ఉండేది. కానీ, కొత్త స్ట్రెయిన్ కరోనా సోకినవాళ్లు అంతకుముందు ఆరోగ్యంగా ఉన్నా కూడా చాలా బాధపడుతున్నారు. ఆస్తమా, బీపీ, షుగర్ వంటి ఆరోగ్య సమస్యలు లేని వృద్ధులే కాదు, అన్ని వయసుల వాళ్లూ హాస్పిటల్లో చేరాల్సి వస్తోంది. నడి వయసు వాళ్లు, యువతకి కూడా ఈ స్ట్రెయిన్తో ప్రాణహాని ఉందని అర్థమవుతోంది. ఇప్పుడు ఈ వయసు వాళ్లకే ప్రమాదం అనుకునే పరిస్థితి లేదు. కానీ, పిల్లలకు సమస్య తక్కువగా ఉంది. వాళ్లకు వెంటిలేషన్ అవసరంపడట్లేదు.
ఎప్పుడు హాస్పిటల్లో చేరాలి?
కొవిడ్‌ వస్తే అందరూ హాస్పిటల్లో చేరాల్సిన అవసరం రాదు. పాజిటివ్ అని తెలిస్తే డాక్టర్ని ముందు కన్సల్ట్ చేయాలి. చెప్పిన మందులు వాడాలి. జ్వరం తీవ్రంగా, తగ్గకుండా ఉంటే హాస్పిటల్లో చేరాల్సిన అవసరం వస్తుంది. ఆక్సీమీటర్తో బాడీలో ఆక్సిజన్ శాతాన్ని చెక్ చేసుకుంటూ ఉండాలి. ప్రతి రోజూ ఇలా చెక్ చేసుకోవాలి. ఎస్పీఓటూ 94 కు తగ్గితే అప్పుడు కచ్చితంగా హాస్పిటల్లో చేరాలి.
నెగెటివ్ వస్తే సమస్య లేనట్టేనా?
పాజిటవ్ వచ్చిన కొన్నాళ్ల తర్వాత కొవిడ్‌ తగ్గుతుంది. నెగెటివ్ రిపోర్ట్ వస్తుంది. ఆ తర్వాత కొంత మంది హార్ట్ ఎటాక్ తో చనిపోతున్నారని అంటున్నారు. దీనికి కారణం డి – డైమర్ (రక్త నాళాల్లో రక్తం గడ్డ కట్టడం) జరగడం. కరోనా నెగెటివ్ రిజల్ట్ వచ్చిన తరవాత బాడీలో రక్తం గడ్డ కడుతుందా? లేదా అని తెలుసుకోవడం కోసం డి – డైమర్ టెస్ట్ చేయించుకోవాలి. సమస్య ఉందని గుర్తిస్తే రక్తం పలుచగా అవ్వడానికి ట్యాబ్లెట్స్, ఇంజెక్షన్స్ ఇస్తారు. కొవిడ్‌ తగ్గిందని అజాగ్రత్తగా ఉండకూడదు. కొద్ది రోజులు జాగ్రత్తగా ఉండాలి. అవసరమైతే డాక్టర్ని కన్సల్ట్ చేయాలి.
ఏ జబ్బులు ఉన్నవాళ్లు జాగ్రత్తగా ఉండాలి?
ఇంతకుముందు కిడ్నీ, బీపీ, షుగర్, ఆస్తమా పేషెంట్స్ జాగ్రత్తగా ఉండాలని చెప్పేవారు. వాళ్లే ఎక్కువగా ఇబ్బంది పడ్డారు కూడా. వెంటిలేటర్స్ అవసరం కూడా వాళ్లకే ఎక్కువగా ఉండేది. ఇప్పుడు పరిస్థితులు అలా లేవు. బాడీలో ఏ అవయవం అయినా కొవిడ్‌ వల్ల సరిగా పనిచేయకపోవచ్చు. ఏ ఆర్గాన్లో ఎఫెక్ట్ చూపిస్తుందో ఊహించలేం. కాబట్టి అందరూ జాగ్రత్తగా ఉండాల్సిందే. జీర్ణ, శ్వాస, నాడీ వ్యవస్థలపై కోవిడ్ ప్రభావం తీవ్రంగా ఉంటుంది. ఇంతకు ముందు ఏ జబ్బు లేకపోయినా ఇబ్బంది పడుతున్నారు కొందరు.
ఎన్ని రోజుల్లో కోలుకుంటారు?
సాధారణంగా కొవిడ్‌ పేషెంట్ కోలుకోవడానికి పద్నాలుగు రోజులు పడుతుంది. కొంతమంది మూడు రోజుల్లోనే కోలుకుంటారు. వెంటిలేటర్ అవసరం వచ్చి, చికిత్స చేయించుకున్నవాళ్లు కోలుకోవడానికి పద్నాలుగు రోజుల కంటే ఎక్కువ కాలం పడుతుంది. ప్రత్యేకించి ఇన్ని రోజులని చెప్పలేం.
ఏ సమస్యకు ఏయే జాగ్రత్తలు తీసుకోవాలి?
కరోనా లక్షణాలు కనిపిస్తే వెంటనే ఫిజికల్ డిస్టెన్స్ పాటించాలి, మాస్క్ తప్పనిసరిగా పెట్టుకోవాలి. తర్వాత కొవిడ్‌ టెస్ట్ చేయించుకోవాలి. సీరియస్గా లేదని నిర్లక్ష్యం చేస్తే ఇంట్లో ఉన్న పెద్దవాళ్లకు ప్రమాదం. కుటుంబ సభ్యులు, ఆఫీస్లో కొలిగ్స్కి సోకే ప్రమాదం ఉంటుంది. పాజిటివ్ వస్తే హాస్పిటల్లో చేరాల్సిన అవసరం లేకున్నా డాక్టర్ని కన్సల్ట్ చేయాలి. పాజిటివ్ వచ్చినవాళ్లు హోం ఐసోలేషన్ పాటించాలి. వేడి నీళ్లు తాగాలి. ఆవిరి పడుతూ ఉండాలి. మల్టీ విటమిన్ ట్యాబ్లెట్స్ తీసుకోవాలి. ఇమ్యూనిటీకి విటమిన్ – సి, జింక్ ముఖ్యం. ఇవి కాకుండా విటమిన్ – ఏ, డీ, ఈ, బీ కాంప్లెక్స్ విటమిన్లు కూడా ఇమ్యూనిటీని పెంచడానికి సాయ పడతాయి. అందువల్ల అందరూ మల్టీ విటమిన్ ట్యాబ్లెట్స్ తీసుకోవాలి. యాంటీ బయాటిక్స్, ఇతర మందులు అందరికీ అవసరం లేదు. జ్వరం, జలుబు, నొప్పులు వస్తే లక్షణాన్ని బట్టి మందులు తీసుకోవాలి. కొవిడ్‌ పాజిటివ్ వచ్చినవాళ్లు ఈ మందులు వాడాలంటూ వాట్సాప్లో వచ్చే మందులన్నీ కొని వాడొద్దు. అందరికీ అన్ని రకాల మందులు అవసరమవ్వవు. జ్వరం, దగ్గు ఉంటే యాంటి బయాటిక్స్ తీసుకోవాలి. పాజిటివ్ పేషెంట్స్ అందరూ యాంటి బయాటిక్స్ వాడాల్సిన అవసరం లేదు.
అజాగ్రత్త వద్దు..
కొవిడ్‌ మందులతో తగ్గుతుంది అనుకోవద్దు. ఇప్పుడొచ్చిన కొత్త స్ట్రెయిన్ వల్ల రక్తంలో ఆక్సిజన్ లెవల్ పడిపోతుంది. ఆక్సిజన్ అవసరం ఏర్పడుతోంది. హాస్పిటల్స్‌‌‌‌లో బెడ్స్ కొరత, ఆక్సిజన్ కొరత ఉంది. కాబట్టి జాగ్రత్తగా ఉండాలి. కొవిడ్‌ వచ్చినవాళ్లు హోమ్ ఐసోలేషన్లో ఉంటే వాళ్లతో చాలా జాగ్రత్తగా ఉండాలి. వాళ్లతో నేరుగా మాట్లాడొద్దు. ఫోన్లో మెసేజ్, కాల్ చేయాలి. మాస్క్ అందరూ పెట్టుకోవాలి. ఫిజికల్ డిస్టెన్స్ పాటించాలి. కొవిడ్‌ సోకినవాళ్ల పక్కన కూర్చోవడం, వాళ్లు తాకిన వస్తువులను పట్టుకోవడం వంటివి చేయొద్దు. హోమ్ ఐసోలేషన్లో ఉన్నవాళ్లు బాగానే ఉన్నారని, ఏమీ కాదని అనుకుంటున్నారు. వాళ్ల నుంచి వైరస్‌ సోకిన మరొకరు అలాగే ఉంటారనే నమ్మకం లేదు. అలా అనుకొన్నవాళ్లు హాస్పిటలైజ్ అవుతున్నారు. శానిటైజర్, మాస్క్, ఫిజికల్ డిస్టెన్స్ మాత్రమే కరోనా నుంచి కాపాడతాయి.
....డాక్టర్ నవోదయ, జనరల్ ఫిజీషియన్, కేర్ హాస్పిటల్, హైదరాబాద్
