రాజ్కోట్: కేఎల్ రాహుల్ (92 బాల్స్లో 11 ఫోర్లు, 1 సిక్స్తో 112 నాటౌట్) సెంచరీతో చెలరేగినా.. కెప్టెన్ శుభ్మన్ గిల్ (53 బాల్స్లో 9 ఫోర్లు, 1 సిక్స్తో 56) అండగా నిలిచినా.. న్యూజిలాండ్తో జరిగిన రెండో వన్డేలో ఇండియాకు ఓటమి తప్పలేదు. ఫలితంగా బుధవారం జరిగిన ఈ మ్యాచ్లో కివీస్ 7 వికెట్ల తేడాతో గెలిచింది. దాంతో మూడు మ్యాచ్ల సిరీస్ ప్రస్తుతం 1–1తో సమంగా ఉంది. టాస్ ఓడిన ఇండియా 50 ఓవర్లలో 284/7 స్కోరు చేసింది. తర్వాత న్యూజిలాండ్ 47.3 ఓవర్లలో 286/3 స్కోరు చేసి గెలిచింది.
ఛేదనలో కివీస్ బ్యాటర్లను కట్టడి చేయడంలో ఇండియా బౌలర్లు ఘోరంగా విఫలమయ్యారు. ఆరో ఓవర్లో డేవన్ కాన్వే (16)ను ఔట్ చేసి హర్షిత్ రాణా (1/52) శుభారంభం ఇచ్చాడు. దానికి కొనసాగింపుగా ప్రసిధ్ కృష్ణ (1/49) 13 ఓవర్లో హెన్రీ నికోల్స్ (10)ను పెవిలియన్కు పంపాడు. 46/2తో కష్టాల్లో పడిన న్యూజిలాండ్ను యంగ్, మిచెల్ ఆదుకున్నారు. ఇండియా బౌలర్లందర్నీ దీటుగా ఎదుర్కొని పరుగులు సాధించారు.
ఈ క్రమంలో మిచెల్ 52, యంగ్ 68 బాల్స్లో హాఫ్ సెంచరీ చేశారు. మూడో వికెట్కు 162 రన్స్ జోడించి యంగ్ ఔటైనా.. గ్లెన్ ఫిలిప్స్ (32 నాటౌట్) నిలకడగా ఆడాడు. అప్పటికే క్రీజులో పాతుకుపోయిన మిచెల్ 96 బాల్స్లో సెంచరీ పూర్తి చేశాడు. ఫిలిప్స్తో నాలుగో వికెట్కు 78 రన్స్ జత చేసి గెలిపించాడు. మిచెల్కు ‘ప్లేయర్ ఆఫ్ ద మ్యాచ్’ అవార్డు లభించింది. ఇరుజట్ల మధ్య మూడో వన్డే ఆదివారం ఇండోర్లో జరుగుతుంది.
టాప్ ఫెయిల్..
ముందుగా బ్యాటింగ్కు దిగిన ఇండియా ఇన్నింగ్స్లో టాప్ ఆర్డర్ ఫెయిలైంది. ఓపెనర్లలో గిల్ మెరుగ్గా ఆడినా.. రెండో ఎండ్లో రోహిత్ శర్మ (24) విఫలమయ్యాడు. కివీస్ పేసర్ క్రిస్టియన్ క్లార్క్ (3/56) టాప్ ఆర్డర్ను దెబ్బకొట్టాడు. సింగిల్ తీయడానికి 11 బాల్స్ ఎదుర్కొన్న హిట్మ్యాన్ తర్వాత లాఫ్టెడ్ డ్రైవ్తో ఫోర్ కొట్టి కుదురుకున్నట్లు కనిపించాడు. కానీ 13వ ఓవర్లో క్లార్క్ వేసిన సీమ్ బాల్ను కవర్స్ భారీ షాట్ కొట్టబోయి యంగ్కు చిక్కాడు.
తొలి వికెట్కు 70 రన్స్ పార్ట్నర్షిప్ ముగిసింది. వన్డౌన్లో విరాట్ కోహ్లీ (23) అలవోకగా షాట్లు ఆడినా ఎక్కువసేపు క్రీజులో నిలవలేకపోయాడు. 47 బాల్స్లో ఫిఫ్టీ కొట్టిన గిల్ను 17వ ఓవర్లో జెమీసన్ (1/70) వెనక్కి పంపాడు. ఆ వెంటనే ఫుల్ లెంగ్త్ బాల్తో కోహ్లీని, అవుట్ సైడ్ ఆఫ్ స్టంప్ బాల్తో శ్రేయస్ అయ్యర్ (8)ను క్లార్క్ పెవిలియన్కు చేర్చాడు. దాంతో 99/1తో ఉన్న ఇండియా స్కోరు 118/4గా మారింది.
ఈ దశలో రాహుల్ సూపర్ ఇన్నింగ్స్ ఆడాడు. అవతలి వైపు జడేజా (27) కూడా మంచి సహకారం అందించాడు. ట్రాక్లో బౌన్స్ తగ్గడంతో ఈ ఇద్దరు కివీస్ బౌలింగ్ను దీటుగా ఎదుర్కొన్నారు. దాదాపు 15 ఓవర్ల పాటు వికెట్ను కాపాడుకుంటూ క్రమంగా ఇన్నింగ్స్ను గాడిలో పెట్టారు. 52 బాల్స్లో హాఫ్ సెంచరీ చేసిన రాహుల్ తర్వాత స్పిన్నర్లపై బ్యాట్ ఝుళిపించాడు.
అయితే 39వ ఓవర్లో బ్రేస్వెల్ (1/34) లో లెంగ్త్ బాల్కు రిటర్న్ క్యాచ్ ఇచ్చి జడ్డూ ఔటయ్యాడు. ఐదో వికెట్కు 73 రన్స్ భాగస్వామ్యం ముగిసింది. 191/5 వద్ద వచ్చిన నితీశ్ కుమార్ (20) ఉన్నంతసేపు మెరుగ్గా ఆడాడు. ఆరో వికెట్కు 57 రన్స్ జోడించి వెనుదిరిగాడు. ఆరు బాల్స్ తేడాలో నితీశ్తో పాటు హర్షిత్ రాణా (2) ఔటయ్యాడు. చివర్లో సిరాజ్ (2 నాటౌట్)కు ఎక్కువగా స్ట్రయిక్ ఇవ్వకుండా వేగంగా ఆడిన రాహుల్ 87 బాల్స్లో సెంచరీ పూర్తి చేసి ఇండియాకు మంచి స్కోరు అందించాడు.
సంక్షిప్త స్కోర్లు
ఇండియా: 50 ఓవర్లలో 284/7 ( రాహుల్ 112*, గిల్ 56, క్లార్క్ 3/56). న్యూజిలాండ్: 47.3 ఓవర్లలో 286/3 (మిచెల్ 131*, విల్ యంగ్ 87, ప్రసిధ్ కృష్ణ 1/49)
