తెలంగాణకు 675 కోట్ల రూపాయలతో జాతీయ రహదారి విస్తరణ ప్రాజెక్టును కేంద్ర రవాణా, జాతీయ రహదారుల శాఖ మంత్రి నితిన్ గడ్కరీ ప్రకటించారు. జాతీయ రహదారి 930పీలో భాగంగా మహబూబాబాద్ జిల్లాలోని తొర్రూర్ నుంచి నెహ్రూ నగర్ వరకు ఉన్న రెండు లేన్ల రహదారిని విస్తరించనున్నట్లు చెప్పారు.ఇది హైదరాబాద్ - మహబూబాబాద్ - భద్రాద్రి కొత్తగూడెం జిల్లాలను కలుపుతుందని వివరించారు. ప్రతిపాదిత జాతీయ రహదారి వల్ల హైదరాబాద్ -భద్రాచలం మధ్య 35 కిలోమీటర్ల దూరం తగ్గుతుందని అన్నారు. ఈ ప్రాజెక్టు వల్ల పారిశ్రామిక రంగానికి ఎంతో కీలకమైన కొత్తగూడెం జిల్లా, మహబూబాబాద్ జిల్లాలోని బయ్యారం మండలాల్లో రవాణా సదుపాయాలు, వాణిజ్య కార్యకలాపాలు పెరుగుతాయని గడ్కరీ ఆశాభావం వ్యక్తం చేశారు. ఈమేరకు వివరాలతో ఆయన ట్వీట్ చేశారు.
ఏపీ, తెలంగాణ రాష్ట్రాలను అనుసంధానిస్తూ కృష్ణానదిపై ఐకానిక్ వంతెన నిర్మాణం కానుంది. దీని నిర్మాణంతో ఏపీ, తెలంగాణ మధ్య 80 కిలోమీటర్ల దూరం తగ్గనుంది. రూ.1,082.65 కోట్లతో ఈ వంతెన నిర్మాణ ప్రణాళికకు జాతీయ రహదారుల శాఖ ఆమోదం తెలిపింది. మొదటి విడతగా రూ.436 కోట్లను మంజూరు చేసింది. ఈవిషయాన్ని ట్వీట్ లో నితిన్ గడ్కరీ వెల్లడించారు. ఇందులో భాగంగా ఏపీలోని నంద్యాల జిల్లాలో వరద ముంపు బాధిత గ్రామాల ప్రజల సౌకర్యార్ధం కృష్ణా నదిపై కొత్త వంతెన నిర్మించనున్నారు. నంద్యాల జిల్లా సిద్ధేశ్వరం, తెలంగాణలోని నాగర్ కర్నూల్ జిల్లా సోమశిల మద్య దాదాపు 2 కిలోమీటర్ల మేర ఈ వంతెన నిర్మిస్తారు. ప్రస్తుతం నంద్యాల నుంచి హైదరాబాద్ వెళ్లాలంటే... కర్నూలు, వనపర్తి మీదుగా వెళ్లాలి. ఈ వంతెన నిర్మాణం జరిగితే నేరుగా నాగర్ కర్నూలు మీదుగా హైదరాబాద్ వెళ్లిపోవచ్చు. తెలంగాణ నుంచి రోడ్డు మార్గంలో తిరుపతికి వెళ్లే ప్రయాణికులకు కూడా వ్యయ ప్రయాసలు తగ్గుతాయి.
