ఉమ్మడి నిజామాబాద్లో చివరి రోజునామినేషన్ల జోరు

• రాత్రి వరకు కొనసాగిన నామినేషన్ల ప్రక్రియ

నిజామాబాద్​/కామారెడ్డి, వెలుగు : ఉమ్మడి నిజామాబాద్​లో తొలి విడత నామినేషన్లు జోరుగా సాగాయి. నిజామాబాద్​ జిల్లాలో 184 సర్పంచ్​ స్థానాలు, 1,642 వార్డులు, కామారెడ్డి జిల్లాలో 10 మండలాల పరిధిలో  167 పంచాయతీలు, 1,520 వార్డుల్లో పోటీ చేసే అభ్యర్థులు  ఉదయం10.30 గంటల నుంచి సెంటర్ల వద్ద క్యూలో నిల్చున్నారు. సాయంత్రం 5 గంటల వరకు వచ్చిన అభ్యర్థులను అనుమతించి టోకెన్లు ఇచ్చి రాత్రి 10 గంటల వరకు నామినేషన్లు స్వీకరించారు. 

బీసీ, ఎస్సీ, ఎస్టీలకు రిజర్వు చేసిన జీపీ, వార్డుల్లో పోటీ చేయడానికి సంబంధిత కులం  సర్టిఫికెట్లు అవసరం కావడంతో తహసీల్దార్ ఆఫీస్​లు కిటకిటలాడాయి. సీఈసీ విధించిన కొత్త బ్యాంక్​ అకౌంట్ నిబంధన పూర్తి చేయడానికి ఆశావహులు బ్యాంకులకు పరుగులు పెట్టారు. కోటగిరి మండల కేంద్రంలో సర్పంచ్​ పదవికి అత్యధికంగా 31 మంది నామినేషన్లు వేశారు. ఎలక్షన్​ జనరల్ అబ్జర్వర్​ జీవీ శ్యాంప్రసాద్​లాల్​ నామినేషన్ల ప్రక్రియను పరిశీలించారు. 

ఈ రెండు రోజుల్లో ఉమ్మడి జిల్లాలో సర్పంచ్​కు 672, వార్డు మెంబర్లకు 1077 నామినేషన్లు రాగా, చివరి రోజు అంతకు మూడింతలు దాఖలయ్యాయి. తొలివిడత నామినేషన్ల దాఖలు ముగియగా, ఆదివారం నామినేషన్ల పరిశీలనకు అధికారులు ఏర్పాట్లు పూర్తి చేశారు. సాయంత్రం 5 గంటల తర్వాత  స్క్రూట్నీ పూర్తిచేసి, అభ్యర్థుల లిస్టును సిద్ధం చేయనున్నారు.  

నామినేషన్‌ తిరస్కరణకు గురైతే ఆర్డీవోకు గానీ,  సబ్‌ కలెక్టర్‌ కు గానీ   డిసెంబర్​1 సాయంత్రం వరకు అప్పీల్ చేసుకునే అవకాశం కల్పించారు. డిసెంబర్ 3న మధ్యాహ్నం 3 గంటల వరకు నామినేషన్ల ఉపసంహరణకు గడువు ఉంది. అదేరోజు మధ్యాహ్యం 3 గంటల తర్వాత బరిలో ఉన్న అభ్యర్థుల తుది జాబితాను ఎన్నికల అధికారులు గ్రామాలవారీగా ప్రకటిస్తారు. 

నేటి నుంచి రెండో విడత షురూ..  

ఉమ్మడి నిజామాబాద్​ జిల్లాలో రెండో విడత ఎన్నికలకు నేటి నుంచి మంగళవారం వరకు నామినేషన్లు స్వీకరించనున్నారు. 8 మండలాల పరిధిలోని 196​ జీపీలు, 1,760 వార్డులకు నామినేషన్లు తీసుకునేందుకు 59 క్లస్టర్లు ఏర్పాటు చేశారు. ఒక ఆర్వో, ఒక ఏఆర్వోను నియమించారు. మొత్తం 2,64,178 ఓటర్లుండగా మహిళలు 1,41,305, పురుషులు 1,22,868 ఇతరులు ఐదుగురు ఉన్నారు.

కామారెడ్డి జిల్లాలోని ఎల్లారెడ్డి , బాన్సువాడ డివిజన్లలోని 7 మండలాల్లో 197 పంచాయతీలు, 1654 వార్డుల్లో నామినేషన్లు స్వీకరించనున్నారు. నామినేషన్ల స్వీకరణకు  57 క్లస్టర్లు ఏర్పాటు చేశారు. ఒక ఆర్వో, ఒక ఏఆర్వోను నియమించారు. మొత్తం 1,88,977 మంది ఓటర్లు ఉండగా, పురుషులు 90,539 మంది, మహిళలు 98,435 మంది, ఇతరులు 3 ఉన్నారు.