నిజామాబాద్అర్బన్, వెలుగు: చారిత్రక నేపథ్యం ఉన్న ఇందూరు నగరాన్ని పాతబస్తీలా మార్చడానికి కాంగ్రెస్ కుట్రలు చేస్తుందని అర్బన్ఎమ్మెల్యే ధన్పాల్సూర్యనారాయణ అన్నారు. మంగళవారం పార్టీ కార్యాలయంలో విలేకరులతో ఎమ్మెల్యే మాట్లాడుతూ.. హైదరాబాద్ మహా నగరంలో దాదాపు 5 లక్షల బోగస్ ఓట్లు ఉన్నాయని ఇటీవల కాంగ్రెస్ నాయకుడు ఫిరోజ్ఖాన్బహిరంగంగా చెప్పాడన్నారు.
ఇందూరులో కూడా పెద్ద సంఖ్యలో బోగస్ ఓట్లు నమోదు చేస్తున్నారని ఆరోపించారు. ఇటీవల నగరంలోని ఒక డివిజన్పరిధిలో కొత్తగా 280 ఓట్లు నమోదైతే అందులో 274 ఓట్లు ముస్లిం వారివే కావడం గమనించాలన్నారు. అధికారంలో ఉన్న కాంగ్రెస్ తమ అధికార బలంతో తమకు అనుకూలంగా ఉన్న బూత్‌ల్లో ఎలాంటి గుర్తింపు కార్డులు లేకుండా వందల సంఖ్యలో బోగస్ఓట్లను సృష్టిస్తున్నారని ఆరోపించారు. ఇందూరు గడ్డపై విజయం సాధించడానికి విపక్షాలు ఎన్ని కుట్రలు చేసిన కాషాయజెండా రెపరెపలాడడం ఖాయమని ధీమా వ్యక్తం చేశారు. బోగస్ఓట్లపై చర్యలు తీసుకోకపోతే ఆందోళనకు సిద్ధమవుతామని హెచ్చరించారు. సమావేశంలో కార్పొరేటర్లు, బీజేపీ నాయకులు పాల్గొన్నారు.
