వెలుగు బిజినెస్ డెస్క్: కిందటేడాది అక్టోబర్ నుంచి ఇప్పటిదాకా గ్లోబల్గా 5 లక్షల ఉద్యోగాలు పోయినట్లు బ్లూమ్బర్గ్ రిపోర్టు వెల్లడించింది. ఉద్యోగాల కోత పెడుతున్న కంపెనీల జాబితాలో తాజాగా వాల్మార్ట్ కూడా చేరింది. రెండు వేల మందిని తొలగిస్తున్నట్లు వాల్మార్ట్ సోమవారం ప్రకటించింది. వైట్ కాలర్ ఉద్యోగాలే ఎక్కువగా పోతున్నట్లు బ్లూమ్బర్గ్ పేర్కొంది. బిగ్టెక్ కంపెనీలతో మొదలైన జాబ్ కట్స్ ఆ తర్వాత ఇతర రంగాలలోని కంపెనీలకు, స్టార్టప్స్కు చేరింది.
మెకిన్సే, కేపీఎంజీ వంటి కన్సల్టింగ్ కంపెనీలు కూడా ఇప్పుడు ఉద్యోగాలు తగ్గిస్తున్నట్లు ప్రకటిస్తున్నాయి. ఇక ఫెడెక్స్కార్ప్, బోయింగ్వంటివైతే మిడిల్ మేనేజ్మెంట్ లెవెల్లోని ఉద్యోగులపై వేటు వేస్తున్నాయి. కరోనా టైములో తమ సర్వీసులకు డిమాండ్ జోరందుకోవడంతో ఉన్న వాళ్లు చాలక కొత్త ఉద్యోగులను చాలా మందిని తీసుకున్నాయి బిగ్టెక్ కంపెనీలు. విమియో వంటి వీడియో స్ట్రీమింగ్ కంపెనీల రెవెన్యూ ఇప్పుడు బాగా తగ్గిపోయింది. మరోవైపు షేర్లు కూడా పతనమవుతున్నాయి.
దీంతో ఇలాంటి కంపెనీలన్నింటికీ ఉద్యోగాల కోత తప్పడం లేదు. కరోనా టైములో అందరూ ఆన్లైన్ వీడియోల కోసం ఎగబడటంతో తమ వ్యాపారం బాగా సాగిందని విమియో సీఈఓ అంజలి సూద్ ఇటీవల ఫోర్బ్స్కు చెప్పారు. ఇప్పుడు ఎంటర్ప్రైజ్ కస్టమర్ల కోసం తాము వెతుక్కుంటున్నామని ఆమె పేర్కొన్నారు. మరోవైపు చాలా పనులకు వర్కర్లు దొరకని పరిస్థితి బ్లూ–కాలర్ జాబ్స్ మార్కెట్లో కనిపిస్తోంది. వైట్కాలర్ ఉద్యోగాల కోత ఇక్కడితో ఆగుతుందా...ఇంకా కొనసాగుతుందా అనే ప్రశ్న తలెత్తుతోంది.
ఒకవేళ గ్లోబల్గా రెసిషన్ వస్తే మాత్రం ఈ ఉద్యోగాల కోత మరింత ఎక్కవయ్యే అవకాశాలున్నాయని బ్లూమ్బర్గ్ రిపోర్టు చెబుతోంది. చాట్జీపీటీ వంటి ఆటోమేషన్ ట్రెండ్స్ ఇప్పుడిప్పుడే సంచలనాలకు తెరతీస్తున్నాయని...ఉద్యోగాలపై వాటి ఎఫెక్ట్ ఏమిటనేది తెలవడానికి మరికొంత సమయం పట్టొచ్చని ఎక్స్పర్టులు చెబుతున్నారు.
