మంచిర్యాల: గత బీఆర్ఎస్ పదేండ్ల పాలనలో గ్రామాలు, పట్టణాలు ఎక్కడ అభివృద్ధి జరగలేదని మంత్రి వివేక్ వెంకటస్వామి విమర్శించారు. కేవలం కమీషన్ల కోసం ప్రాజెక్ట్లు, భారీ నిర్మాణాలు చేపట్టారని ఆరోపించారు. సోమవారం (జనవరి 19) చెన్నూరు నియోజకవర్గంలోని క్యాతనపల్లి మున్సిపాలిటి పరిధిలో ఇందిరా మహిళా శక్తి సంబరాలు నిర్వహించారు. ఈ కార్యక్రమంలో మంత్రి వివేక్ పాల్గొని స్వయం సహాయక మహిళ సంఘాల మహిళలకు 1.71కోట్ల బ్యాంకు లింకేజీ రుణాలను అందజేశారు.
ఈ సందర్భంగా ఆయన మాట్లాడుతూ.. మహిళల ఆర్థిక అభివృద్ధికి తోడ్పాటు అందించేలా మహిళ స్వయం సహాయ సంఘాల మహిళల అభివృద్ధి కోసం వడ్డీ లేని రుణాలు,పెట్రోల్ బంక్లు ఏర్పాటు చేయిస్తున్నామన్నారు. ఎమ్మెల్యేగా గెలుపొందిన తర్వాత క్యాతనపల్లి మున్సిపల్లో రూ.35 కోట్లతో సీసీరోడ్లు, డ్రైనేజీ నిర్మాణ పనులు చేపట్టినట్లు తెలిపారు. క్యాతనపల్లిలో 16 వందల కొత్త రేషన్ కార్డులు జారీ చేశామని చెప్పారు. అర్హులైన పేదలకు 150 ఇందిరమ్మ ఇండ్లు కేటాయిస్తామన్నారు.
